Haroro Gaukara Lalonai Keriso Tohotohoa
1 Iesu be haroro gaukara lalonai haheitalai namona ia hahedinaraia, bona unai ita tohotoho be namo. Iesu ena lalokau bada Dirava bona taunimanima totona, be nega bona dala idauidau ai ia hahedinaraia. Manau taudia dekenai hereva momokani ia hadibaia bona idia gorere bona hisihisi taudia dekenai hebogahisi-mai-lalokauna ia hahedinaraia.—Mat. 9:35.
2 Iesu Ena Haheitalai Bona Hadibaia Herevadia: Iesu be politikol lalonai ia vareai lasi eiava taunimanima durua orea ta ia haginia lasi. Ena be gaukara namodia haida ia karaia diba, to unai ese ia koua lasi—ia be mai anina bada gaukarana ia karaia. (Luka 8:1) Dirava ena Basileia sivarai namona harorolaia gaukarana ia laloa bada, badina unai Basileia sibona ese taunimanima edia hekwakwanai ia haorea diba. Iesu be nega kwadogina lalonai gaukara badana ia karaia. Kaperanauma taudia idia ura Iesu be unuseniai do ia noho neganai, ena hahediba taudia dekenai ia gwau: “Namo ita lao hanua haida, unuseni lau ura haroro karaia, badina inai totona lau mai.”—Mar. 1:38.
3 Iesu be ena hahediba taudia ia hadibadia murinai, ia siaidia lao, ia gwau: “Umui raka noho neganai do umui haroro, umui gwau, ‘Guba Basileia be kahirakahira ia mai vadaeni.’ ” (Mat. 10:7) Iena murinai idia raka taudia ia hadibaia, edia mauri lalonai Basileia ena gaukara do idia atoa guna. (Mat. 6:33) Iesu be guba dekenai ia do lao lasi neganai, iena hahediba taudia dekenai ia gwauraia hereva amo ia hahedinaraia, ia ura edia mauri lalonai dahaka do idia karaia. Ia gwau: “Unai dainai do umui lao, bese ibounai be diba tahua taudia do umui halaoa.”—Mat. 28:19.
4 Basileia be mai Anina Bada: Iesu ese ia herevalaia momo gauna be Dirava ena Basileia, bona iena hahediba taudia ia hagoadaia iena haheitalai idia tohotohoa. Taunimanima do idia hegeregere lasi, tanobada ena hekwakwanai idia hanamoa totona. (Ier. 10:23) Dirava ena Basileia sibona ese Dirava ena ladana ia hahelagaia diba bona taunimanima edia noho do ia hanamoa. (Mat. 6:9, 10) ‘Kara dika rohoroho ibounai dainai idia taitai bona idia lalohisihisi taudia’ dekenai Basileia ena hereva momokani ita hadibaia neganai, unai ese idia ia durua hari inai negai mauri idia moalelaia, bona vaira nega ena helaro idia dogoatao auka.—Ese. 9:4.
5 Iesu be Dirava ena Basileia harorolaia gaukarana ia durua noho bona ia gwau ia ese ita do ia durua. (Mat. 28:20) Iseda haroro gaukara lalonai, edena dala ai Iesu ena haheitalai ita tohotohoa diba? (1 Pet. 2:21) Inai nega dokona lalonai, namona be ita gaukara goadagoada haroro gaukara lalonai Iesu ita tohotohoa totona!