Baibel Hadibaia Bukana Gaukaralaia Neganai, Hadibaia Tauna Badana Tohotohoa
1 Hadibaia Tauna Badana, Iesu, be nega ibounai auka lasi dalanai taunimanima ia hadibaia. Iena hereva idia kamonai taudia edia lalona ia veria totona, nega haida henanadai ia henia, unai amo edia lalohadai idia gwauraia hedinarai. (Mat. 17:24-27) Dirava ena Hereva ia gaukaralaia momo. (Mat. 26:31; Mar. 7:6) Iena hahediba taudia dekenai hereva momo herea ia gwauraia lasi, badina ia diba gau momo idia do dibaia noho. (Ioa. 16:12) Danu, Iesu ia ura ia diba bema iena hahediba taudia be ia hadibaia gaudia idia abia dae bona idia lalopararalaia eiava lasi. (Mat. 13:51) Baibel Hadibaia bukana ese ita do ia durua unai bamona ita karaia totona.
2 Hereva Kwarana Henunai Idia Noho Henanadai: Karoa ta oi hamatamaia neganai, namona be hereva kwarana henunai idia noho henanadai oi gwauraia. Unai amo stiuden tauna ena ura oi habadaia. Eiava ia oi noia unai henanadai ta ta dekenai, haere kwadogidia ia henia totona. Namo lasi iena haere oi herevalaia lou eiava iena haere kereredia ibounai oi hamaoromaoroa. Namona be iena haere dainai ia oi tanikiu henia bena stadi oi hamatamaia. Hereva kwarana ta ta henunai idia noho henanadai dekenai ia henia haere amo do oi diba, bema paragraf haida dekenai nega bada do oi atoa eiava lasi.
3 Baibel Siridia: Stadi lalonai namona be Baibel ita gaukaralaia momo. (Heb. 4:12) To, namo lasi buka lalonai idia noho siri ibounai ita duahia. Iseda abidadama ena badina idia hahedinaraia siridia sibona oi duahidia. To stadi ena point idia hahedinaraia lasi siridia oi duahia lasi. Baibel Hadibaia bukana be auka lasi dalanai hereva momokani ia hahedinaraia. Stadi lalonai gau momo herevalaia lasi. Namona be point badadia sibona oi herevalaia, to gau idauidau momo eiava stadi ena hereva idia durua lasi gaudia oi herevalaia lasi.
4 Apendiks: Apendiks dekenai hereva kwarana idauidau 14 idia noho, bona karoa ta ta edia hereva idia durua. Stadi lalonai apendiks do oi herevalaia diba eiava lasi, be oi sibona. Bema oi itaia stiuden tauna be umui stadilaia karoa ena hereva ia abia dae, ia oi hagoadaia diba apendiks ena hereva be ia sibona ia duahia totona. Hegeregere, bema stiuden tauna ia abia dae Iesu Keriso be Mesia, karoa 4 ai “Iesu Keriso be Daika?” umui herevalaia neganai, ena apendiks ai inai hereva, “Iesu Keriso be Idia Gwauhamatalaia Mesiana,” do umui herevalaia lasi. To nega haida, namona be stadi umui karaia lalonai, apendiks ena kahana sisina eiava kahana ibounai umui herevalaia hebou diba.
5 Bema oi ura apendiks oi herevalaia, henanadai haida oi hegaegaelaia guna bona paragraf ta ta be stiuden tauna ida oi herevalaia. Eiava stiuden tauna ena diba hegeregerena, stadi lalonai miniti haida oi gaukaralaia diba apendiks umui riviu totona. Unai amo do oi diba bema ia duahia herevana ia lalopararalaia eiava lasi.
6 Riviu Mauana: Karoa ta ta edia dokonai ia noho maua ai idia noho hereva, ese hereva kwarana ena henunai idia noho henanadai idia haerelaia. Unai hereva oi gaukaralaia diba karoa ta ena hereva badadia oi riviulaia totona. Pablisa haida ese maua lalonai idia noho hereva bona idia badinai idia noho siri be stiuden ida idia duahia hebou. Bena stiuden taudia idia nanadaia, edena bamona unai siri ese maua lalonai ia noho herevana ia hamomokania. Unai amo tisa tauna do ia diba bema stiuden tauna be unai karoa ena point badana, bona idia hamomokania siridia ia lalopararalaia, bona unai hereva ia abia dae eiava lasi. Danu, unai ese stiuden tauna ia durua Baibel ia gaukaralaia ma haida dekenai hereva momokani ia hadibaia totona.
7 Hahediba taudia halaoa gaukarana lalonai anina namona ita havaraia totona, namona be Iesu ena hadibaia daladia ita tohotohoa. (Mat. 28:19, 20) Baibel Hadibaia bukana ese ita ia durua diba unai bamona ita karaia totona. Namona be unai buka oi gaukaralaia namonamo, ma haida dekenai hereva momokani be auka lasi dalanai oi hadibaia totona.
[Study Questions]
1. Iesu be edena dala ai hadibaia gaukara ia karaia?
2. Hereva kwarana ta ta henunai idia noho henanadai be edena bamona ita gaukaralaia diba?
3. Edena dala ai stadi lalonai gau momo ita herevalaia lasi?
4. Edena bamona ita diba bema stadi lalonai apendiks ita herevalaia diba?
5. Bema ita ura apendiks ita herevalaia, edena dala ai ita karaia diba?
6. Edena bamona karoa ta ta edia dokonai idia noho riviu mauana ita gaukaralaia diba?
7. Edena dala ai iseda hesiai gaukara ai, Baibel Hadibaia bukana ita gaukaralaia diba?