Sekit Hebouhebou Ena Program Matamata
1 Ia dika ia lao tanobadana ai ita gini goada totona, Iehova ita abidadama henia be namo. Unai ena anina iseda dina ta ta maurina dekenai be dahaka? Ita sibona iseda bona ruma bese mauri lalonai Iehova abidadama henia karana ese edena bamona ita ia durua? Unai ese edena bamona ita ia durua Satani ena tanobada ena lalona veria gaudia ita dadaraia totona? Lagani 2003 ena sekit hebouhebou ena program ese unai henanadai do ia haerelaidia. Unai hebouhebou ena sinado be, “Iehova Dekenai Do Oi Abidadama, Bona Kara Namo Oi Karaia.”—Sal. 37:3.
2 Iseda abidadama Iehova dekenai be mai anina bada negadiai eiava heduru ita ura negadiai sibona ita hahedinaraia lasi. To iseda mauri ena kahana ibounai lalonai ita hahedinaraia. Unai be hebou ena hereva ginigunana, “Nega Ibounai Iehova Oi Abidadama Henia” ese do ia hahedinaraia. (Sal. 62:8) Hereva ta mai ena kahana foa, “Iehova Abidadama Henia Karana Ita Hahedinaraia” ese ita idia durua diba headava namona haginia, ruma bese lalonai idia vara hekwakwanai hanamoa dalana, bona iseda tauanina durua gaudia ita abia dalana dekenai Baibel ena hereva davaria bona badinaia daladia do ia hahedinaraia.
3 Satani ena tanobada ese dahaka be namo bona dahaka be dika ena lalohadai ia mogea, bona edena gaudia be mai anina bada bona edena be lasi dekenai daradara ia havaraia. (Isa. 5:20) Inai herevadia “Mauri Ena Anina Lasi Gaudia Dekenai Ita Naria Namonamo” bona “Dika Oi Dadaraia, Kara Namodia Oi Karaia” ese ita do idia hagoadaia Iehova ena taravatu hereadaedia ita badinaia totona.—Amo. 5:14.
4 Iehova ese hari ia noho tanobada dikana ia hadikaia ore neganai, Dirava ena hesiai taudia ese ia do idia abidadama henia momokani be namo. Pablik tok, “Tanobada Ena Hisihisi amo Ita Roho Mauri Negana be Kahirakahira” ese unai do ia hahedinaraia. Unai murinai, ita do idia noia inai hereva, “Do Oi Hegeregere Dirava Ena Basileia Oi Abia Totona, A?” amo sibona iseda kara ita tahua totona. Program be inai hagoadaia herevana, “Iehova Ena Gwauhamata Oi Abidadama Henidia” amo do idia hadokoa.
5 Namona be sekit hebouhebou ena program ibounai lalonai ita noho, unai amo iseda abidadama Iehova dekenai do ita hagoadaia.—Sal. 118:8, 9.