Baibel Hadibaia Bukana Ena Kahana Idauidau Gaukaralaia Namonamo

Bema Baibel stiuden tauna be Baibel ena hereva ia dibaia bona ia badinaia, do ia goada ia lao bona ena hetura karana Iehova ida do ia goada. (Sal. 1:1-3) Eda Baibel stiuden tauna ia goada ia lao diba bema Baibel Hadibaia bukana ena kahana idauidau ita gaukaralaia namonamo.

Karoa Matamanai Idia Noho Henanadai: Karoa ta ta be mai edia henanadai bona haere be karoa lalonai idia noho. Reana henanadai oi duahidia, unai amo stiuden ena ura oi habadaia bena do umui herevalaia gaudia ia laloa. Eiava ia oi noia henanadai ta ta edia haere kwadogina ia gwauraia. Bema haere kererena ia henia, maoromaoro oi hamaoromaoroa lasi. Iena haere amo do oi diba stadi lalonai edena point oi hahedinaraia namonamo be namo.​—Aon. 16:23; 18:13.

Apendiks: Bema stiuden ese umui stadilaia kahana ia lalopararalaia bona ia abia dae, ia oi hagoadaia umui stadilaia karoa ena apendiks be ia sibona ese ia riviulaia. Stadi gabena ai, stiuden oi nanadaia bema apendiks ai ia duahia gaudia ia lalopararalaia eiava lasi. Bema oi laloa apendiks ese stiuden ia durua diba, vadaeni nega oi atoa unai umui herevalaia totona, reana paragraf umui duahia bona oi hegaegaelaia henanadai oi gaukaralaia.

Riviu Maua: Karoa ta ta edia dokonai maua ta ia noho, unai ese karoa matamanai idia noho henanadai ia haerelaia. Maua oi gaukaralaia unai amo do oi diba stiuden be stadi ena point badadia ia lalopararalaia bona ia sibona ese ia herevalaia namonamo diba eiava lasi. Point ta ta bona idia noho siri danu umui duahia hebou. Bena emu stiuden oi noia siri amo unai ia hamomokania totona.​—Kara 17:2, 3.