Hosi Guia Tuari Taudia ida Oi Heau
1 “Aneru namba 6 ese iena kibi ia hiriria.” Unai murinai, ‘tuari taudia, hosi dekenai idia guia taudia, ibounai 200 milioni’ be idia heau haraga mai regerege bada ida, guba ena boiboi bamona. Unai be tuari orea idauna ta. “Hosi edia kwarana be laiona edia kwarana bamona.” Lahi, kwalahu, bona salipa be edia uduna dekena amo idia halasia, bona edia “iuna be gaigai bamona.” Unai hosi guia tuari taudia edia heau haraga karana ese dika bada ia havaraia. (Apok. 9:13-19) Unai peroveta matahanai idau hereana oi hagugurua dalana be oi diba, a?
2 Horoa orena taudia bona edia bamodia, mamoe idaudia unai, be mai lalo-tamona ida Dirava ena hahemaoro herevana idia gwauraia hedinarai. Unai amo idia hahedinaraia Kerisendom be lauma dalanai ia mase. Unai peroveta matahanaina dekenai gau rua mani ita tahua, unai ese idia hahedinaraia dahaka dainai Dirava ena hesiai taudia edia hesiai gaukara ese taunimanima momo ia durua.
3 Diba Idia Abia Bona Idia Hegeregere Dirava Ena Sivarai Idia Halasia Totona: Tiokratik Haroro Sikuli bona kongregesen ena hebou ma haida amo, Dirava ena hesiai taudia be diba idia abia mai siahu danu Dirava ena sivarai idia harorolaia totona. Idia be Iesu bona iena hahediba taudia idia tohotohoa dainai idia lao bona lalo-namo taudia idia tahua, taunimanima idia davaria diba gabudia dekenai idia haroro. (Mat. 10:11; Mar. 1:16; Luka 4:15; Kara 20:18-20) Baibel ia herevalaia dalana amo taunimanima ita haroro henia ese anina namona ia havaraia!
4 Keristani hesiai taudia ese Dirava ena hahegani idia badinaia dainai Baibel, buka, buklet, bona magasin bilioni momo idia hariharilaia vadaeni. Unai buka bona magasin be kahirakahira gado 400 dekenai idia halasia, gau idauidau idia herevalaia bona taunimanima idauidau edia lalona ia veria daladia ai idia gaukaralaia. Oi be unai tulu oi gaukaralaia namonamo, a?
5 Hakaua Bona Heduru be Guba amo Idia Mai: Danu, peroveta matahanaina ese ia hahedinaraia goevagoeva Dirava be unai hosi guia tuari taudia edia gaukara ia durua. (Apok. 9:13-15) Tanobada ibounai dekenai haroro gaukara idia hagugurua, taunimanima edia aonega eiava siahu amo lasi to Dirava ena lauma amo. (Sek. 4:6) Iehova be aneru ia gaukaralaia unai gaukara ia hakaua totona. (Apok. 14:6) Danu Iehova ena Witnes taudia edia hekwarahi bona guba amo Iehova ia henia heduruna amo manau taudia be ia dekenai idia mai diba.—Ioa. 6:45, 65.
6 Iehova ena taunimanima be diba idia abia, idia hegeregere momokani Dirava ena sivarai idia halasia totona, bona aneru edia hakaua henunai idia gaukara dainai, gau ta ese idia ia koua diba lasi. Namona be unai mai anina bada peroveta matahanaina ia guguru noho lalonai iseda kahana ita karaia noho.
[Study Questions]
1, 2. Hari inai negai, Apokalupo 9:13-19 dekenai ia noho peroveta matahanaina be edena dala ai Dirava ena hesiai taudia ese idia hagugurua?
3. Oi ese dahaka diba oi abia vadaeni Dirava ena sivarai oi herevalaia namonamo totona?
4. Dahaka tulu ese pablisa taudia momo ia durua edia gaukara idia karaia namonamo totona?
5, 6. Dahaka ese ia hahedinaraia Iehova ena taunimanima be guba amo heduru idia abia?