Henanadai Mauana

◼ Kongregesen dekenai ruma bese ena Baibel stadi ita ripotilaia be namo, a?

Bema Keristani tama eiava sina ese ruma bese ena Baibel stadi ia karaia bona unai stadi dekenai bapatiso lasi natudia idia noho, unai tama eiava sina ese ripoti dekenai wiki tamona lalonai hora tamona, wiki tamona lalonai lou henia tamona, bona hua tamona lalonai Baibel stadi tamona ia torea. Unai bamona do idia ripotilaia, herevana hora haida lalonai idia stadi, wiki tamona lalonai nega rua eiava toi idia stadi, eiava natudia ta ta idia stadi henia.​​—Hesiai Gaukara bukana, rau 104 itaia.

Bema ruma bese taudia ibounai be bapatiso Witnes taudia, vadaeni ruma bese ena stadi bona hora idia ripotilaia lasi (to bema natuna ta ia bapatiso murinai buka iharuana ia do stadilaia noho, unai idia ripotilaia noho). Unai ena badina be, kongregesen ena haroro ripoti ese sivarai namona harorolaia gaukarana dekenai dahaka ita hagugurua bona Baibel ena hereva momokani be idia gwauhamata lasi bona idia bapatiso lasi Iehova ena hesiai taudia ita hadibaia karana ia hahedinaraia be gau badana. (Mat. 24:14; 28:​19, 20) To, unai ese ruma bese ena stadi karaia hanaihanai karana ena anina ia hamaragia lasi.

Keristani tama sina edia maduna be edia natudia ida idia stadi be namo. Ruma bese ena stadi idia hamatamaia bona hanamoa totona heduru idia ura tama sina be elda taudia edia heduru idia noia be namo. Bema badina haida dainai pablisa ma ta ese kongregesen ia bamoa Keristani ruma besena ena bapatiso lasi natuna mero eiava kekeni ia stadi henia be namo, hakaua naria tauna eiava haroro naria tauna idia itaia be namo. Bema pablisa dekenai gwaumaoro idia abia unai stadi ia karaia totona, vadaeni ia ese unai mero eiava kekeni be Baibel stadi ma haida bamona do ia ripotilaia.

Natudia dekenai Iehova ena dala idia hadibaia totona nega bona goada bada ita halusia, bona unai ese haroro gaukara ena ripoti ai ita torea hedinarai namba idia hanaia. (Deu. 6:​6-9; Aon. 22:6) Keristani tama sina ita hanamodia badina be “Lohiabada ena hadibaia hereva” dekenai edia natudia idia naria ena maduna metauna idia huaia.​​—Efe. 6:4.