Taitai Taudia Edia Lalona Hagoadaia
1 Ita lalokau henia tauna ta ia mase neganai, ita ibounai ita lalohisihisi—to nega momo Basileia ena helaro ia diba lasi tauna be ia daradoko momokani. (1 Tes. 4:13) Momo idia henanadai: ‘Dahaka dainai taunimanima idia mase? Mase tauna be edeseni ia lao? Egu lalokau tauna do lau itaia lou eiava?’ Haroro gaukara ai ita davaria taudia haida be reana edia varavara ta o turana ta ia mase, bona henunai be idia ita hagoadaia daladia haida ai torea.—Isa. 61:2.
2 Ruma-Ta-Ruma-Ta Ai: Reana ruma tauna ta ia gwau, ena famili lalonai ta ia mase. Iena vairana toana amo oi itaia ia lalohisihisi bada eiava taitai, a? Ruma lalonai varavara momo idia noho, a? Bema unai bamona, aonega dalana be emu haroro herevana oi hakwadogia. (Had. 3:1, 7) Reana ita gwau ita sori ena bese lalonai ta ia mase, bena mase o toreisi lou ia kikilaia pepapepa, magasin, eiava buklet ta ita henia bona mai hemataurai ida ia ita rakatania. Bena dina namona ta ai ita giroa lou diba Baibel amo heduru ma haida ita henia totona.
3 Nega haida ita itaia, ia be nega namona idia ida nega sisina daudau ita kiki totona. Hegeregere, reana Baibel ena gwauhamata—toreisi lou herevadia—ita duahia diba, to unai be nega namona lasi edia lalohadai kereredia ita hamaoromaoroa totona. (Ioa. 5:28, 29) Eiava Baibel amo mase ena anina ita hahedinaraia diba. (Had. 9:5, 10) Eiava Baibel ai toreisi lou sivaraina ta ita gwauraia, unai ese ruma tauna ena lalona ia hagoadaia diba. (Ioa. 11:39-44) Eiava kamonai tauna Iobu ena hereva ita gwauraia, badina ia abia dae Iehova be ia do ia hatorea isi lou. (Iobu 14:14, 15) Ia ita rakatania gwauraia neganai, mase o toreisi lou ia kikilaia pepapepa ta o buklet ta ita rakatania be namo, hegeregere Ita Mase Neganai Dahaka Ia Vara Ita Dekenai? eiava Oiemu Lalokau Tauna ta Ia Mase Neganai. Eiava Baibel Hadibaia bukana ita henia, ena karoa 6 ita kikilaia sisina, bena ita hadibaia do ita lou henia unai kahana ita herevalaia totona.
4 Nega Ma Haida Ai: Bema Kingdom Hall ai ta ena fineral o mase guria herevana do idia karaia, Witnes lasi taudia haida do idia mai, a? Idia dekenai mase o toreisi lou ia kikilaia buka, buklet eiava pepapepa ita henia be namo. Fineral houm o mase taudia idia hagoevaia rumadia ai idia gaukara taudia be mai edia moale ida, mase o toreisi lou idia kikilaia buka, buklet o pepapepa idia abia dae, unai amo mase tauna ena varavara dekenai idia henia diba. Gabu haida ai, niuspepa ena kahana ta dekenai be ta ia mase ena sivarai o hadibaia herevana idia torea—unai be nega namona idia taitai taudia dekenai hagoadaia revareva kwadogina ita siaia totona. Hegeregere, dogae ta bona ena natuna kekeni be unai revareva ta bona pepapepa haida idia abia murinai, pablisa ena ruma dekenai idia lao bona idia henanadai: “Umui be lau dekenai inai revareva umui siaia, a? Badina lau ura Baibel ena hereva ma haida lau diba!” Unai dogae bona ena natuna kekeni be Baibel stadi idia abia dae bona kongrigeisen heboudia dekenai idia lao matamaia.
5 Hadibaia Tauna 7:2 ia gwau: “Taitai ena ruma do oi raka vareai be namo, aria ena ruma do oi raka vareai be dika.” Nega momo ita itaia moale karadia idia laloa bada taudia idia ura lasi Dirava ena hereva idia kamonai, to mase taudia totona idia taitai taudia be idia ura bada Baibel ena hereva idia kamonai. Unai dainai, namona be unai bamona taudia ita tahua bona ita hagoadaia.
[Study Questions]
1. Dahaka dainai taitai taudia ita hagoadaia be namo?
2. Bema ruma tauna ta ia gwau ena famili lalonai ta ia mase, iseda haroro herevana ita halataia be namo, a?
3. Bema ita itaia ia be nega namona ruma tauna ida nega sisina daudau ita kiki totona, vadaeni edena siri do ita gaukaralaia?
4. Edena nega ma haida ai taitai taudia ita hagoadaia diba?
5. Dahaka dainai mase taudia totona idia taitai taudia ita tahua bona ita hagoadaia be namo?