Laga-Ani Karadia Atoa Edia Gabu Korikori Ai
1 Hari inai nega aukana lalonai, ita ibounai be nega ta ta ita ura gau idauna ta ita karaia. Moale karadia ita karaia be maoro. To, ta be ena nega bada herea be laga-ani, moale, bona hebamo karadia dekenai ia haorea neganai, unai ese ia do ia hamanokaia bona lauma gaudia dekenai nega bada do ia henia lasi. Laga-ani karadia be edia gabu korikori ai ita atoa be namo. (Mat. 5:3) Edena bamona unai ita karaia diba? Efeso 5:15-17 ena sisiba ita badinaia amo.
2 Hetoa Haida Atoa: Paulo ia gwau namona be Keristani taudia idia “naria namonamo,” aonega taudia bamona idia noho. Iseda nega laga-ani karadia dekenai ita naria totona ita laloa maoromaoro bona tauanina ena ura ita biagua be gau badana. Iseda laga-ani negadia ita gaukaralaia dalana ita laloa namonamo be namo. Moale karadia ese namo ia havaraia be namo, namo lasi ita laloa iseda nega ita haorea kava eiava unai kara dainai ita hesiku bada. Bema moale karana ta ia ore murinai ita mamia unai be anina lasi, ita moale lasi, bona iseda mamina ia dika danu, unai ese ia hahedinaraia iseda nega gaukaralaia dalana ita haidaua be namo.
3 Oi Laloa-Maoromaoro: Paulo ena sisiba be ‘nega ita haorea kava lasi’ to mauri lalonai mai anina bada gaudia totona ita gaukaralaia, ita “kavakava lasi.” Idia gwauhamata Keristani taudia be edia mauri lalonai laga-ani karadia idia atoa guna be namo lasi. Ena be laga-ani bona moale karadia ese iseda tauanina ia hagoadaia lou diba, to lauma goadana ia henia gauna be Dirava ena lauma helaga. (Isa. 40:29-31) Unai lauma helaga be tiokratik karadia—Baibel stadilaia karana, kongregesen heboudia lao henia karana, haroro gaukara—amo ita abia, moale karadia amo lasi.
4 Atoa Guna Gaudia Abia Hidi: Paulo ese Keristani taudia ia hamaorodia “Lohiabada ena ura gaudia sibona do [idia] tahua.” Iesu ia gwau iseda mauri lalonai namona be iseda kara iboudiai lalonai Dirava ena Basileia ita atoa guna. (Mat. 6:33) Gau badana be iseda gwauhamata Iehova dekenai ita hagugurua karadia ita karaia guna. Bena gabeai, laga-ani karadia be edia gabu korikori ai do ita atoa. Unai ita karaia neganai, unai ese anina namona do ia havaraia, bona do ita moalelaia momokani.—Had. 5:12.