Dina Tamona Hebouhebou Ena Program Matamatana

Lagani 2008 ena dina tamona hebouhebou ena program ena sinado be, “Ita be Raro​​—Iehova be Raro Gaukaralaia Tauna,” unai be Isaia 64:8 amo idia abia. Inai program lalonai do ita kamonai Baibel sisiba, ese ita do idia hagoadaia Iehova, Uro Karaia Tauna Badana ena aonega, kara maoromaoro, siahu, bona lalokau ita lalopararalaia totona.

Sekit naria tauna ena tok ladana, “Gaukara Namona Urona Bamona Hesiai Gaukara Ita Karaia,” ese do ia hahedinaraia taunimanima momo be hereva momokani idia dibaia bona hahenamo momo idia abia dainai, hereva momokani be ma haida dekenai idia harorolaia. Tok ma ta ladana, “Laloa Dobu Karana ese Oi Ia Gimaia Diba,” ese do ia hahedinaraia edena dala ai Iehova ena kara maoromaoro taravatudia ita laloa dobu karana ese ita ia gimaia diba. Vadivadi tauna ese inai tok rua do ia henia, “Inai Tanobada Taudia Edia Kara Bamona Do Umui Karaia Lasi” bona “Uro Karaia Tauna Badana ese Ita Ia Hadibaia be Namo,” do ia henia. Inai tok rua edia ladana, “Iehova Idia Hesiai Henia Matamata Taudia” bona “Tama Sina Edia Maduna,” ese matamata taudia bona tama sina do ia hagoadaia. Haheitalai bona inteviu kahadia amo iseda tadikaka bona taihu edia hesiai gaukara lalonai idia karaia gaukara namodia edia sivarai do ita kamonai. Idia ura bapatiso amo Dirava dekenai edia mauri idia gwauhamatalaia taudia ese edia kongrigeisen ena hakaua naria tauna idia hadibaia haraga be namo. Inai dina tamona ena hebouhebou dekenai, emui stadi Gima Kohorona umui abia lao be namo.

Uro Karaia Tauna Badana ia ura karaia gauna be do ia hagugurua. To, namona be ita ta ta sibona ese abia hidi do ita karaia Iehova ese ita be edena bamona do ia gaukaralaia. Iehova ena taravatu idia abia dae bona badinaia taudia be Iehova ese ia hanamodia dainai, idia be uro namona ai idia lao. Bema Iehova ita badinaia, ita ese Iena lohia siahuna do ita abia isi bona hahenamo momo do ita abia.