Hebou Badana Lalonai Iehova Hanamoa
1 Lagani ta ta ai ita abia distrik hebouhebou negadia be nega namona Iehova ita hanamoa totona. Iseda hemami be Davida ena bamona, ia gwau: “Unai neganai hebou badana lalonai, oi do lau tanikiu henia. Taunimanima momo edia vairana dekenai oi do lau hanamoa bada.” (Sal. 35:18) “Dirava Badinaia” Distrik Hebouhebou dekenai, edena bamona ita hahedinaraia ita be mai lalotamona ida Iehova ita hanamoa diba?
2 Iehova ita hanamoa dalana ta be iseda kara amo. Hebouhebou gabuna ta idia naria taudia idia gwau: “Ai ese inai gabu idia ura rentaia dubu orea ma haida dekenai emui hebou hegaegaelaia dalana ai gwauraia, bona ai hamaorodia idia mai bona emui hebou haheaua dalana idia itaia.” Iseda toana, gaukara hebou, bona kara amo iseda Dirava ita hanamoa be maoro.—1 Pet. 2:12.
3 Iseda Toana: Iseda dabua bona toana amo Iehova ita hanamoa totona, ita manau be namo. (1 Tim. 2:9) Haroro Sikuli bukana, rau 132, ia gwau: “Ia manau tauna ia ura lasi ma haida ia hahekwakwanaia bona edia lalona ia veria lasi ia idia laloa totona.” Tano momo ai, taunimanima momo be edia dabua karaia dalana amo hemataurai toana idia hahedinaraia lasi. To, bema ita hekwarahi iseda toana amo ita hahedinaraia ita be Iehova ena hesiai taudia, Ia ese unai ia laloa bada. (Kara 15:14) Ena be iseda hebouhebou be edena gabu dekenai idia abia, to dina toi lalonai do ita abia hebouhebou be “hebou badana.” Unai dainai, Iehova vairanai ita hebou neganai, namona be hemataurai dalanai iseda dabua ita karaia, badina Ia sibona be atai herea Diravana.—1 Siv. 29:11.
4 Dina ta ta ena program ia ore neganai, iseda toana ita laloa namonamo be mai anina bada. Ena be ruma dekenai eiava aniani gabuna ta dekenai ita lao, to gau badana be iseda dabua bona toana amo ita hahedinaraia ita be ‘Dirava ita matauraia’ taudia. (1 Tim. 2:10) Ita gwau lasi taunimanima momo ese idia ura henia dabua be maoro Keristani taudia totona. (1 Ioa. 2:16, 17) Iseda buka bona magasin edia laulau namodia ai idia noho tatau bona hahine be nega bona gabu idauidau dekenai hemataurai dabua idia karaia. Unai laulau ese ita idia durua hemataurai dabuadia ita karaia totona. Hebouhebou gabuna dekenai ita loaloa neganai iseda lapel kadi ese ia hahedinaraia nega ibounai ita be Keristani taudia.—2 Kor. 6:3, 4.
5 Iehova Ena Aria Matauraia: Siahu Ibounai Diravana ese aria badana ta ia hegaegaelaia. (Isa. 25:6; 1 Kor. 10:21) Bema Iehova ena aria ita laloa bada, iseda tahua gauna be hebouhebou ena dina toi do ita reaia lasi. Noho gabuna, trenspot, bona moni gaukara dekenai holidei oi abia totona dala oi karaia vadaeni, a? Namona be hebouhebou oi lao henia totona oi hegaegae bona nega oi atoa, unai amo hebouhebou gabuna dekenai oi ginidae haraga, helai gabu oi abia diba, tadikaka ida oi hebamo, bona idia ida guriguri bona ane amo Iehova oi hanamoa diba.—Sal. 147:1.
6 Iehova ena aria ita matauraia neganai, hereva do ita kamonai namonamo, to ma haida ida do ita herevahereva lasi, do ita aniani lasi eiava hebou gabuna dekenai do ita loaloa kava lasi. Iehova be hesiai tauna mai ena kamonai bona mai ena kara maoromaoro oreana amo hari lauma aniani ia henia noho. (Mat. 24:45) Namona be unai dina toi do ita reaia lasi. Tama sina be edia natudia ida idia helai be namo bona idia durua idia kamonai namonamo totona.—Deu. 31:12.
7 Namona be iseda dina tubu aniani ita mailaia, namo lasi dina tubu ai hebou gabuna ita rakatania bona sitoa dekenai ita lao aniani ita hoia totona. Unai hakaua herevana be vanegai lagani ena hebouhebou idia lao taudia ese idia badinaia, unai dainai idia ai hanamoa. Inai lagani danu unai bamona ita karaia be namo! (Heb. 13:17) Unai nega namona ita gaukaralaia diba iseda tadikaka ida ita hedavari totona bona unai ese lalotamona bona maino ia havaraia, unai amo Iehova ita hanamoa.—Sal. 133:1.
8 Nega Bona Gabu Idauidau ai Ita Haroro: Hebouhebou dekenai ita lao eiava ita rakatania neganai, iseda uduna amo Iehova ita hanamoa. (Heb. 13:15) PMV dekenai ita guia eiava varavara ida ita herevahereva neganai, namona be dala ita tahua ita haroro totona. Iseda lalona bona kudouna be hebouhebou amo ita abia hereva namodia amo idia honu. Namona be ita abia hereva namodia be nega bona gabu idauidau dekenai ita davaria taudia ida ita herevalaia.—1 Pet. 3:15.
9 Mai eda ura bada ida inai nega namona ita gaukaralaia “hebou badana lalonai” Iehova ita hanamoa totona. (Sal. 26:12) “Dirava Badinaia” Distrik Hebouhebou dekenai mai lalotamona ida Iehova do ita hanamoa.
[Study Questions]
1, 2. Distrik hebouhebou negana be nega namona dahaka ita karaia totona, bona edena dala ai unai ita karaia diba?
3, 4. Hebou dekenai bona hebou ia ore murinai, edena dala ai hemataurai karana ese ita do ia durua Keristani taudia hegeregerena iseda dabua ita karaia totona?
5, 6. Edena dala ai Iehova ena lauma ariana ita matauraia diba?
7. Dina tubu ai, namona be dahaka ita karaia lasi, bona dahaka dainai?
8, 9. Hebouhebou negana ai dala ma haida idia noho Iehova ita hanamoa totona. Unai dala ma haida be dahaka?
[Box on page 8]
Distrik Hebouhebou Hadibaia Herevadia
◼ Program Negana: Dina toi lalonai program be 9:00 a.m. ai do ia matamaia. Geiti be 8:00 a.m. ai do ia kehoa. Miniti haida lalonai hebou ia do matamaia lasi neganai, Basileia miusiki idia gadaralaia lalonai seamani be platfom dekenai do ia helai. Unai negai, ita ibounai be iseda helai gabuna dekenai ita helai vadaeni, unai amo program ia matamaia namonamo diba. Friday ena program be 4:25 p.m. ai, Saturday be 4:40 p.m. ai, bona Sunday be 3:40 p.m. ai do idia ore.
◼ Motuka Atoa Gabuna: Hebouhebou gabudia dekenai motuka atoa gabudia idia noho, davana be lasi. Namona be motuka idia taria tadikaka ese hebouhebou kadi idia atoa, motuka atoa gabuna idia abia totona. Motuka atoa gabudia haida be maragi dainai, namo lasi tau tamona eiava rua sibona be edia motuka ta ta amo idia mai.
◼ Helai Gaudia: Oi ida motuka tamona ai umui guia taudia edia namba hegeregerena sibona helai gaudia umui makaia be namo.
◼ Kontribusen: Distrik hebouhebou hegaegaelaia totona, moni sisina bada idia negea. Tanobada hegegemadai gaukara durua totona, Kingdom Hall ai eiava hebouhebou dekenai idia noho mauana dekenai iseda kontribusen ita udaia diba, unai amo iseda tanikiu karana ita hahedinaraia. Hebouhebou gabuna dekenai idia henia seke be “IBSA” dekenai idia siaia be namo.
◼ Dina Tubu Aniani: Mani emu kara emu dina tubu ena aniani umui abia lao, namo lasi laga-ani negana lalonai aniani hoia totona hebouhebou gabuna umui rakatania. Helai gauna henunai oi atoa diba eski oi gaukaralaia. Hebouhebou gabuna dekenai, piknik ai ita gaukaralaia eski badadia, galasi gaudia bona kekero muramura be taravatu.
◼ Rekodi: Rekodi gaudia be Assembly Hall ena paua eiava saun gabudia dekenai umui gwadaia kau lasi, bona ma haida edia kamonai karana ia hadikaia lasi dalanai umui gaukaralaia be namo.
◼ Laulau Abia: Bema program lalonai laulau oi abia, diari halasia gaudia oi gaukaralaia lasi.
◼ Mobael Fon: Inai gaudia ita koua be namo, unai amo ma haida edia kamonai karana do ita hadikaia lasi.
◼ Aksiden: Bema hebouhebou gabuna dekenai ta be ia gorere dikadika eiava gau ta ese ia utua, atendan tauna oi hadibaia haraga bona First Aid Dipatmen do ia hadibaia, unai amo first-aid idia naria taudia ese idia sekea diba bona heduru do idia henia. Bema ia dika momokani, ambalans idia ringi henia diba.
◼ Noho Gabudia: (1) Bema mahuta gabudia oi ura abia, kongrigeisen ena seketere be Ruma Dipatmen amo fom ia abia neganai, karaharaga ia oi hadibaia. (2) Daiutu momo oi noia kava lasi, to do idia noho taudia edia namba hegeregerena sibona oi noia, bona daiutu dekenai do idia noho namba sibona be emui daiutu dekenai idia noho be namo. (3) Bema emu noho gabuna oi haidaua, Ruma Dipatmen oi hadibaia haraga be namo. (4) Aniani idia nadua lasi daiutu dekenai oi nanadu lasi. (5) Bema tadikaka edia ruma dekenai oi noho, edia heabidae karana oi matauraia be namo. (6) Emu noho gabunai idia gaukara taudia be idia bisi neganai oi hereva eiava kara henia neganai, lauma ena huahua oi hahedinaraia be namo.