Uro Karaia Tauna Badana Bona Ena Gaukara

‘Gaukara namona urona ai umui lao. Umui noho hegaegae, gaukara namodia ibounai do umui karaia totona.’​—2 TIMOTEO 2:​21.

1, 2. (a) Edena dala ai Dirava ese tau bona hahine ia havaraia gaukarana be gaukara hereadaena? (b) Uro Karaia Tauna Badana ese Adamu bona Heva ia havaraia neganai, ena ura be dahaka?

IEHOVA be Uro Karaia Tauna Badana. Ia karaia gauna hereadaena ta be iseda tamana ginigunana, Adamu. Baibel ese ita ia hamaoroa, ia gwau: “Iehova Dirava ese tano ena kahu dekena amo tau ia karaia bona mauri ena laga be ena udu baubau lalonai ia hiriria vareai, bona unai tau be mauri soulina ta ai ia lao,” unai be “ia hahodi mauri gauna.” (Genese 2:7, futnout, NW) Iehova ese ia havaraia tanobada tauna ginigunana be goevadae, ia be Dirava ena laulau hegeregerena, bona ia hamomokania Dirava be mai ena aonega bona kara maoromaoro bona kota maoromaoro korikori ia ura henia.

² Dirava ese Adamu ena ruduna turiana amo, bamona bona durua hahinena ia havaraia tau totona. Heva ena hairai bada herea ese hari idia noho hahine ibounai edia hairai ia hereaia. (Genese 2:​21-​23) Danu, idia ruaosi edia tauanina bona diba idia hegeregere idia abia gaukarana, inai tanobada be paradaiso ai do idia halaoa gaukarana, idia hagugurua totona. Idia ese Dirava ena hahegani Genese 1:​28 ai idia badinaia totona, siahu idauna idia abia danu, ia gwau: “Emui bese do umui havaraia, do umui momo herea. Tanobada ena gabu ibounai dekenai do umui noho, bona unai tano do umui biagua. Davara ena gwarume bona ataiai manudia, bona mauri gaudia, tanobada dekenai idia marere gaudia ibounai do umui biagua.” Dirava ena ura be gabeai taunimanima bilioni momo be unai tanobada ibounai uma gabuna dekenai do idia noho mai edia moale ida bona “hatamonaia gauna hereadaena,” lalokau, dainai do idia noho hebou namo herea.​—Kolose 3:14, NW.

3. Edena dala ai iseda tama sina ginigunadia be gaukara dikana urodia ai idia lao, bona unai dainai dahaka ia vara?

³ Madi, iseda tama sina ginigunadia ese mai edia ura ida Atai Herea Havaraia Tauna, Uro Karaia Tauna Badana, ena lohia siahuna idia dadaraia. Edia kara be Isaia 29:15, 16 ese ia hahedinaraia bamona, ia gwau: “Tau haida ese palani be, Lohiabada dekena amo idia hunia gwauraia. Idia ese dika do idia davaria! Edia kara dika be dibura lalonai idia karaia noho, idia gwau, ‘Daika ese ita ia itaia?’ bona, ‘Daika ese iseda kara ia diba?’ . . . Edena be bada, uro karaia tauna, o raro? Ia karaia gauna ese, karaia tauna do ia hereva henia, do ia gwau, ‘Oi ese lau oi karaia lasi,’ a? Uro ta ese uro karaia tauna do ia hereva henia, do ia gwau, ‘Oi be gau ta oi diba lasi,’ a?” Edia gwau-edeede karana dainai dika idia davaria​—ena davana be mase hanaihanai. Danu, idia amo idia vara tanobada besena taudia ibounai ese kara dika bona mase idia abia. (Roma 5:​12, 18) Unai ese Uro Karaia Tauna Badana ia havaraia gauna ena hairai ia hadikaia.

4. Dahaka kara namona ita karaia diba?

⁴ Ena be hari ita goevadae lasi, badina ita be kara dika tauna Adamu ena natudia, to ita ese Salamo 139:14 ena hereva amo Iehova ita hanamoa diba, ia gwau: “Oi lau tanikiu henia, badina mai hoa danu lau oi karaia. Oiemu kara ibounai be mai hoa bona gari danu. Lauegu kudouna dekenai, inai bamona lau diba momokani.” To madi, Uro Karaia Tauna Badana ese matamanai ia karaia gaukara namona idia hadikaia momokani!

Uro Karaia Tauna ese Ena Gaukara Ia Habadaia

5. Uro Karaia Tauna Badana be edena bamona ena diba bada ia gaukaralaia?

⁵ To ita moale diba, badina Uro Karaia Tauna bamona ita ia Havaraia Tauna ena diba bada be taunimanima ia karaia karana sibona lalonai ia hedinarai lasi. Aposetolo Paulo ese ita ia hamaoroa, ia gwau: “Tau e, oi be daika, Dirava ena hereva dekenai oi badu? Uro ese karaia tauna dekenai do ia hereva henia, ia gwau, ‘Dahaka totona inai bamona oi karaia lau, a?’ Uro karaia tauna ia siahu lasi, a, uro karaia tano do ia gaukaralaia iena ura hegeregerena? Bona bema ia ura neganai, uro rua do ia karaia raro tamona dekena amo. Uro ta be [gaukara dikana] gauna, ma ta be [gaukara namona] gauna.”​—Roma 9:20, 21.

6, 7. (a) Edena dala ai momo be gaukara dikana urodia ai idia lao hari? (b) Edena dala ai kara maoromaoro taudia be gaukara namona urodia ai idia lao?

⁶ Oibe, Uro Karaia Tauna Badana ia karaia uro haida be gaukara namona totona, bona ma haida be gaukara dikana totona. Inai tanobada ena dika be ia bada ia lao lalonai, Dirava dadaraia karadia idia ura idia badinaia taudia be maka idia abia bona ia hahedinaraia do idia ore vaitani. King mai ena hairai bada, Keriso Iesu, be kota karaia totona do ia mai neganai, Mataio 25:46 ese ia gwauraia “dika hanaihanai gabuna dekenai do idia lao” nanigosi bamona taudia mai edia lalo-auka be unai gaukara dikana urodia bogaraginai do idia noho. To mamoe bamona “kara maoromaoro taudia,” “gaukara namona” totona ia karaia urodia be “mauri hanaihanai” do idia abia.

⁷ Unai kara maoromaoro taudia be mai manau ida Dirava ena hahediba idia abia dae. Idia ese Dirava ia gwauraia mauri dalana idia badinaia. Idia ese 1 Timoteo 6:​17-​19 ai ita davaria sisiba idia abia dae, ia gwau: “Inai tanobada ena kohu do [umui] abidadama henia lasi, to Dirava sibona do [umui] abidadama henia.” Idia ese “kara namodia do idia karaia, edia kohu do idia haria karaia, haida durua totona, bona harihari gaudia do idia henia, mai moale danu. Inai dala dekenai, idia ese edia kohu korikori do idia haboua hegaegae, edia mauri gabeai do ia durua totona.” Dirava ena hereva momokani ese idia ia hadibaia bona idia be Iehova ese Keriso Iesu amo ia karaia karana idia abidadama henia goada. Unai kara be, Iesu ese “iena mauri ia henia,” Adamu ena kara dika dainai taunimanima idia haboioa gaudia ibounai idia abia lou totona. (1 Timoteo 2:6) Unai dainai, namona be mai iseda ura ibounai ida Paulo ena sisiba ita badinaia bona ‘mauri matamata ita kwatua. Inai mauri matamata be Dirava ese ia havaraia. Bona ia ese nega ibounai diba matamata ia henia noho, ia lao bona Dirava ena toana momokani do ita abia’!​—Kolose 3:10.

Oi be Edena Bamona Uro ai Do Oi Lao?

8. (a) Ta be gaukara namona eiava gaukara dikana urona ai ia lao be dahaka ese ia biagua? (b) Edena gau rua ese ta idia haidaua?

⁸ Ta be gaukara namona eiava gaukara dikana urona ai ia lao be dahaka ese ia biagua? Unai ia biagua gauna be ena lalohadai bona ena kara. Iena kudouna ena ura ese unai ia haidaua guna. Aonega King Solomona ia gwau: “Tau ta ese iena kudouna lalonai, iena dala ia palania noho, to Lohiabada ese unai tau ena raka dalana, dekenai ia hakaua noho.” (Aonega Herevadia 16:9) Bena, ia kamonai bona ia itaia gaudia, ena hebamo bona ena mauri lalonai idia vara gaudia, ese ia idia haidaua. Unai dainai, gau badana be inai sisiba ita badinaia: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davara.” (Aonega Herevadia 13:20) Petero Iharuana 1:​16 ese ita ia hadibaia, namona be “gori kava,” eiava Knox ena Roman Katolik Baibel hegeregerena, “taunimanima ese idia havaraia gori sivaraidia,” ita badinaia lasi. Hereva momokani ia negea oreana, Kerisendom, ena hahediba herevadia bona dina helagadia be unai bamona gaudia.

9. Dahaka ita karaia be namo, Uro Karaia Tauna Badana ese ita ia hadibaia diba totona?

⁹ Vadaeni, iseda kara hegeregerena, Dirava ese ita ia hadibaia diba. Iehova vairanai, mai eda hemataurai ida, Davida ena guriguri ita gwauraia lou diba, ia gwau: “Dirava e, egu kudouna do oi tahua, ena dala ibounai do oi diba. Egu lalona danu do oi tohoa, bona egu laloa gaudia do oi davaria. Do oi itaia, bema egu lalona dekenai dika ta ia noho, bona noho hanaihanai dalana dekenai mani lau do oi hakaua.” (Salamo 139:23, 24) Iehova ena ura dainai Basileia ena sivarai harorolaia gaukarana ia vara. Ita ese unai sivarai namona ita abia dae mai iseda kudouna ibounai ida bona Dirava ese ita do ia hakaua noho karana ita laloa bada. Iena orea amo sivarai namona harorolaia gaukarana lalonai hahenamo idauidau be ita dekenai ia henia; namona be ita abidia dae bona ita naridia.​—Filipi 1:​9-​11.

10. Edena lauma gaudia stadilaia program ita badinaia totona do ita hekwarahi be namo?

¹⁰ Nega ibounai Dirava ena Hereva ita laloa be gau badana, dina ta ta ibounai Baibel ita duahia bona iseda ruma bese taudia bona turadia ida Baibel bona Iehova ena hesiai gaukara ita herevalaia hanaihanai. Iehova ena Witness taudia edia Betele rumadia bona misinari rumadia lalonai idia noho taudia edia daba program be pura ta ta lalonai, nega kwadogina lalonai Baibel eiava Yearbook matamatana idia duahia. Oiemu ruma bese be unai bamona ia karaia diba danu, a? Danu, iseda hebamo heheni karana Keristani kongregesen dekenai ita hebou neganai, bona pura ta ta ena Gima Kohorona stadi lalonai haere ita henia neganai, hahenamo idauidau ita abia!

Ita Ia Hadibaia Hahetoho Ita Haheaukalaia Diba Totona

11, 12. (a) Iamesi ena sisiba dina ta ta lalonai ita davaria hahetoho dekenai be edena bamona ita badinaia diba? (b) Iobu ena sivarai ese edena dala ai ita ia hagoadaia kara maoromaoro ita badinaia totona?

¹¹ Dina ta ta ai, iseda mauri lalonai idia vara hahetoho ibounai be Dirava ese ia koua lasi, bona reana ita davaria unai gaudia haida ita haheaukalaia be auka. Idia be edena bamona ita laloa be namo? Iamesi 4:8 ese ita ia sisiba henia bamona, namona be ita badu lasi, to Dirava kahirakahira ita lao, bona mai iseda kudouna ibounai ida ita abia dae ‘ita be ia kahirakahira ita lao neganai, ia be ita kahirakahira ia mai.’ Momokani, hekwakwanai bona hahetoho do ita haheaukalaia, bona Dirava ese idia ia koua lasi, badina idia ese ita idia hadibaia, bona dokonai moale do ita davaria diba. Iamesi 1:​2, 3 ese ita ia hagoadaia, ia gwau: “Lauegu varavara taudia e, bema dibagani idauidau ese umui dekenai ia ginidae neganai, inai bamona do umui laloa be namo: Inai be moale gauna sibona. Badina be umui diba, dibagani o hisihisi ese emui abidadama idia tohoa neganai, goada bona haheauka idia havaraia noho.”

¹² Iamesi be ma ia gwau: “Bema tau ta ese dibagani ia davaria, o dika ta ese ia veria noho neganai, inai bamona do ia hereva lasi, ‘Dirava ese lau ia dibagania noho.’ Badina be kara dika ese Dirava ia dibagania diba lasi momokani. Bona Dirava ese tau ta do ia dibagania lasi. To dibagani ena badina korikori be, tau ta sibona ena ura dainai, kara dika ta ese ia veria noho, bona ia koia noho.” (Iamesi 1:13, 14) Reana hahetoho idauidau momo ita davaria, to Iobu dekenai ia vara bamona, idia ibounai ese ita idia hadibaia. Baibel ese Iamesi 5:​11 ena hereva amo ita ia hagoadaia bada, ia gwau: “Ita diba inai haheauka taudia ese moale idia davaria vadaeni, ani? Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be Lohiabada be mai ena bogahisihisi, bona iena hariharibada be bada herea.” Ita be Uro Karaia Tauna Badana ena imana dekenai idia noho uro dainai, namona be nega ibounai kara maoromaoro ita badinaia, bona Iobu bamona ita abia dae unai amo namo do ita abia!​—Iobu 2:​3, 9, 10; 27:5; 31:​1-6; 42:12-​15.

Iseda Matamata Taudia Ita Hadibaia

13, 14. (a) Edena negai tama sina ese edia natudia idia hadibaia matamaia be namo, bona idia ura dahaka do ia vara? (b) Edena haheitalai namodia oi gwauraia diba?

¹³ Natudia idia maragi negana amo, tama sina ese idia hadibaia diba, bena iseda matamata taudia be kara maoromaoro badinaia taudia namodia ai idia lao! (2 Timoteo 3:​14, 15) Hahetoho aukadia idia vara neganai danu unai idia badinaia. Lagani haida gunanai, Africa ena tano ta ai dagedage bada herea ia vara lalonai, tadikaka ese idia abidadama henia diba ruma bese ta be hehuni dalanai Gima Kohorona printaia gaukarana idia karaia edia ruma murina kahanai ia noho ruma maragina lalonai. Dina ta ai, tuari taudia be dala dekenai idia mai noho, ruma ta ruma ta ai tatau matamatadia idia tahua ami dekenai idia abia totona. Nega ia do noho unai ruma bese ena memero rua idia hunia totona, to idia diba bema unai idia karaia, tuari taudia ese idia do idia tahua bona edia printa masini do idia davaria. Bona reana unai dainai ruma bese taudia iboudiai do idia hahisia eiava idia alaia mase. Dahaka idia karaia diba? Unai memero rua be mai gari lasi ida Ioane 15:13 ena hereva idia gwauraia: “Lalokau namo herea momokani be inai, tau ta ese ena mauri do ia atoa diho, iena turana totona.” Mai edia goada ida idia gwau ruma lalonai do idia noho. Tuari taudia ese unai memero rua do idia davaria bona do idia hahisidia dikadika eiava do idia hamasedia, badina ami dekenai do idia vareai lasi. To bema idia davaridia, do idia tahua noho lasi. Printa masini bona ruma bese taudia ma haida do idia hadikaia lasi. To, hoa gauna ta ia vara. Tuari taudia be unai ruma tamona idia reaia bona ruma ma haida dekenai idia lao! Unai gaukara namona urodia bamona taudia idia roho mauri, bona printa masini ia do noho danu, bona nega korikorina ai lauma aniani idia halasia noho. Hari mero ta bona ena taihuna ta be Betele dekenai idia gaukara; bona mero be unai masini gunana ia do gaukaralaia noho.

¹⁴ Memero kekeni ese guriguri dalana idia dibaia diba bona Dirava ese edia guriguri ia haere henia. Rwanda dekenai, taunimanima momo hamasea negana lalonai, unai ia vara. Tuari taudia ese mauri lagani 6 kekenina bona ena tama sina idia hamaoroa vadaeni, bomu maragina amo do idia hamasedia. To unai kekeni ia guriguri badabada bona goadagoada, ia noia do idia mauri noho, Iehova ena hesiai gaukara do idia karaia diba totona. Unai ese ala-ala taudia edia kudouna ia hamarerea, bena idia gwau, “Inai kekeni maragina dainai, umui ai hamasea diba lasi.”​—1 Petero 3:​12.

15. Dahaka gau dikadia dainai Paulo ese ita ia sisiba henia?

¹⁵ Iseda matamata taudia momo be unai bamona hekwakwanai aukadia idia davaria lasi, to hari inai negai idia ese hahetoho momo idia davaria sikuli dekenai bona inai tanobada dikana lalonai: gabu momo dekenai hereva mirodia, lebulebu sivaraidia bona laulaudia, bona matabodaga moale karadia be momo, bona edia sikuli turadia ese kara dika karaia totona idia veridia goadagoada. Aposetolo Paulo ese unai gaudia dainai sisiba ia henia loulou.​—1 Korinto 5:6; 15:33, 34; Efeso 5:​3-7.

16. Edena dala ai ta be gaukara namona urona ai ia lao diba?

¹⁶ Paulo ia gwau “disi haida be gaukara namodia totona, to disi haida be gaukara kavakava totona,” bena ia gwau: “Tau ta bema unai lau gwauraia kara dika dekena amo sibona ia hagoevaia neganai, ia be goevagoeva do ia lao, Dirava ena vairanai, bona ia be gaukara namona disi bamona. Ia be Dirava ena tau momokani, bona ia ese iena Biaguna ia durua diba. Do ia noho hegaegae, gaukara namodia ibounai do ia karaia totona.” Unai dainai namona be iseda matamata taudia ita hagoadaia, edia hebamo idia naria namonamo totona. Namona be idia ese ‘lebulebu karadia do idia rakatania, bona inai kara do idia badinaia: Kara maoromaoro, abidadama, lalokau, bona maino. Mai edia laloa goevagoeva, bona Lohiabada ena durua idia noia noho taudia danu do idia turana karaia.’ (2 Timoteo 2:20-22) Bema iseda ruma bese ‘hagoadaia heheni’ dalana ta ita karaia bona ita badinaia, unai ese ita ia durua bada iseda matamata taudia ita hadibaia namonamo totona. (1 Tesalonika 5:​11; Aonega Herevadia 22:6) Dina ta ta ai Baibel duahia bona stadilaia karana, Society ena buka namodia ida, ese ita ia durua diba.

Ita Ta Ta Ibounai Ia Hadibaia

17. Matahakani be edena bamona ita ia hadibaia diba, bona unai amo dahaka namo do ia vara?

¹⁷ Ita ia hadibaia totona, Iehova ese ena Hereva bona ena orea amo sisiba ia henia. Namona be unai bamona sisiba, Dirava amo ia mai sisiba, oi koua lasi! Mai aonega ida unai sisiba oi abia dae, bena ia ese oi ia hadibaia, bona Iehova ese gaukara namona ai oi ia gaukaralaia diba. Aonega Herevadia 3:​11, 12 ia gwau: “Egu natuna e, Lohiabada ena matakani oi dekenai, be do oi abia dae, bona iena sisiba dekenai do oi hesiku lasi. Badina be Lohiabada ese ia lalokau henia taudia, be ia matakani henidia noho, tamana ta ese iena natuna, ia lalokau henia merona, ia matakani henia bamona.” Ia ese Heberu 12:​6-​11 ai, tamana bamona ita ia sisiba henia, ia gwau: “Lohiabada ese ia ura henia tauna ia matakani henia. . . . Tamana ese metau bona hisihisi ita dekenai ia henia neganai, iseda lalona idia hisihisi, bona ita be moale lasi. To gabeai, inai matakani ese idia ia hamaoromaoroa vadaeni taudia ese, kara maoromaoro ena davana namona, mai maino danu do idia davaria.” Dirava ena lauma amo ia havaraia Herevana be unai bamona matahakani abia dalana badana.​—2 Timoteo 3:​16, 17.

18. Luka karoa 15 amo, dahaka ita dibaia helalo-kerehai karana dekenai?

¹⁸ Iehova be mai ena hebogahisi danu. (Esodo 34:6) Ena be ta ese kara dika badana ia karaia, to mai ena kudouna ibounai ida ia helalo-kerehai neganai, Iehova ese ena kara dika ia gwauatao. Hari inai negai ‘raka boio’ taudia danu, be gaukara namona urodia ai idia lao diba. (Luka 15:22-​24, 32) Iseda kara dika ena bada be reana unai raka boio merona ena kara dika ena bada hegeregerena lasi. To mai manau ida Baibel ena sisiba ita abia dae neganai, gaukara namona urodia ai do ita lao.

19. Edena dala ai ita be gaukara namona urona bamona Iehova ena imana dekenai ita noho diba?

¹⁹ Nega ginigunana hereva momokani ita dibaia neganai, ita hahedinaraia ita ura Iehova ese ita ia hadibaia. Tanobada ena dala idauidau ita rakatania, mauri matamata ita atoa matamaia, bona gwauhamata bona bapatiso Keristani taudia ai ita lao. Efeso 4:​20-​24 ena sisiba ita badinaia, bona ‘iseda mauri gunana be dabua gunana bamona ita kokia, badina iena dika bona iena koikoi be mase dekenai ia lao noho. Mauri matamata ita atoa, dabua matamata ita atoa bamona, inai mauri matamata dainai, iseda toana be Dirava ena toana bamona, ena kara be maoromaoro, helaga bona momokani.’ Namona be ita be Iehova, Uro Karaia Tauna Badana, ena imana dekenai ia noho raro manokana bamona, bena nega ibounai ita be iena gaukara namona urodia bamona!

Riviu

◻ Uro Karaia Tauna Badana ena ura iseda tanobada totona be dahaka?

◻ Edena dala ai oi be gaukara namona urona ai oi lao diba?

◻ Edena dala ai iseda natudia ita hadibaia diba?

◻ Matahakani be edena bamona ita laloa be namo?

[Picture on page 10]

Gaukara namona totona oi do ia hadibaia eiava do ia dadaraia?

[Picture on page 12]

Idia maragi negana amo, matamata taudia ita hadibaia diba