“Do Umui Hegaegae”

¹ Iesu ese ena peroveta herevana badana amo inai tanobada dikana ena dokona ia herevalaia neganai, dina ta ta ena mauri durua gaudia ita laloa momo lasi totona ita ia sisiba henia. (Mat. 24:​36-​39; Luka 21:​34, 35) Hisihisi badana be ita diba lasi negana ai ia vara diba dainai, gau badana be Iesu ena sisiba ita badinaia: “Do umui hegaegae, badina be Taunimanima ena Natuna do ia mai ena hora be umui diba lasi.” (Mat. 24:44) Unai gauna dekenai dahaka ese ita idia durua diba?

² Tanobada Ena Lalo-Metau Bona Lalo-Ani Gaudia Dadaraia: Lauma dalanai ita naria namonamo be namo tarapudia ta be “tanobada ena laloa metau momo gaudia.” (Luka 21:34) Tano haida ai hitolo, moni gaukara be lasi, bona kohu bona aniani edia davana ia bada ia lao dainai, mauri durua gaudia abia karana be auka. Tano ma haida dekenai, kohu habadaia karana be bada. Bema tanobada gaudia ese iseda laloa karana ia biagua matamaia, Basileia ena gau korikoridia laloa bada noho karana ita haboioa diba. (Mat. 6:​19-​24, 31-​33) Keristani heboudia ese ita idia durua Basileia ena gau korikoridia ita laloa bada noho totona. Oiemu lalona oi hadaia hebou ibounai oi lao henia totona, a?​​—Heb. 10:​24, 25.

³ Inai tanobada be lalo-ani gaudia amo ia honu, bona unai ese eda nega namona idia haorea diba. Kompiuta gaukaralaia karana be tarapu ta ai ia lao diba, bema tau ta be nega bada ia haorea Internet ia sekea, E-mail ia duahia bona siaia, eiava kompiuta gadara ia karaia. Televisen, vidio, spot gadara bona ita moalelaia karadia haida, eiava varavara ida ita kiki kava neganai hora bada ita halusia diba, bona nega bona goada do ia hegeregere lasi lauma gaudia ita tahua totona. Moale karadia bona laga-ani karadia ese nega sisina lalonai ita idia hagoadaia diba, to sibona eda stadi bona famili Baibel stadi ese namo bada do ia havaraia ela bona hanaihanai. (1 Tim. 4:​7, 8) Nega oi atoa dina ta ta ai Dirava ena Hereva oi lalohadailaia totona, a?​​—Efe. 5:​15-​17.

⁴ Ita moale badina be Iehova ena orea ese lauma dalanai ita ia hadibaia program ta ia hegaegaelaia, unai amo ita ia durua ‘dika ibounai dekena amo do ita heau mauri, vadaeni Taunimanima ena Natuna ena vairana dekenai do ita gini’ totona! (Luka 21:36) Namona be unai program ita badinaia namonamo bona ‘do ita hegaegae,’ bena iseda abidadama dainai ‘Iesu Keriso ia hedinarai dinana dekenai mataurai bona hairai bona hanamoa do ita davaria.’​​—1 Pet. 1:7.