Emu Heduru be mai Anina Bada
1 “Ai ibounai totona umui karaia karadia dainai umui ai tanikiu henia. Unai ese ai ia hagoadaia bada.” Unai hereva ese ia hahedinaraia, ita be iseda elda bona hesiai taudia ita laloa bada. Dirava ena orea ia bada ia lao noho dainai, tanobada hegegemadai kongrigeisen ibounai kahirakahira 100,000 lalonai, nega ibounai lo tadikakadia idia tahua, maduna idia huaia totona. Bema oi be bapatiso tadikaka ta, emu heduru be mai anina bada.
2 Maduna “Tahua”: Edena dala ai oi ese hesiai maduna ma haida oi abia diba? (1 Tim. 3:1) Namona be emu mauri ibounai lalonai haheitalai namona oi hahedinaraia. (1 Tim. 4:12; Tito 2:6-8; 1 Pet. 5:3) Haroro gaukara oi goadalaia, bona ma haida oi hagoadaia unai bamona idia karaia totona. (2 Tim. 4:5) Mai momokani ida tadikaka edia namo oi tahua. (Roma 12:13) Dirava ena Hereva oi stadilaia namonamo, bona “hadibaia” gaukarana oi karaia goada. (Tito 1:9; 1 Tim. 4:13) Elda taudia ese idia henia gaukaradia oi karaia namonamo. (1 Tim. 3:10) Bema oi be ruma bese kwarana ta, emu ‘adavana bona emu natuna do oi biagua namonamo.’—1 Tim. 3:4, 5, 12.
3 Unai bamona maduna oi huaia be mai ena hekwarahi bona emu ura gaudia oi dadaraia be namo. (1 Tim. 5:17, Buka Helağa) Unai dainai, maduna oi tahua neganai, mai manau ida ma haida hesiai henia karana oi laloa bada. (Mat. 20:25-28; Ioa. 13:3-5, 12-17) Timoteo ia karaia karadia oi lalohadailaia, bona dala oi tahua ia oi tohotohoa totona. (Fili. 2:20-22) Timoteo bamona, emu kara namodia ese oi idia hanamoa be namo. (Kara 16:1, 2) Maduna ma haida huaia totona lauma ena huahua oi hahedinaraia bona oi idia durua sisiba idauidau oi badinaia neganai, taunimanima ese “oiemu goada do idia itaia, ia bada lao noho.”—1 Tim. 4:15.
4 Tama Sina E, Natudia Maragidia Hagoadaia Heduru Idia Henia Totona: Natudia be idia maragi neganai, heduru henia karana idia dibaia matamaia be namo. Idia umui hadibaia hebou gabudiai idia kamonai namonamo, idia haroro, bona Kingdom Hall ai bona sikuli gabuna ai haheitalai namona idia hahedinaraia totona. Idia umui hadibaia ma haida idia durua totona, hegeregere Kingdom Hall idia hagoevaia, burukadia idia durua, bona unai bamona gaudia idia karaia totona. Dala oi karaia, idia ese henia karana ena moale idia mamia totona. (Kara 20:35) Unai bamona hadibaia karana ese idia ia durua diba, gabeai idia be painia taudia, hesiai taudia bona elda taudia ai idia lao totona.