Sekit Hebouhebou Ena Program Matamatana

Iehova ia ura ia ita hanamoa. Edena dala ai Iehova ita hanamoa? Dahaka dainai haida dekenai Iehova hanamoa karana be auka? Hari Iehova idia hanamoa taudia be dahaka hahenamo do idia abia? Unai henanadai edia haere be lagani 2008 ena sekit hebouhebou ena program lalonai do ita kamonai. Unai program ena sinado be “Gau Ibounai Do Umui Karaia Dirava Hanamoa Totona.” (1 Kor. 10:31) Unai dina rua lalonai do ita kamonai hakaua hereva namodia mani ita laloa.

Distrik naria tauna ese inai hereva, “Dahaka Dainai Dirava Ita Hanamoa?” bona “Dirava Ena Taravatu Badinaia Karana Dekenai Haheitalai Namona Hahedinaraia” do ia henia. Ia ese pablik tok, ena sinado be “Dirava Idia Hanamoa Taudia be Daidia?,” bona hereva dokona do ia henia, ena sinado be, “Tanobada Hegegemadai mai Lalotamona ida Dirava Hanamoa.” Bona Tiokratik Haroro Sikuli do ia naria danu. Sekit naria tauna ese inai hereva toi, “Dirava Ena Hairai Hahedinaraia Karana Dekenai Oi Moale,” “Sekit Durua Daladia,” bona 2 Petero 1:​12 amo inai hereva “ ‘Hereva Momokani Lalonai Ita Gini Goada’ Noho” do ia henia. Bona danu, do ita diba edena dala amo “Painia Gaukarana ese Dirava Ia Hanamoa.” Tok ladana, “Iseda Mauri Lalonai Dirava Ita Hanamoa,” ena kahana be foa, kahana ginigunadia rua lalonai 1 Korinto 10:31 ena anina do idia herevalaia. Inai hereva mai ena kahana foa, “Hesiai Gaukara Helagana Ita Karaia Iehova Hanamoa Totona” be iseda tomadiho karadia idauidau do ia herevalaia. Ita be Gima Kohorona ena hereva badadia bona Sunday ai dina ena siri do ita abia danu. Unai hebouhebou dekenai bapatiso idia abia gwauraia taudia ese bapatiso idia abia diba.

Momo be Dirava idia hanamoa lasi. Taunimanima ese idia karaia gaudia idauidau dainai, momo be Dirava ena hairai idia laloa bada lasi. (Ioa. 5:​44) To ita diba bema nega ita atoa gau ibounai ita karaia Dirava hanamoa totona, unai be mai anina bada. Palani oi karaia unai dina rua ena program namona amo namo bada oi abia totona.