Hesiai Taudia Gaukara Badana Idia Karaia

APOSETOLO PAULO ese Filipi kongrigeisen ia tore henia neganai, ia gwau: “Ai Keriso ena hesiai taudia, Paulo bona Timoteo ese umui, Keriso Iesu ida umui hakapua helaga taudia, elda bona hesiai taudia Filipi dekenai, inai revareva ai torea.” (Fili. 1:1) Mani oi laloa hesiai taudia dekenai hanamoa hereva ia siaia danu. Unai negai, hesiai taudia be gaukara badana idia karaia kongrigeisen ena elda idia durudia totona. Hari inai negai danu be unai bamona. Hesiai taudia idia karaia gaukara momo ese elda taudia idia durua bona unai ese kongrigeisen naria gaukara ia durua danu.

² Oiemu kongrigeisen lalonai idia noho hesiai taudia oi diba, a? Oi bona kongrigeisen taudia ibounai durua totona idia karaia gaukara namodia oi diba, a? Unai bamona taudia edia gaukara be Iehova ese ia laloa bada. Aposetolo Paulo ese idia ia herevalaia neganai, ia gwau: “Badina dala maorona ai edia hesiai maduna idia huaia tatau be ladana namona idia abia noho bona mai gari lasi ida edia abidadama Keriso Iesu dekenai idia herevalaia.”​​—1 Tim. 3:13.

BAIBEL ENA HAHEGANI HESIAI TAUDIA TOTONA

³ Hesiai taudia ese edia mauri lalonai Keristani mauri dalana idia badinaia be namo, unai amo maduna idia huaia diba, bona edia gaukara idia karaia namonamo diba. Unai be ia hedinarai goevagoeva bema Paulo ese Timoteo dekenai hesiai taudia ese do idia badinaia hahegani ita laloa neganai, ia gwau: “Namona be hesiai taudia danu be idia laloa namonamo, idia koikoi lasi, wain momo idia inua lasi, moni idia ura henia dikadika lasi bona sibodia edia namo idia tahua lasi, bona abidadama ena hunia hereva helagana be mai lalomamina goevana ida idia dogoatao. Danu, namona be idia umui tohoa guna bema idia hegeregere hesiai maduna idia abia totona, badina haida ese idia dekenai kerere ta idia davaria lasi. Namona be hesiai taudia edia adavana be tamona, bona dala maorona ai edia natudia bona edia ruma bese idia naria.” (1 Tim. 3:8-10, 12) Bema maduna do idia abia taudia ese Baibel ena hahegani hesiai taudia totona idia badinaia, ta be kongrigeisen do ia maumauraia lasi.

⁴ Herevana hesiai taudia idia matamata eiava idia buruka, to hua ta ta idia haroro be namo. Iesu hegeregerena haroro gaukara idia goadalaia. Mai edia ura bada ida unai gaukara idia karaia dainai, idia hahedinaraia Iehova ia ura taunimanima ibounai do ia hamauria.​​—Isa. 9:7

⁵ Danu hesiai taudia be edia dabua, toana, hereva, lalohadai, bona kara dekenai haheitalai namona idia hahedinaraia be namo. Idia laloa maoromaoro dainai, haida ese do idia matauraia. Danu, idia ese edia hetura karana Iehova ida bona edia hesiai gaukara kongrigeisen lalonai idia laloa bada.​​—Tito 2:2, 6-8.

⁶ Unai tatau be ‘idia tohoa guna bema idia hegeregere’ eiava lasi. Unai maduna idia do abia lasi neganai, idia hahaedinaraia vadaeni idia be edia maduna idia huaia namonamo taudia. Idia hahedinaraia edia mauri lalonai Basileia idia atoa guna bona mai edia ura ida hesiai gaukara ma haida idia ura karaia. Momokani, idia be haheitalai namona kongrigeisen taudia ma haida ese idia tohotohoa totona.​​—1 Tim. 3:10.

EDIA GAUKARA DALANA

⁷ Hesiai taudia be edia tadikaka bona taihu durua totona gaukara namodia momo idia karaia, unai amo nega bada ia noho elda taudia be hadibaia bona mamoe naria gaukara idia karaia diba. Elda ese hesiai taudia dekenai gaukara idia ura henia neganai, idia ta ta edia diba bona kongrigeisen ena dabu hegeregerena idia karaia.

⁸ Edia gaukara haida mani ita laloa: Reana hesiai tauna ta be kongrigeisen ena litrisa ia naria, unai amo ita sibona bona haroro totona litrisa ita abia diba. Haida be kongrigeisen ena akaun o teritori ena rekodi idia naria. Ma haida maikrofon idia loalaia, saun kohudia idia naria, atendan gaukara idia karaia bona dala ma haida ai elda taudia idia durua. Kingdom Hall ena toana ia namo bona ia goeva noho totona gaukara bada ia noho, unai dainai nega momo elda taudia ese hesiai taudia idia noia unai gaukara idia naria totona.

⁹ Kongrigeisen haida ai reana hesiai taudia be momo dainai, idia ta ta be unai gaukara ta ta idia naria. To ma kongrigeisen haida dekenai, hesiai tauna tamona ese gaukara idauidau ia naria. Nega haida, hesiai taudia haida ese gaukara tamona idia naria. Bema hesiai taudia be momo lasi unai gaukara idia karaia totona, reana elda oreana ese edia haheitalai be namo bapatiso tadikaka haida idia gaukaralaia diba. Unai amo unai gaukara do idia manadalaia bona gabeai hesiai taudia ai idia lao neganai, gaukara idia karaia diba. Eiava bema tadikaka be lasi, edia haheitalai be namo taihu haida idia noia gaukara haida dekenai heduru idia henia totona, ena be idia be hesiai taudia ai do idia lao lasi.

¹⁰ Elda be momo lasi kongrigeisen dekenai, idia hegeregere hesiai taudia idia gaukaralaia diba, bapatiso idia ura abia taudia danu Baibel ena hahediba herevadia edia henanadai do idia riviulaia totona. Unai be Apedix “Kahana 1: Keristani Hahediba Herevadia” dekenai ia noho. To, “Kahana 2: Keristani Mauri” be ta ta sibona ese idia karaia gaudia do idia herevalaia dainai, elda ta ese unai kahana ia naria be namo.

¹¹ Nega ta ta ai, reana badina haida dainai, elda oreana ese hesiai tauna ta ena gaukara idia haidaua bona hesiai tauna ma ta idia henia. To, tadikaka ese nega daudau lalonai gaukara ta ia karaia be namo, unai amo unai gaukara do ia diba namonamo.

¹² Kongrigeisen ena namo totona, maduna haida be idia hegeregere hesiai taudia dekenai idia henia be namo, unai taudia edia goada be “taunimanima ibounai do idia itaia” diba. (1 Tim. 4:15) Bema elda be momo lasi, hesiai tauna ta be grup naria tauna ena durua tauna ai ia lao diba, o nega haida, grup naria tauna ai ia lao diba to elda edia hakaua henunai unai gaukara do ia karaia. Hesiai taudia be Iseda Haroro bona Mauri Dalana ena hebou dekenai kahana haida idia henia diba, bona bema idia hegeregere Kongrigeisen Baibel Stadi idia hakaua diba bona pablik tok idia henia diba. Elda taudia be kongrigeisen ese heduru ma haida idia abia totona, maduna ma haida be hesiai taudia idia henia diba, bema idia hegeregere unai gaukara idia karaia totona. (1 Pet. 4:10) Elda taudia idia durua neganai, namona be mai edia ura ida unai gaukara idia karaia.

¹³ Ena be edia gaukara be elda taudia edia amo ia idau, to unai be Dirava dekenai hesiai gaukara helagana, bona kongrigeisen ena heau dalana ia durua bada. Gabeai, bema hesiai taudia ese edia maduna idia huaia namonamo bona idia hegeregere mamoe naria gaukara bona hadibaia gaukarana idia karaia, reana idia gwauraia hidi diba elda maduna idia huaia totona.

¹⁴ Bema oi be tadikaka matamata ta o vanegai sibona oi bapatiso, oi gaukara goada noho hesiai tauna ena maduna oi abia totona, a? (1 Tim. 3:1) Lagani ta ta ai kamonai taudia momo be hereva momokani lalonai idia vareai dainai, kongrigeisen lalonai tadikaka goadadia ese maduna idauidau idia huaia be namo. Unai oi karaia diba be ma haida durua urana oi hahedinaraia. Unai oi karaia diba dalana ta be Iesu ena haheitalai namona oi laloa dobu. (Mat. 20:28; Ioa. 4:6, 7; 13:4, 5) Henia karana ena moale oi mamia neganai, haida hesiai henia urana do ia habadaia. (Kara 20:35) Unai dainai, ma haida durua totona oi volantia, Kingdom Hall hanamoa gaukarana oi durua, o Iseda Haroro bona Mauri Dalana ena hebou dekenai oi volantia. Danu, hesia tauna ena maduna oi huaia totona, Keristani kara namodia oi hahedinaraia be namo, unai be hanaihanai sibona emu stadi oi karaia karana amo do ia vara. (Sal. 1:1, 2; Gal. 5:22, 23) Danu, ia ura hesiai tauna ena maduna ia abia tauna be kongrigeisen ai gaukara ia abia neganai, ita diba momokani do ia karaia bona do ita abidadama henia diba.​​—1 Kor. 4:2.

¹⁵ Hesia taudia be Dirava ena lauma helaga amo ia abia hidi kongrigeisen idia durua totona. Kongrigeisen taudia ese hesiai taudia edia gaukara goada karana idia laloa bada totona, edia maduna idia huaia neganai idia danu idia gaukara hebou be namo. Unai amo, kongrigeisen taudia be Iehova ese ena orea ia naria namonamo totona ia henia taudia idia laloa bada.​​—Gal. 6:10.