KERISTANI TAUDIA EDIA MAURI DALANA
Teritori ai Gado Idauidau Taudia Ibounai Haroro Henidia
Taunimanima edia gado korikori ai Basileia sivaraina oi harorolaia neganai, do idia kamonai. Unai dainai Pentekoste 33 C.E. ai, Iehova ese dala ia karaia “Iuda taudia . . . idia be Dirava gari henia taudia, bona tanobada ena gabu idauidau amo idia mai,” sivarai namona be ‘edia gado’ ai idia kamonai totona, herevana idia gaukaralaia gado be Heberu o Greek gado. (Ka 2:5, 8) Hari, gado idauidau teritori ai, kongrigeisen momo be gado idauidau ai edia hebou idia abia bona reana unai teritori tamona ai idia haroro danu. Kongrigeisen rua be unai teritori tamona idia karaia loulou neganai, unai ese ruma taudia ia habadua diba. To, edena dala ai, unai bamona kongrigeisen idia gaukara hebou diba?
Herevahereva (Ao 15:22): Namona be idau gado kongrigeisen edia haroro naria taudia idia herevahereva bona dala namona ta idia tahua unai amo kongrigeisen taudia ibounai be sivarai namona idia harorolaia diba. Bema idau gado kongrigeisen edia teritori be bada lasi, unai kongrigeisen be edia teritori ai idia noho idau gado taudia do idia haroro henidia lasi. To bema teritori badana ai edia gado ai idia hereva taudia edia ruma be gabu idauidau ai idia noho bona ia auka unai teritori idia hagugurua totona, vadaeni namona be idau gado taudia idia haroro henidia danu, bema idia ta ia kamonai, unai gado ena kongrigeisen idia hadibaia be namo. (od rau 104-106) Eiava emu kongrigeisen amo heduru do idia tahua, unai amo edia gado ai idia hereva taudia umui tahua totona, bona edia adres be unai gado kongrigeisen ena haroro naria tauna dekenai umui siaia diba. (km 7/12 5, maua) Laloatao, nega haida unai ruma tamona lalonai, gado momo idia gaukaralaia. To, bema teritori ta ai, ita ura ruma tauna ena infomeisen ita abia, ta ena infomeisen gimaia taravatuna ita badinaia be namo.
Gaukara Hebou (Ef 4:16): Namona be emu haroro naria tauna amo oi abia hakaua herevadia oi badinaia namonamo. Oi stadi henia tauna be emu kongrigeisen ese ia gaukaralaia gado ia diba lasi, a? Unai stiuden tauna ia goada haraga diba bema iena gado kongrigeisen o grup ai, ta oi noia ia do ia stadi henia totona.
Hegaegae (Ao 15:28; 16:1): Bema emu teritori ai ruma tauna be idau gado tauna, namona be oi hekwarahi ena gado ai ia dekenai sivarai namona oi harorolaia totona. Dala ta be oi hegaegae, emu teritori ai idia noho taudia edia gado oi dibaia totona, bona gado idauidau Baibel bona vidio haida be emu fon ai oi daonloud diba. Danu, JW Language app oi gaukaralaia diba gado haida edia hanamoa herevadia oi dibaia totona.