Medikol Heduru Dalana Badana ta Ia Hahedinaraia Vidio
Loea bona doketa taudia be gorere taudia edia maoro idia laloa bada. Unai dainai, gorere taudia durua daladia matamatadia idia karaia bona Iehova ena Witnes taudia be unai dala amo namo idia abia diba. (Kara 15:28, 29) Unai be vidio ladana Transfusion-Alternative Health Care—Meeting Patient Needs and Rights ese do ia hahedinaraia. Vidio itaia, bena umui dibaia gauna umui riviulaia.
(1) Dahaka dainai doketa haida be rara henia hanai karana idia tahua lou? (2) Doketa ese idia karaia rara lasi opereisen badadia toi edia ladana oi gwauraia. (3) Tanobada hegegemadai, doketa hida be idia ura dikadika gorere taudia dekenai rara lasi opereisen idia karaia? Dahaka dainai idia ura unai bamona idia karaia? (4) Vanegai hospital ai tahua gaukaradia idia karaia neganai, rara gaukaralaia karana be edena bamona idia herevalaia? (5) Rara henia hanai karana ena dika idauidau be dahaka? (6) Diba bada taudia momo ese rara lasi opereisen idauidau edia namo be edena bamona idia herevalaia? (7) Dahaka ese anemia gorerena ia havaraia? Tau ta be rara hida ia haboioa diba to ia mase lasi? Edena dala ai idia halusia rarana idia habadaia lou diba? (8) Edena dala ai gorere tauna ena tauanina lalonai sel kakakakadia idia habadaia lou diba? (9) Opereisen lalonai, doketa be edena dala idia gaukaralaia rara bada herea idia halusia lasi totona? (10) Natudia maragidia eiava dika bada idia davaria taudia ese rara lasi opereisen idia abia diba, a? (11) Doketa ese medikol heduru namona idia henia totona, idia badinaia hakaua hereva badana ta be dahaka? (12) Dahaka dainai nega bada lalonai Keristani taudia ese rara lasi medikol heduru daladia idia abia hidi guna be gau badana? Edena bamona unai ita karaia diba?
Vidio lalonai idia hahedinaraia medikol heduru daladia be Keristani ta ta sibona ese do ia abia hidi. Oi bona emu natudia totona, edena rara lasi opereisen do oi abia hidi? Oi abia hidi dalana bona ena badina be emu Witnes lasi ruma bese taudia dekenai oi hadibaia namonamo be namo.—July 1, 2004 bona October 15, 2000, edia Gima Kohorona dekenai, “Duahia Taudia Edia Henanadai” itaia.