Iseda Haroro Gaukara ese Ia Hagugurua Gaudia
1 Baibel ese ia hahedinaraia, Iehova ese ena Keristani hesiai taudia be edia hesiai gaukara lalonai ia hakaudia noho. (2 Kor. 2:14-16) Dirava ena diba be taunimanima dekenai ita gwauraia neganai, iseda hesiai gaukara Iehova dekenai be bonana namona muramura bamona, bona iena lalona ia hamoalea. Taunimanima haida ese sivarai namona idia abia dae, to ma haida ese idia dadaraia. Ena be taunimanima momo idia kamonai lasi, to iseda hesiai gaukara lalonai anina namodia momo ita havaraia. Iseda haroro gaukara ese ia hagugurua gaudia haida mani ita laloa.
2 Iehova Hanamoa: Satani ia gwau taunimanima be sibodia edia namo totona Iehova idia hesiai henia. (Iobu 1:9-11) Keristani haroro gaukara amo ita hahedinaraia diba ita be mai momokani ida Dirava ita badinaia. Herevana pablisa momo edia noho dalana be ia auka, eiava taunimanima momo ese iseda gaukara idia laloa bada lasi, to idia haroro bona taunimanima be hahediba taudia ai idia halaoa noho. Unai bamona haheauka karana ese Iehova ena kudouna ia hamoalea!—Aon. 27:11.
3 Ma danu, iseda haroro gaukara amo Dirava ena ura ita hagugurua. Satani ena tanobada idia hadikaia ore neganai, Iehova ia gwau: “Vadaeni bese idauidau do idia diba lau Lohiabada.” (Ese. 39:7) Bese idauidau ese unai idia diba totona, gau badana be Dirava ena hesiai taudia ese ena ladana bona ena ura be ‘bese ibounai, iduhu ibounai, bona gado idauidau taudia’ dekenai idia gwauraia hedinarai noho.—Apok. 14:6, 7.
4 Hahemaoro Gaukarana Ta: Sivarai namona harorolaia gaukarana be hahemaoro gaukarana ta bamona. Aposetolo Paulo ia gwau Keriso Iesu ese “Sivarai Namona idia abia dae lasi taudia dekenai davana metau do ia henidia.” (2 Tes. 1:8, 9) Taunimanima ese sivarai namona idia abia dae eiava lasi, unai hegeregerena hahemaoro do idia abia. Oibe, Dirava ena hesiai taudia be mai edia gaukara badana. Rara dekenai ita kerere lasi totona, namona be taunimanima do ia hamauria Basileia ena sivarai namona ita gwauraia hedinarai.—Kara 20:26, 27.
5 Ita hekwarahi noho iseda dekena taudia ita durua Dirava ena lalonamo idia abia totona, unai amo ita ese Iehova ena hebogahisi ita hahedinaraia. (1 Tim. 2:3, 4) Taunimanima edia mauri be hanaihanai ia idau dainai, idia dekenai ita giroa loulou bona ita hagoadadia, nega ia do noho lalonai Iehova idia tahua be namo. Unai bamona ita karaia neganai, “Dirava ena bogahisihisi” ita hahedinaraia. “Ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.”—Luka 1:78; 2 Pet. 3:9.
6 Ita Ia Durua Dalana: Iehova ena hesiai gaukara lalonai ita bisi noho karana ese ita do ia gimaia. Ita ia durua ‘Dirava ena dina ita naria noho,’ bona inai tanobada dikana ena kara mirodia lalonai ita vareai lasi totona. (2 Pet. 3:11-14; Tito 2:11, 12) Unai dainai, namona be ‘do ita gini goada, do ita marere lasi. Nega ibounai Lohiabada ena gaukara do ita karaia goadagoada,’ badina Keristani hesiai gaukara lalonai ita be ita hekwarahi kava lasi.—1 Kor. 15:58.
[Study Questions]
1. Iehova ese iseda hesiai gaukara be edena bamona ia laloa, bona taunimanima ese sivarai namona idia abia dae eiava?
2. Iseda haroro gaukara amo dahaka ita hahedinaraia diba?
3. Dahaka dainai Dirava ena ladana bona ena ura ita gwauraia noho be gau badana?
4. Edena bamona haroro gaukara amo taunimanima be hahemaoro do idia abia?
5. Iseda haroro gaukara lalonai, edena dala ai Dirava ena hebogahisi ita hahedinaraia?
6. Iehova ena hesiai gaukara lalonai ita bisi noho karana ese edena bamona ita ia durua?