Ma Haida Ita Durua Dirava Ena Turana ai Idia Lao Totona
1 Hari, Iehova ese ena dala be bese ibounai dekenai ia hadibaia. (Isa. 2:2, 3) To unai bese taudia idia hesiku lasi bona huahua namona idia havaraia totona, Iehova idia lalokau henia be namo. (Luka 8:15; Mar. 12:30) Bema Iehova idia lalokau henia lasi, edia goada do ia hegeregere lasi tanobada ena ura dikadia idia dadaraia eiava kara maorona idia badinaia totona. Namona be ma haida ita durua Iehova ena kara namodia idia laloa bada totona, unai amo idia be Iehova ena turana ai idia lao diba. Idia ita hagoadaia Iehova Kahirakahira Oi Lao bukana idia stadilaia totona.
2 Emu Haheitalai: Emu kara amo Baibel stiuden tauna ena kudouna oi hamarerea diba. Bema idia itaia oi be Iehova tura henia karana oi laloa bada bona edena bamona unai ese emu mauri ia haidaua, unai ese edia lalona ia veria diba Iehova ena turana ai idia lao totona. (Luka 6:40) Momokani, nega momo ma haida be eda hereva lasi to eda haheitalai dainai edia mauri idia haidaua.
3 Tama sina ese edia kara amo edia natuna idia hadibaia, Iehova idia lalokau henia be namo. (Deu. 6:4-9) Tadikaka ta bona ena adavana idia ura bada edia natudia be hereva momokani lalonai idia tubu daekau dainai, famili naria karana dekenai idia kwalimu tama sina haida edia heduru idia tahua. Tadikaka ia gwau, “Lau hereva henia taudia momo idia gwau, tama sina edia haheitalai be gau badana.” Oibe, tama sina edia mauri ibounai o haheitalai amo edia natudia idia durua, “Dirava ena turana” ai ita lao karana idia lalopararalaia totona.—Iam. 2:23.
4 Guriguri: Danu, ma haida oi durua Iehova ena turana ai idia lao totona, namona be idia oi hadibaia Iehova idia guriguri henia totona. Reana Iesu ese ororo ai ia gwauraia guriguri dalana eiava Baibel ese ia herevalaia taudia momo edia guriguri oi kikilaia diba. (Mat. 6:9, 10) Ma danu oi sibona oi gwauraia gurigurina amo emu natudia bona Baibel stiuden oi hadibaia, edena bamona Iehova idia guriguri henia totona. Bema emu guriguri idia kamonai, idia be emu hemami Iehova dekenai idia mamia danu. Hahetoho ia vara neganai, idia oi hagoadaia ‘guriguri do idia goadalaia nega ibounai.’ (Roma 12:12) Nega dikadia ai Iehova ena heduru idia mamia neganai, unai ese idia ia doria Iehova idia tura henia, idia abidadama henia, bona lalokau henia totona.—Sal. 34:8; Fili. 4:6, 7.