Iseda Toana Ia Goeva Dainai Ita Idia Hanamoa
1 “Iehova ena Witnes taudia be taunimanima namodia! Emui taunimanima be idia kara namo bona dabua idia hahedokilaia namonamo, bona hemataurai bada idia hahedinaraia.” Hotel biaguna tauna ta ese vanegai lagani ena distrik hebouhebou dekenai idia lao tadikaka bona taihu be unai bamona ia gwauraidia. Hebouhebou ma ta dekenai, hotel ai ia gaukara hahinena ta ia gwau: “Ia hedinarai goevagoeva emui taunimanima be dabua idia hahedokilaia Dirava idia hamoalea totona.” Oibe, hebouhebou dekenai idia lao taudia be ma haida ese idia itaia. Unai dainai, ita ura “Sivarai Namona ena dala hegeregerena” dabua ita karaia, bona nega momo unai ese murimuri taudia edia lalona ia veria ita idia hanamoa totona bona ia hahedinaraia ita be Dirava ena hesiai taudia. (Fili. 1:27) Distrik hebouhebou totona ita hegaegae neganai, namona be iseda toana ita laloa guna.
2 Hahediba tauna Iamesi ia gwau: “Dirava dekena amo aonega ia abia tauna ena kara ginigunana be inai: . . . goevagoeva.” (Iam. 3:17) Iseda toana ia goeva totona be mai ena hekwarahi. Satani ena matabodaga tanobada ese taunimanima ia veria lebulebu karadia bona ia maoro lasi sitaelo idauidau idia karaia totona. (1 Ioa. 2:15-17) Unai dainai, dabua bona tauanina ena toana ita abia hidi neganai, namona be Baibel ena sisiba ita badinaia, ia gwau inai tanobada dikana lalonai “Dirava negea kara bona lebulebu kara do ita rakatania. . . . Do ita noho namonamo.” (Tito 2:12) Ita ura lasi eda toana amo ma haida edia lalona ita hadikaia, herevana idia be iseda tadikaka, hotel bona aniani gabuna ai idia gaukara taudia eiava ita idia itaia taudia ma haida.—1 Kor. 10:32, 33.
3 Hemataurai Dabua Namona Hahedokilaia: Hebouhebou totona oi hegaegae neganai, oi sibona oi nanadaia, ‘Egu dabua amo hemataurai lau hahedinaraia eiava taunimanima be lau idia maumauraia, a? Ma haida dekenai hemataurai karana lau hahedinaraia, a? Egu dabua ia diho momokani dainai egu kemena ia hedinarai eiava ia be kwadogi momokani, a? Egu tauanina ena kahana haida idia hahedinaraia dabua lau hahedokilaia, a? Egu dabua be ia goeva bona bonana lasi, a? Dabai eiava adorahi ai aniani lau hoia eiava program murinai lau laga-ani neganai, Dirava ena hesiai tauna ta ena toana namona do lau hahedinaraia, a? Eiava ia goeva lasi, ia dika bona hebouhebou ena lapel kadi ia atoa tauna dekenai ia hegeregere lasi dabua do lau hahedokilaia, a? Nega idaudia ma haida ai lau karaia dabua dainai lau hemarai lau haroro totona, a?’—Roma 15:2, 3; 1 Tim. 2:9.
4 Lo Keristani taudia edia lalohadai amo namo bada ita abia diba. Namona be hahine ese edia adavana idia nanadaia, edia dabua ena toana be ma haida ese edena bamona do idia laloa. Dirava idia badinaia tama sina ese unai dala dekena amo edia natudia idia durua diba. Danu, Dirava idia badinaia taihu badadia “edia hadibaia hereva ese hahine matamatadia do ia durua . . . idia laloa maoromaoro, mai laloa goevagoeva danu,” unai amo edia toana ese “Dirava ena Sivarai Namona do ia hadikaia diba lasi.” (Tito 2:3-5) Iseda magasin bona buka lalonai idia noho laulau ese manau dalanai dabua hahedokilaia dalana idia hahedinaraia.
5 Iehova Hanamoa: Distrik hebouheboudia ese dala namona ia kehoa hebouhebou ena program ena kahana lalonai idia vareai taudia sibona lasi, to ita ibounai ese Iehova ita hanamoa totona. Oibe, iseda Keristani kara bona hereva ese ia do ia hanamoa. To murimuri taudia ese do idia itaia gauna ginigunana be iseda dabua bona toana. Namona be ita ibounai eda toana ia goeva karana amo Iehova ita hanamoa.—Sal. 148:12, 13.
[Study Questions]
1. Distrik hebouhebou totona ita hegaegae neganai, dahaka dainai iseda toana ita laloa be namo?
2. Dahaka dainai ta ena dabua bona tauanina ia goeva be mai ena hekwarahi?
3. Dahaka henanadai ese ita do ia durua ita sibona eda toana ita tahua namonamo totona?
4. Ma haida ese edena dala ai ita idia durua diba iseda toana ia goeva totona?
5. Hebouhebou neganai, edena dala ai Iehova do ita hanamoa diba?
[Box on page 10]
Heduru Gaudia Eda Toana Hanamoa Totona
◼ Dirava ena Hereva
◼ Sibona ita tahua
◼ Ma haida edia lalohadai abia
◼ Keristani buka bona magasin