Baibel Gaukaralaia Namonamo

¹ Herevana edena buka eiava magasin ita ura hariharilaia haroro gaukara dekenai, to lalona veria siri ta ita abia hidi be namo do idia kamonai taudia ida ita herevalaia totona. (Heb. 4:​12) Oi hariharilaia buka eiava magasin ai idia gaukaralaia siri ta oi abia hidi, unai ese dala do ia kehoa unai buka eiava magasin oi hariharilaia totona. Gabu haida dekenai, pablisa haida idia davaria ta idia lao henia eiava ruma-ta-ruma-ta gaukara idia karaia neganai, Baibel be imana dekenai idia dogoatao karana ese namo ia havaraia.

² Baibel Siri ta amo Matamaia: Pablisa haida be edia hereva idia hamatamaia totona, siri ta amo auka lasi henanadai ta idia gwauraia, bena gabeai unai siri idia duahia. Unai amo maoromaoro ruma tauna ese Dirava ena Hereva ia laloa matamaia. Inai hamatamaia hereva haida be emu teritori dekenai namo ia havaraia diba, a?

◼ “Bema oi be mai emu siahu inai gaudia oi haidaua totona, do oi karaia, a?” Apokalupo 21:4 duahia.

◼ “Dahaka dainai ita be inai bamona metau momo negana lalonai ita noho?” Timoteo Iharuana 3:1-5 duahia.

◼ “Oi laloa iseda hanua be gabu namona ai do ia lao bema taunimanima ibounai ese inai sisiba idia badinaia, a?” Mataio 7:12 duahia.

◼ “Oi laloa emu natudia be iniseniai ia herevalaia noho namona do idia moalelaia diba, a?” Salamo 37:10, 11 duahia.

◼ “Oi laloa nega ta do ia mai bona inai hereva do ia guguru, a?” Isaia 33:24 duahia.

◼ “Inai siri ese gavamani haidaua karana dekenai ia gwauraia herevana oi diba, a?” Daniela 2:44 duahia.

◼ “Nega ta oi ura Dirava dekenai inai henanadai oi henia, a?” Iobu 21:7 duahia.

◼ “Iseda lalokau mase taudia do ita itaia lou diba, a?” Ioane 5:28, 29 duahia.

◼ “Mase taudia idia diba mauri taudia be dahaka idia karaia noho, a?” Hadibaia Tauna 9:5 duahia.

³ Gwauraia Hedinarai, Haheitalaia, Badinaia: Ta ia ura herevahereva neganai, oi haragaharaga lasi. Nega oi atoa oi duahia sirina oi gwauraia hedinarai, oi haheitalaia bona badinaia dalana oi herevalaia, unai amo ruma tauna do ia lalo-parara. (Neh. 8:8) Taunimanima be Dirava ena Hereva ese ia hadibaia gaudia idia lalo-pararalaia bona idia abia dae neganai, unai ese edia mauri ia haidaua diba.​—1 Tes. 2:​13.

⁴ Kamonai taudia edia ura oi habadaia lalonai, Baibel oi gaukaralaia namonamo noho. Lou henia oi karaia neganai, inai dala haida oi gaukaralaia diba: (1) Siri namona ta oi abia hidi. (2) Siri hegeregerena auka lasi henanadai ta oi henia. Bena siri oi duahia. (3) Unai siri oi gwauraia hedinarai, haheitalaia, bona badinaia dalana herevalaia. Nega ta ta oi vadivadi neganai, oi hekwarahi unai tauna ena diba Dirava ena Hereva dekenai oi habadaia totona. Daudau lasi oi be Baibel stadi ta oi karaia diba!

[Study Questions]

1. Haroro gaukara totona oi hegaegae neganai, dahaka oi karaia diba?

2. (a) Edena dala ai siri ta amo iseda hereva ita matamaia diba? (b) Emu teritori ai, edena hereva Baibel amo be taunimanima idia ura kamonai?

3. Edena dala ai taunimanima ita durua diba ita duahia Baibel sirina idia lalo-pararalaia totona?

4. Edena dala ai lou henia ita karaia neganai, Baibel ita gaukaralaia namonamo diba?