Oiemu Nega Oi Gaukaralaia Dalana Oi Naria Namonamo
1 Oi davaria, lauma gaudia tahua karana ena sediual namona oi badinaia totona be mai ena hekwarahi, a? Oi ura haroro gaukara dekenai emu nega oi habadaia, a? Edena dala ai iseda nega ita gaukaralaia namonamo diba?—Sal. 90:12; Fili. 1:9-11.
2 Nega Idia Haorea Kava Gaudia Oi Dibaia: Ita ibounai ese nega ta ta ai iseda nega ita gaukaralaia dalana ita tahua namonamo be namo. Baibel ia gwau: “Umui emui kara do umui naria namonamo. Aonega taudia bamona do umui noho, kavakava taudia bamona lasi. Harihari emui nega namona ia noho Dirava ena kara do umui karaia totona. Emui nega do umui haorea kava lasi, badina hari nega be nega dikana.”—Efe. 5:15, 16.
3 Herevana inai tano ai edeseniai ita noho, ita ta ta ese sibona dekenai henanadai haida ita henia diba: ‘Ma haida ida lau kiki neganai bona snuka gadara eiava dats gadara dekenai nega bada lau halusia, a? Lau helai kava bona gaukara ta lau karaia lasi, a? Taoni dekenai lau lao neganai, kompiuta eiava vidio gadara gabudia lau tahua bona unai gaudia gadaralaia totona nega bona moni bada lau halusia kava, a? Bema lau be mai egu E-mail, dina ta ta ai nega bada lau henia E-mail amo idia siaia anina lasi herevadia lau duahia bona haerelaidia, a? Lau be hanaihanai telefon amo varavara bona ma haida lau ringi henia bena anina bada lasi gaudia ai herevalaia, a? (1 Tim. 5:13) Bema lau be mai egu Internet, unuseniai anina lasi gaudia itaia karana amo egu nega bada lau haorea kava, a? Bema lau be mai egu televisen, ena be idia hahedinaraia program ta lau ura henia lasi, to hora momo lalonai lau helai bona unai program lau raraia sibona, a? Lauegu ura gaudia haida dekenai egu nega bada lau haorea dainai, nega be lasi Dirava ena Hereva lau stadilaia totona, a?’ Unai bamona gaudia ese iseda lauma dalana idia hadikaia diba.—Aon. 12:11.
4 Nega Gaukaralaia Namonamo: Kompiuta gadara ia gadaralaia momo matamata tauna ta ia gwau: “Nega haida bema kompiuta gadara lau karaia guna bena unai murinai haroro eiava Keristani hebou dekenai lau lao neganai, lau laloa namonamo diba lasi. Nega momo lau laloa gauna be, ruma dekenai lau giroa murinai edena bamona unai kompiuta gadara do lau hanamoa. Sibona egu stadi bona hanaihanai egu Baibel duahiduahi karana lau karaia lasi. Iehova hesiai henia karana dekenai egu moale ia maragi ia lao.” Unai kara ia haidaua be namo ia dibaia neganai, iena kompiuta amo kompiuta gadara ibounai ia kokia. Ia gwau: “Unai be auka momokani. Unai kompiuta gadara idauidau lau manadalaidia momokani, guna lau laloa unai do ia vara lasi. To danu lau mamia lau kwalimu vadaeni, badina lau diba egu namo totona unai lau karaia.”—Mat. 5:29, 30.
5 Bema oi davaria emu kara haida oi haidaua be namo reana unai bamona oi karaia be gau badana. Dina ta ta ai, anina bada lasi karadia amo miniti 30 ita hoia diba, a? Unai bamona miniti oi gaukaralaia diba lagani tamona lalonai Baibel ibounai oi duahia ore totona. Lauma dalanai namo bada do oi abia! (Sal. 19:7-11; 119:97-100) Baibel duahiduahi, hebou gaudia hegaegaelaia, bona haroro totona nega oi atoa. (1 Kor. 15:58) Unai oi karaia neganai oi do ia durua nega idia halusia kava gaudia oi biagudia totona, bona oi do ia durua ‘Lohiabada ena ura gaudia sibona do oi tahua’ totona.—Efe. 5:17.
[Study Questions]
1. Iseda nega ita gaukaralaia dalana dekenai, dahaka henanadai haida be ita sibona dekenai ita henia diba?
2, 3. Ita ta ta ese iseda nega ita gaukaralaia dalana dekenai, edena dala ai ita sibona eda kara ita tahua diba?
4. Matamata tauna ta be edena dala ai ena kara ia haidaua, bona dahaka dainai?
5. Edena dala ai lauma gaudia ita tahua totona nega ita hoia diba, bona edena dala ai unai bamona ita karaia amo namo ita davaria?