Baibel Stiuden Durua Iehova Ena Kara Ia Laloa Bada Totona
1 Iseda haroro bona hahediba gaukarana dekenai, ita be ma haida dekenai Baibel ena hereva momokani ita hadibaia sibona lasi. To, taunimanima ita durua Iehova idia dibaia namonamo bona iena kara idia laloa bada totona. Kudou-maoro taudia ese Dirava idia dibaia neganai, unai ese edia lalona ia veria edia mauri idia haidaua totona, unai amo ‘Lohiabada ena ura hegeregerena do idia noho, bona nega ibounai ia do idia hamoalea.’—Kol. 1:9, 10; 3:9, 10.
2 Baibel Stadi Buka Matamatana: Baibel Hadibaia bukana ena hamatamaia kahana ese Iehova ena kara idauidau ia herevalaia. Karoa ginigunana ese inai henanadai ia haerelaia: Dirava ese oi ia laloa, eiava?, Dirava ena kara be edena bamona?, bona Dirava kahirakahira oi lao diba, a? Unai karoa ese danu ia hahedinaraia Iehova be helaga (par. 10), kara maoromaoro bona taunimanima ia laloa bada (par. 11), lalokau (par. 13), siahu (par. 16), hebogahisi bona hariharibada, kara dika ia gwauatao, ia haheauka, bona badinaia karana ia hahedinaraia (par. 19). Paragraf 20 ena dokona kahana be inai bamona ia gwau: “Iehova oi dibaia namonamo neganai, do oi diba ia noho momokani bona unai badina dainai ia do oi lalokau henia bona ia kahirakahira do oi lao.”
3 Edena dala ai Baibel Hadibaia bukana ita gaukaralaia diba, Baibel stiuden taudia ita durudia Iehova kahirakahira idia lao totona? Dirava ena kara ta ia hahedinaraia paragraf ita herevalaia murinai, stiuden tauna ita nanadaia, “Iehova ena kara dekenai dahaka oi laloa?” eiava “Unai ese edena bamona ia hahedinaraia Iehova be oi ia laloa bada?” Stiuden tauna dekenai unai bamona henanadai ita gaukaralaia neganai, idia ita hadibaia idia dibaia gaudia idia laloa dobu, bona unai ese idia do ia durua Iehova ena kara hereadaedia idia laloa bada totona.
4 Riviu Mauana Gaukaralaia: Karoa ta ta edia dokonai, stiuden tauna oi noia “Baibel Ia Hadibaia Gaudia” ena maua amo point badadia be sibona ena hereva amo ia gwauraia. Namona be idia gwauraia siridia ia herevalaia danu. Stiuden tauna ese ia laloa bada gaudia ita diba totona, reana inai bamona ita nanadaia, “Baibel ese inai point ia herevalaia dalana be edena bamona oi laloa?” Unai bamona oi karaia neganai, unai karoa ena point badadia oi hahedinaraia sibona lasi, to stiuden ena lalohadai oi dibaia. Unai ese stiuden tauna do ia durua Iehova ia tura henia matamaia totona.