Ma Haida Laloa Bada—Taunimanima Idauidau Haroro Henia
1 Matahanai ta lalonai, aposetolo Ioane ese aneru ta ia itaia guba ena atai amo ia roho lao bona noho hanaihanai sivarai namona be “bese ibounai, iduhu ibounai, gado ibounai bona kopina idauidau taudia ibounai” dekenai ia gwauraia hedinarai. (Apok. 14:6) Ita be unai aneru bamona taunimanima idauidau ita haroro henidia, a? Ena be ita laloparara lasi, to iseda kara bona lalohadai amo ma haida ita lalodika henia diba. Unai bamona lalohadai dainai reana taunimanima haida dekenai sivarai namona do ita harorolaia lasi. Unai dainai, taunimanima idauidau ita haroro henidia neganai, namona be mai lalokau danu ma haida edia namo ita tahua.
2 Emu Teritori Laloa: Emu teritori ai idau tano taudia idia noho, a? Reana idia do ita laloa bada lasi badina idia be sekuriti ese idia gimaia rumadia dekenai idia noho. Unai dainai, namona be ita hekwarahi ita hedavari henidia, ita hanamodia, bona idia ita dibaia namonamo totona. Namona be edia dabu gaudia, idia laloa bada gaudia, idia ura bona ura lasi gaudia, bona idia lalohekwarahilaia gaudia ita dibaia. Namona be oi hekwarahi edia noho dalana hegeregerena Basileia ena sivarai oi harorolaia totona. (1 Kor. 9:19-23) Bouti dekenai idia gaukara idau tano taudia edia sisima be nega momo iseda wof dekenai idia ginidae. Dahaka ita karaia diba unai bamona taudia ita haroro henidia totona? Aposetolo Paulo hegeregerena, namona be iseda teritori ai idia noho taudia ibounai dekenai sivarai namona ita harorolaia, herevana idia be idau tano taudia, mauri dala idauna idia noholaia, gado ma ta idia herevalaia, eiava taga taudia.—Roma 1:14.
3 Edena dala ai gado ma ta ia herevalaia tauna oi haroro henia diba? Gado ma ta idia herevalaia taudia dekenai Good News for People of All Nations buklet oi gaukaralaia diba. Reana emu teritori ai oi davaria taudia dekenai edia gado ai idia noho pepapepa eiava buklet haida oi abia lao. Danu, pablisa haida be gado ma haida dekenai hanamoa hereva bona auka lasi hamatamaia herevana idia dibaia. Ena be edia gado dekenai gau momo oi gwauraia lasi, to unai ese edia lalona ia veria diba sivarai namona idia kamonai totona.
4 Iehova Tohotohoa: Taunimanima idauidau ita haroro henidia neganai, ita be toana ia laloa lasi bona “ia ura taunimanima ibounai ese mauri do idia davaria, bona hereva momokani do idia diba” Diravana, Iehova, ita tohotohoa unai.—1 Tim. 2:3, 4.