Haroro Grup amo Heduru Oi Abia Daladia
1. Kongrigeisen Buka Stadi hegeregerena, eda haroro grup amo dahaka heduru ita abia diba?
1 Kongrigeisen Buka Stadi oi reaia, a? Guna buka stadi grup be maragi dainai, ta ta ita dibaia namonamo. Unai amo tura namodia ai ita lao bona ta ta ita durua eda abidadama ia goada noho totona. (Aon. 18:24) Danu, buka stadi naria tauna be ena grup ai idia noho tadikaka taihu ta ta ia diba namonamo dainai ia durudia bona hagoadaia diba. (Aon. 27:23; 1 Pet. 5:2, 3) To hari, unai bamona heduru be eda haroro grup amo ita abia.
2. Eda haroro grup taudia ita bamoa bona ta ta ita hagoadaia totona, dahaka ita karaia diba?
2 Kara Haida Ita Karaia: Haroro grup ta ta edia bada be guna buka stadi grup edia bada hegeregerena. Haroro gaukara ai ma haida ida ita “gaukara hebou” neganai, tura namodia ai ita lao diba. (Fili. 1:27) Emu haroro grup lalonai daika ida oi do gaukara hebou lasi? Ia ida oi gaukara hebou diba, a? (2 Kor. 6:13) Danu, reana nega haida eda grup tauna ta ita boiria eda Ruma Bese Ena Tomadiho negana ai ia mai o ita aniani hebou diba. Kongrigeisen haida ai, haroro grup ta ta be pura ta ta ai pablik tok ia henia tadikaka totona aniani idia hegaegaelaia. Unai negadiai grup ai idia noho taudia be tok henia tadikaka ida idia aniani hebou bona ta ta idia hagoadaia.
3. Iseda haroro grup amo heduru ita abia daladia haida be dahaka?
3 Ena be wiki ta ta ai kongrigeisen be nega rua idia hebou, to pablisa ese heduru idia abia noho be mai anina bada. Grup ta ta lalonai naria taudia idia noho, bona idia ese tadikaka taihu ta ta idia hagoadaia bona haroro daladia idauidau idia hadibaia. Bema emu grup naria tauna be oi ida ia do haroro lasi, ia oi noia diba umui gaukara hebou totona. Danu, haroro naria tauna be hua ta ta ai wikeni ta lalonai grup ta ida ia haroro diba. Kongrigeisen maragidia ai, bema haroro grup be momo lasi, reana lagani ta lalonai unai grup ta ta be nega rua ia vadivadi henia diba. Emu grup ia vadivadi henia neganai, emu sediual oi haidaua, ia ida oi haroro totona, a?
4. (a) Haroro grup ta ta be sibona edia teritori ai idia hebou ena namo be dahaka? (b) Dahaka dainai eda ruma ai haroro grup ena hebou idia karaia be mai ena namo?
4 Wikeni ai haroro totona grup ta ta be sibona edia teritori ai idia hebou be mai ena namo. Bema grup ta ta be idia makaia taim ai sibona edia teritori ai idia hebou, pablisa do idia hekwarahi lasi hebou gabuna bona teritori idia lao totona. Unai amo grup naria tauna ese grup do ia haria haraga bona maoromaoro teritori idia lao diba. Bona do ia auka lasi iena grup taudia ia naria totona. To, kongrigeisen ena bada hegeregerena grup rua o ma haida idia haboua diba. Bema kongrigeisen be hua ena Saturday ginigunana ai o Gima Kohorona Stadi murinai haroro totona idia hebou, namona be grup ta ta idia helai hebou bona grup naria tauna ese miniti haida lalonai ena grup ia haria, bena guriguri amo ia koua diba.—Maua ladana “Emu Ruma Oi Henia Diba, A?” itaia.
5. Ena be Kongrigeisen Buka Stadi idia haidaua, to dahaka ita diba momokani?
5 Ena be Kongrigeisen Buka Stadi idia haidaua, to Iehova be ita dekenai heduru ia henia noho ena ura ita karaia totona. (Heb. 13:20, 21) Iehova ese ita ia naria dainai, gau ta dekenai ita dabu lasi. (Sal. 23:1) Iseda haroro grup amo hahenamo momo ita abia diba. Bema ita hekwarahi ‘uhe momo ita hadoa’ ‘anina momo do ita gogoa.’—2 Kor. 9:6.
[Box on page 6]
Emu Ruma Oi Henia Diba, A?
Kongrigeisen haida ai haroro grup ena hebou karaia rumadia be momo lasi dainai, wikeni ai haroro totona grup ibounai be gabu tamona ai idia hebou. Haroro grup edia hebou be kongrigeisen heboudia ena kahana ta, unai dainai unai bamona heboudia be emu ruma ai idia karaia be hahenamo ta. Oi ura emu ruma ai haroro grup ena hebou idia karaia, a? Oi laloa lasi emu ruma ena toana ia namo lasi dainai unuseniai haroro grup ena hebou do idia karaia lasi. Elda taudia ese emu ruma ia noho gabuna bona gau ma haida do idia lalohadailaia, guna buka stadi rumadia idia abia hidi neganai idia karaia hegeregerena. Bema oi ura emu ruma ai haroro grup ena hebou idia karaia, vadaeni grup naria tauna oi hadibaia.