Iehova be Ia Idia Abidadama Henia Taudia Ia Durua
1 Taunimanima momo idia laloa moni, ladana bada bona taunimanima ta ena diba be kwalimu dalana badana. (Sal. 12:4; 33:16, 17; 49:6) To, Baibel ese Iehova idia gari henia bona abidadama henia taudia ia hagoadaia, ia gwau: “Ia ese umui ia durua noho, ia ese umui ia naria noho.” (Sal. 115:11) Namona be inai gaudia rua dekenai ita hahedinaraia Iehova ita abidadama henia, mani ita itaia.
2 Ita be Keristani Taudia: Kongregesen ai eiava haroro gaukara dekenai hadibaia gaukara ita karaia neganai, namona be iseda Dirava dekenai ita tabekau. Iesu ena haheitalai mani ita laloa. Herevana ia be Dirava ena Natuna, ia be sibona ena aonega eiava diba dekenai ia tabekau lasi to ena guba Tamana dekenai ia tabekau momokani. (Ioa. 12:49; 14:10) Unai bamona ita karaia danu be namo! (Aon. 3:5-7) Iehova ena heduru sibona dainai ia do ita hanamoa bona ma haida do ita durua diba.—Sal. 127:1, 2.
3 Bema Iehova ena hahekau bona ena lauma helaga ena heduru totona ita guriguri, ita hahedinaraia ita be Iehova dekenai ita tabekau. (Sal. 105:4; Luka 11:13) Ma danu, bema iseda hadibaia herevadia be Dirava ena Hereva, Baibel amo ita abia, ita hahedinaraia ita be Ia dekenai ita tabekau. Iena hereva be mai ena siahu taunimanima edia kudouna ia veria bona mauri ia haidaua totona. (Heb. 4:12) ‘Dirava ese ia henia goada hegeregerena’ taunimanima ita haroro henidia neganai, Iehova ita hanamoa.—1 Pet. 4:11, NW.
4 Hekwakwanai Ita Davaria Neganai: Metau bona hekwakwanai ita davaria neganai, namona be Iehova dekenai heduru ita tahua. (Sal. 46:1) Hegeregere, gaukara biaguna ia ura lasi ita dekenai nega ia henia hebouhebou ta dekenai ita lao totona, eiava reana iseda ruma bese lalonai hekwakwanai badana ta ita davaria. Reana iseda varavara ese ita idia doria Iehova ia abia dae lasi kastom karadia eiava kara ma haida lalonai ita vareai totona. Bema Iehova ita guriguri henia loulou bona ena Hereva bona orea amo ia henia hakaua herevadia ita badinaia, vadaeni ita hahedinaraia ita be Iehova dekenai ita tabekau. (Sal. 62:8; 119:143, 173) Iehova ena hesiai taudia be unai bamona idia karaia neganai, edia mauri dekenai Iena heduru do idia mamia.—Sal. 37:5; 118:13, 16.
5 Iehova ese ita ia hadibaia: “Lau Lohiabada ia abidadama henia noho tauna be namo. Iena laloa goada be lau dekena amo ia abia tauna, be do lau hanamoa.” (Ier. 17:7) Namona be ita karaia gaudia ibounai dekenai ita hahedinaraia, ita be Iehova ita abidadama henia!—Sal. 146:5.