Haroro Gaukara Lalonai Nega Gaukaralaia Namonamo
1 Iseda haroro gaukara lalonai gaukara bada ia do noho, bona nega be kwadogi. (Ioa. 4:35; 1 Kor. 7:29) Bema ita hegaegae o palani namona ita karaia, iseda haroro ena nega do ita gaukaralaia namonamo diba.
2 Hegaegae: Haroro ena hebou dekenai oi do lao lasi neganai, do oi hariharilaia buka bona magasin be baege ai oi udaia hegaegae, bona emu hamatamaia herevadia oi hegaegaelaia. Haroro ena hebou be guriguri amo idia koua neganai, maoromaoro haroro grup be teritori dekenai ia lao. Unai amo haroro ai nega do ia hegeregere bona momo do umui haroro henia.
3 Bema oi be haroro ena hebou do oi naria, namona be nega korikori ai hebou oi hamatamaia. Unai hebou ena lata be miniti 10 ia lao 15 ia hanaia lasi be namo. Teritori dekenai umui do lao lasi neganai, namona be pablisa ta ta idia diba idia be daika ida do idia gaukara hebou bona grup be edena teritori dekenai do idia haroro.
4 Haroro Lalonai: Haroro ena hebou ia ore neganai, oi naria lasi to maoromaoro teritori dekenai umui lao be namo. Bema oi laloa do oi haroro sisina bena teritori do oi rakatania haraga, grup oi hadibaia be namo, unai amo oi do idia naria lasi to idia haroro noho diba. Grup ida oi haroro hebou neganai, namona be ma haida edia namo oi laloa, namo lasi oi hereva momo dainai grup be oi idia naria noho. Anina be bema ruma tauna ia hepapahuahu, namona be aonega dalanai ia oi rakatania to bema ia kamonai namonamo, vadaeni oi hamaoroa gabeai ia do oi lou henia.—Mat. 10:11.
5 Lou henia oi karaia neganai, namona be teritori tamona ai idia noho lou henia ibounai oi itaia guna, gabeai teritori ma ta dekenai oi lao. Reana telefon amo emu lou henia oi ringi henidia guna, unai amo do oi diba idia be edia ruma dekenai do idia noho eiava lasi. (Aon. 21:5) Bema haida be oi idia bamoa lou henia umui itaia, bona oi diba do oi hereva daudau, namona be oi idia bamoa taudia be idia naria lalonai ma haida idia haroro henia o unai gabu ai idia noho lou henia idia itaia diba.
6 Ita be taunimanima gogoa gaukarana ena nega lalonai ita noho. (Mat. 9:37, 38) Bona unai gogoa gaukarana be kahirakahira do ia ore. Unai dainai, ita ura haroro gaukara lalonai iseda nega ita gaukaralaia namonamo be gau badana.