Gaukara Totona Ita Volantia ese Hahenamo Ia Mailaia
1 Goliata ese Israela ena tuari oreana ia hevasehalaia neganai, tuari taudia ta ese Goliata ia heai henia be namo. To lasi, tuari ia diba lasi mamoe naria merona ia volantia Goliata ia heai henia totona. (1 Sam. 17:32) Babulonia amo Iuda taudia be Ierusalema dekenai idia giroa lou neganai, magu idia haginia lasi, to Parasa ena King ena kapusi naria tauna ese ena gaukara namona ia rakatania bona ia volantia Ierusalema dekenai ia lao, magu haginia gaukara ia naria totona. (Neh. 2:5) Unai tau rua, Davida bona Nehemia be idia volantia dainai, Iehova ese ia hanamodia.—1 Sam. 17:45, 50; Neh. 6:15, 16.
2 Hari inai negai, taunimanima momo be gaukara ta karaia totona idia volantia lasi. Inai “nega dokona” ai, taunimanima be idia bisi bada herea bona momo be ‘edia ura sibona idia tahua.’ (2 Tim. 3:1, 2) Tau ta be sibona ena ura gaudia ia laloa bada dainai, ma haida durua totona be auka. To, ita be Keristani taudia dainai, ita ura Iesu ita tohotohoa. Ia be sibona ia henia ma haida ia durua totona. (Ioa. 5:5-9; 13:12-15; 1 Pet. 2:21) Edena dala ai ita volantia diba, bona dahaka hahenamo do ita davaria?
3 Iseda Tadikaka Totona: Hebou ai henanadai bona haere kahana dekenai, namona be haere ita henia karana amo ma haida ita hagoadaia. (Roma 1:11) Haere ita henia neganai Iehova ita hanamoa, iseda lalona bona kudouna dekenai ia noho hereva momokani ita hagoadaia bona hebou do ita moalelaia. (Sal. 26:12) Tiokratik Haroro Sikuli dekenai stiuden ta ia mai lasi neganai, volantia tok ita henia diba. Unai ese ita do ia durua iseda hahediba dalana ita hanamoa totona.
4 Tadikaka be idia volantia diba kongrigeisen lalonai maduna idauidau idia huaia totona. (Isa. 32:2; 1 Tim. 3:1) Hebouhebou ia heau namonamo totona, namona be ita ibounai ita volantia bona dipatmen idauidau ita durua. Sekit naria tauna ida ita haroro hebou eiava ena aniani ita hegaegaelaia totona ita volantia neganai, ita ese ta ta ita hagoadaia heheni. (Roma 1:12) Kongrigeisen lalonai ihareha, vabu, gorere taudia bona sina mai edia natudia maragidia be mai iseda ura ida ita durudia neganai, ita moale bona Iehova ese ita ia lalonamo henia danu.—Aon. 19:17; Kara 20:35.
5 Iseda nega bona goada ita henia dalana ma ta be, Kingdom Hall hagoevaia bona hanamoa gaukara ita durua. Nega haida Kingdom Hall haginia totona volantia taudia idia tahua. Tano ta dekenai, headava tau bona hahine ta be ruma haginia dalana idia diba lasi, to idia volantia Rijinol Haginia Komiti idia durua totona. Nega sisina lalonai, idia ruaosi be treinini idia abia bona biriki atoa gaukarana idia karaia. Taihu ia gwau: “Tadikaka bona taihu ma haida ida ai gaukara hebou dainai, ai hetura namo herea. Dina ena dokona ai, emai tauanina ia hesiku bada, to emai abidadama be ia goada.” Iseda tano ai, Kingdom Hall haginia gaukara totona durua taudia idia tahua neganai, oi be do oi volantia, a?
6 Haroro Gaukara: Hari, ita volantia diba mai anina bada Basileia sivaraina harorolaia gaukarana ita karaia totona. Taunimanima be Baibel ena sisiba idia lalopararalaia bona idia badinaia neganai, edia mauri be mai ena anina bona idia ia durua kara dika idia rakatania totona. Nega vaira totona Baibel ena helaro namona idia dibaia. Ita volantia bona taunimanima dekenai Baibel ena hereva ita hadibaia neganai, ita be mai moale ida kamonai taudia ita durua, noho hanaihanai hahenamo do idia abia totona. (Ioa. 17:3; 1 Tim. 4: 16) Reana, ita hegeregere haroro gaukara ita habadaia totona, heduru painia o regula painia gaukara ita karaia, haroro taudia be momo lasi gabuna dekenai ita lao eiava gado idauna ta ita dibaia diba.
7 King Davida ia peroveta ia gwau, Mesia ena lohia negana ia hamatamaia neganai, taunimanima be “mai edia ura” ida sibona do idia henia Dirava ena gaukara idia karaia totona. (Sal. 110:3) Inai nega dokona ai, Iehova be taunimanima haboua gaukarana ia haharagaia noho bona gaukara be ia bada dainai, ita volantia be namo. (Isa. 60:22) Oi gwau vadaeni: “Lau be inai, do lau lao! Lau do oi siaia!” a? (Isa. 6:8) Momokani, ita volantia neganai, Iehova ita hamoalea bona hahenamo momo ita davaria.
[Study Questions]
1. Edena dala ai Davida bona Nehemia be idia volantia?
2. Dahaka dainai Keristani taudia ese gaukara ta karaia totona idia volantia be namo?
3. Kongrigeisen hebou ai edena dala ai sibona ita volantia diba?
4. Edena dala ma haida ai ita volantia diba?
5. Volantia taudia ese dahaka Kingdom Hall gaukara idauidau idia karaia diba?
6. Dahaka dainai haroro gaukara be mai anina bada bona ita karaia totona ita volantia be namo?
7. Hari inai negai, dahaka dainai ita volantia be mai anina bada?