Iesu Ena Laloa Dalana Tohotohoa
1 Ena be Dirava ena Natuna ita itaia lasi, to Iesu ena mauri bona ena haroro gaukara sivaraina, idia torea gauna, dainai ia ita lalokau henia. (1 Pet. 1:8) Iena Tamana ena ura ia badinaia dainai, ena guba mauri namona ia rakatania bona tanobada dekenai ia mai. Taunimanima ta bamona ia noho neganai, ma haida ia hesiai henia bona taunimanima totona ena mauri ia atoa diho. (Mat. 20:28) Dirava ena hereva ese ita ia hagoadaia: “Keriso Iesu ena laloa bamona umui danu do umui laloa be namo.” Edena dala ai Iesu hegeregerena sibona eda ura ita dadaraia diba?—Fili. 2:5-8.
2 Ita Hesiku Neganai: Ena be Iesu be goevadae tauna, to ia hesiku danu. Nega ta, ia ese Samaria hahinena ta ia haroro henia, ena be “iena tauanina ia manoka, ia laolao dainai.” (Ioa. 4:6) Hari Keristani taudia momo be unai bamona hahetoho idia davaria. Wiki ta lalonai moni gaukara idia karaia murinai, idia hesiku dainai do ia auka haroro gaukara idia karaia totona. To, bema hanaihanai Keristani haroro gaukara ita karaia, do ita davaria unai ese lauma dalanai ita ia hagoadaia.—Ioa. 4:32-34.
3 Ma nega ta ai, Iesu bona ena hahediba taudia be taunimanima idia noho lasi gabuna dekenai idia lao idia laga-ani totona. To, taunimanima hutuma ese idia itaia bona idia heau guna idia hedavari henidia totona. Iesu be unai kara dainai ia badu lasi, to “ia bogahisihisi idia dekenai” bona “sivarai momo ia hadibaia” matamaia. (Mar. 6:30-34) Baibel stadi oi hamatamaia bona karaia noho totona, unai bamona laloa dalana oi abia be namo. Unai ia vara totona, oi hekwarahi noho bona taunimanima oi lalokau henia be namo. Bema hari Baibel stadi ta oi karaia lasi, Baibel stadi ta oi davaria totona oi hesiku lasi.
4 Lauma Gaudia Ita Atoa Guna: Heduru painia gaukara ese ita ia durua diba lauma gaudia ita laloa bada totona. Taihu matamata ta ia gwau: “Egu turana ta ena sinana ese ai ruaosi ia hagoadaia ia ida hua ta lalonai painia gaukara ai karaia hebou totona. Ia ai bamoa dainai lau moale bada. Lau moale badina tadikaka bona taihu lau dibaia namonamo bona daudau lasi idia be egu ruma bese ta bamona. Danu, nega bada ia noho Iehova be ma haida dekenai lau herevalaia bona idia dekenai Basileia ena hereva momokani namodia lau hadibaia dainai lau moale. Unai ibounai dainai lau mamia lau be Iehova bona ena orea kahirakahira lau noho.”—Sal. 34:8.
5 Ita ibounai ita ura Iehova ita hamoalea to ita goevadae lasi dainai ita hekwarahi bada. (Roma 7:21-23) Namona be sibona laloa karana, tanobada ena lalohadai unai, ita dadaraia. (Mat. 16:22, 23) Unai ita karaia totona Iehova ese ena lauma helaga amo ita do ia durua diba. (Gal. 5:16, 17) Dirava ena tanobada matamatana ai do ita vareai negana ita naria noho lalonai, namona be Basileia bona ma haida edia namo ita tahua guna, unai amo Iesu ena laloa dalana ita tohotohoa diba.—Mat. 6:33; Roma 15:1-3.
[Study Questions]
1. Iesu be edena bamona laloa dalana ia hahedinaraia?
2. Keristani taudia momo be dahaka hahetoho idia davaria, bona dahaka ese idia do ia durua unai idia hanaia totona?
3. Iesu be mai ena ura ida taunimanima ia hadibaia, edena bamona unai ita tohotohoa diba?
4. Edena dala ai heduru painia gaukara ese ita ia durua diba Keriso ena laloa dalana ita tohotohoa totona?
5. Dahaka dainai ita hekwarahi noho be namo Iesu ena laloa dalana ita tohotohoa totona?