Hadibaia Karana ese Mauri Dalana Dekenai Ita Ia Hakaua
1 Taunimanima ese Baibel amo hereva momokani idia lalopararalaia bona edia moale ita itaia neganai, ita moale bada! Dirava ena diba bona ena ura be ma haida dekenai ita herevalaia be moale gauna. Unai hadibaia karana dainai ta be mauri hanaihanai ia abia diba.—Ioa. 17:3.
2 Hadibaia Karana Hereadaena: Hari inai negai, taunimanima be dala bona gau idauidau amo diba idia abia. (Had. 12:12) To unai bamona diba ena namo ese “Dirava ena hoa gaudia” ia hereaia diba lasi. (Kara 2:11) Tanobada ena hadibaia karana ese taunimanima ia durua Dirava kahirakahira idia lao bona ena ura idia dibaia totona, a? Eiava mase murinai dahaka ia vara bona hisihisi momo idia vara ena badina, be taunimanima dekenai ia hadibaia, a? Taunimanima dekenai helaro ia henia, a? Ruma bese maurina ia hanamoa, a? Lasi. Dirava ena hadibaia karana sibona amo mai anina bada henanadai badadia edia haere ita davaria diba.
3 Dirava ena hadibaia karana ese kara maoromaoro taravatudia ia henia, to inai tanobada be unai ia henia lasi. Baibel ena hahediba herevadia idia abia dae bona badinaia taudia ese edia kudouna amo bese, kopi, bona iduhu idauidau inai henia bona abia isi karana idia kokia. (Heb. 4:12) Baibel ese taunimanima ia durua dagedage karadia idauidau idia rakatania bona “mauri matamata” idia atoa. (Kol. 3:9-11; Mika 4:1-3) Ma danu, Dirava ena hadibaia karana ese taunimanima milioni momo ia durua Dirava ia ura lasi karadia idia dadaraia totona.—1 Kor. 6:9-11.
4 Mai Anina Bada Hari Inai Negai: Iseda Hadibaia Tauna Badana ese iseda nega lalonai idia vara gaudia be ita dekenai ia hadibaia. Taunimanima ibounai ese Dirava ena hahemaoro herevadia idia diba be namo. (Apok. 14:6, 7) Keriso be guba dekenai ia lohia noho, daudau lasi tomadiho koikoi ibounai be dika bada do ia abia, bona Dirava ena Basileia ese gavamani ibounai do ia hadikaia ore. (Dan. 2:44; Apok. 11:15; 17:16) Unai dainai, taunimanima ese Dirava ena King idia dibaia, Babulonia Badana amo idia raka siri, bona mai abidadama ida Iehova ena ladana dekenai idia noinoi be mai anina bada. (Sal. 2:11, 12; Roma 10:13; Apok. 18:4) Namona be ita gaukara goada ma haida ita hadibaia mauri dalana dekenai idia raka totona.