Keristani Haroro Gaukara—Iseda Gaukara Badana
1 Ita ibounai be gaukara idauidau ita karaia be namo. Ta ese ena ruma bese do ia naria gaukarana be Dirava ena hahegani ta. (1 Tim. 5:8) To, unai hahegani dainai ita karaia gaukaradia ese Basileia harorolaia bona hahediba taudia halaoa gaukarana ia koua lasi be namo.—Mat. 24:14; 28:19, 20.
2 Iesu ese ita totona haheitalai namona ia hahedinaraia, unai amo ‘Basileia . . . do ita tahua guna.’ (Mat. 6:33; 1 Pet. 2:21) Ena be tauanina dalanai gau momo ia abia lasi, to ia ura bada iena Tamana ena ura ia karaia. (Luka 4:43; 9:58; Ioa. 4:34) Dala ia kehoa negadia ibounai lalonai ia haroro goadagoada. (Luka 23:43; 1 Tim. 6:13) Iena hahediba taudia ia hagoadaia, anina haboua gaukara dekenai unai ura tamona idia hahedinaraia totona.—Mat. 9:37, 38.
3 Hari Iesu Oi Tohotohoa: Keristani haroro gaukara ita karaia totona ita hekwarahi mauri ia hametaua gaudia ita tahua lasi, unai amo Iesu ena haheitalai ita tohotohoa diba. Bema ita be mai iseda mauri durua gaudia vadaeni, namona be Baibel ena sisiba inai tanobada ena kohu momo tahua lasi karana dekenai ita badinaia. (Mat. 6:19, 20; 1 Tim. 6:8) Dala ita tahua iseda haroro gaukara ita habadaia totona be namo herea! Bema hekwakwanai badadia ita davaria, namona be Iesu ita tohotohoa, dala ita kehoa lasi mauri idia hametaua gaudia ese iseda gaukara badana, Basileia ena sivarai namona harorolaia gaukarana, idia koua totona.—Luka 8:14; 9:59-62.
4 Ena be tadikaka haida edia maduna be momo, to haroro gaukara idia atoa guna. Tadikaka ta mai ena ruma bese badana, moni gaukara badana ta ia karaia bona Keristani kongregesen lalonai ia be elda ta, ia gwau: “Hesiai gaukarana be gaukara badana lauegu mauri lalonai.” Painia taihu ta ia gwau: “Painia gaukarana ese moni gaukarana namona ia hereaia momokani.”
5 Herevana iseda noho dalana be edena bamona, to namona be Iesu ena haheitalai ita badinaia. Edena dala ai? Keristani haroro gaukara be iseda gaukara badana ai ita halaoa.