Ita Ia Hagoadaia Miusiki
1 Ane bona miusiki be tomadiho momokani ena kahana badana ta. Idaunega Israela ai, Asapa bona ena tadikaka ese ane idia abia: “Dirava do ita tanikiu henia. . . . Ane do ita abia, bona Lohiabada ena ladana do ita abia isi. Iena kara badadia bona namodia, ia ese ia karaia gaudia do ita gwauraia hedinarai.” (1 Siv. 16:8, 9) Hari inai negai, iseda pura ta ta kongregesen heboudia ai, mai eda gado badana ida Iehova dekenai ane ita abia. (Efe. 5:19) Unai be dala namo hereana ta iena ladana ita hanamoa totona!—Sal. 69:30.
2 Kingdom Melodies, miusiki gadaralaia taudia ese idia karaia Basileia miusiki, ita kamonai henia karana ese eda lalona be lauma gaudia amo idia hahonua diba. Taihu ta ia gwau: “Miusiki idia gadaralaia neganai, egu lalona dekenai ane herevadia lau laloa. Unai be dala namona miusiki lau moalelaia noho lalonai Iehova lau laloatao totona!”—Fili. 4:8.
3 Miusiki Ita Moalelaia Negadia: Ruma ai Kingdom Melodies gadaralaia karana ese lauma gaudia laloa bada karana ia havaraia neganai, ruma bese lalonai maino do ia noho. Ruma bese ta ia gwau: “Aiemai ruma bona motuka ai inai [miusiki] ai gadaralaia loulou bona idia hegaegaelaidia dalana be namo herea dainai ai hesiku lasi. Hanaihanai Keristani heboudia totona ai hegaegae eiava hebouhebou badadia dekenai ai lao lalonai, Kingdom Melodies ese maino mamina maorona ia henia.” Taihu ta ia gwau: “Ruma gaukara lau karaia neganai, unai miusiki kamonai karana ese lau ia hagoadaia momokani—lau hoa badina dabua lau lokua neganai lau moale. Palani lau karaia, lau lalo-metau neganai inai miusiki lau gadaralaia totona. Unai miusiki ese lau ia durua bada herea! . . . Ane ibounai ese moale ia mailaia.” Unai bamona miusiki ese oi do ia durua negadia ma haida be dahaka?
4 Hari inai negai, miusiki momo be tanobada ena lalohadai idia hahedinaraia. Tama sina ese Kingdom Melodies idia gaukaralaia namonamo karana amo edia natudia idia durua diba, miusiki namodia moalelaia karana idia habadaia totona. Baibel stiuden bona kamonai taudia momo be do idia moale unai ane namodia idia diba totona, unai ane ese Iehova idia hanamoa bona lauma dalanai ita idia hagoadaia.—Sal. 47:1, 2, 6, 7.