“Iduara Badana Ia Kehoa Vadaeni, Bona Hari be Gaukara Badana” ta Oi Karaia Diba
1 Aposetolo Paulo be haroro gaukara ena “iduara badana” dekenai ia vareai bona mai ura bada ida unai gaukara badana ia karaia, herevana dagedage taudia be momo. (1 Kor. 16:9) Hari, tanobada hegegemadai Basileia harorolaia taudia 642,000 be regula painia gaukara ena iduara badana lalonai idia vareai bona gaukara badana idia karaia.
2 Noho Dalana Ia Idau: Ena be hari iseda noho dalana dainai iseda haroro gaukara ita habadaia be auka, to iseda noho dalana be do ia idau. Unai dainai, namona be ita naria lasi, to nega ta ta ai iseda noho dalana ita sekea loulou. (Had. 11:4) Mero o kekeni e, oi be kahirakahira haisikuli do oi rakatania, a? Tama sina e, emui natuna be kahirakahira sikuli dekenai do oi atoa, a? Oi be kahirakahira moni gaukara amo do oi ritaea, a? Unai bamona noho dalana idia idau neganai, oi be mai emu nega regula painia gaukara oi karaia totona. Taihu ta be guna gorere ta ia davaria, to iena lalona ia hadaia painia gaukara ia karaia totona, bona iena mauri lagani be 89. Dahaka dainai? Lagani ta lalonai ia be hospital dekenai ia lao lasi dainai, ia laloa ia be painia gaukara ia karaia diba.
3 Matamanai Paulo ia ura Korinto tadikaka ia vadivadi henia. To iena palani ia haidaua badina ia ura sivarai namona ia harorolaia. Hari inai negai, momo be idia regula painia totona, edia noho dalana idia haidaua. Haida be gau momo idia dadaraia, badina idia ura pat-taim moni gaukara idia karaia, unai amo idia abia moni sisina amo edia mauri idia durua. To regula painia gaukara idia moalelaia. (1 Tim. 6:6-8) Headava taudia haida be edia noho dalana idia haidaua, unai amo tau sibona be moni gaukara ia karaia bona hahine be ia regula painia.
4 Oi gwau lasi hora 70 do oi hagugurua diba lasi dainai, oi regula painia be auka. To, oi be dina ta ta lalonai hora rua mai kahana sibona do oi haroro. Bema hora 70 abia dalana dekenai oi daradara, reana hua ta eiava rua lalonai heduru painia oi karaia, to oiemu tahua gauna be hora 70 oi gavaia. Unai amo painia gaukara do oi moalelaia. (Sal. 34:8) Hari idia regula painia taudia edia heduru oi tahua. Reana idia danu be oi davaria hekwakwanai idia hanaia vadaeni. (Aon. 15:22) Iehova oi noia oi ia durua oiemu haroro gaukara oi habadaia totona.—1 Ioa. 5:14.
5 Gaukara Hereadaena: Regula painia gaukara oi karaia neganai, hahenamo momo do oi davaria. Unai gaukara lalonai oi be henia karana oi hahedinaraia dainai, moale oi davaria. (Kara 20:35) Painia gaukara ese oi ia durua Baibel oi gaukaralaia namonamo totona. (2 Tim. 2:15) Unai gaukara dekenai do oi itaia Iehova be oi ia durua noho. (Kara 11:21; Fili. 4:11-13) Painia gaukara ese oi do ia durua oi haheauka totona, bona Iehova kahirakahira do oi lao. (Iam. 4:8) Oi hegeregere regula painia gaukara ena iduara badana dekenai oi vareai totona, a?
[Study Questions]
1. Edena gaukara ena “iduara badana” be ia kehoa noho ita dekenai?
2. Dahaka dainai dina ta ta ai iseda noho dalana ita sekea be namo?
3. Haida be dahaka idia karaia, unai amo idia regula painia diba?
4. Bema hora 70 abia dalana dekenai ita daradara, dahaka ita karaia diba?
5. Dahaka dainai regula painia be gaukara hereadaena?