Buklet Matamata Gaukaralaia
1 Vanegai iseda distrik hebouhebou dekenai, ita moale badina buklet matamata, Oiemu Lalokau Tauna ta Ia Mase Neganai ita abia. Taunimanima ibounai ese inai buklet do idia ura henia badina momo idia lalohisihisi edia lalokau taudia idia mase dainai. Ena laulau bona haheitalai namodia dainai hariharilaia be auka lasi. Rau 29 dekenai, Lasaro be mase amo ia toreisi lou laulauna ese ia hahedinaraia Iesu “ia ura bada mase ena dika do ia haorea.” Murina rau ena haheitalai ese tanobada matamata lalonai mai moale bada toreisi lou ia laulaulaia. Unai ese lalohisihisi taudia edia kudouna ia hamoalea be namo!
2 Inai buklet ese idia lalohisihisi taudia do ia durudia momokani. Idia torea dalana ese ita ia durua taunimanima danu ita herevahereva totona. Anina bada hereva hahedinaraia totona, kahana ta ia ore neganai, henanadai be maua lalonai idia toredia to rau ta ta henunai idia toredia lasi. “Inai Oi Laloa” maua be oiemu stiuden ia durua dalana dekenai oi gaukaralaia diba.
3 Ruma-ta-ruma-ta gaukara oi karaia neganai, buklet amo hereva ta oi abia hidi umui kikilaia totona. Reana oi ura rau 2 dekenai buklet ena hereva ruma tauna dekenai oi hahedinaraia, ena ura herevana ia abia hidi totona. Idia ura kikilaia gaudia oi laloa bada. Ia mamia gaudia ia herevalaia murinai, buklet ese edena bamona ia durua diba oi hahedinaraia. Kahana ta ta dekenai Baibel siri momo idia gaukaralaidia helaro namona hahedinaraia totona.
4 Rau 5 dekenai hereva kwarana “Helaro Momokanina ta Ia Noho” ese Baibel ena helaro mase taudia totona ia hahedinaraia. Unai hereva ese edia lalona ia veria diba “Mase Taudia Edia Helaro Momokanina” rau 26-31 dekenai umui herevalaia totona. Rau 27 ena maua lalonai “Lalona Hagoadaia Baibel Siridia” haida idia noho. Ia lalohisihisi ruma tauna do ia diba haraga Iehova be “durua ibounai ia henia Diravana.”—2 Kor. 1:3-7.
5 Aonega dalanai, kahana ta ta ese taunimanima edia hemami lalokau tauna ia mase neganai, idia herevalaia. Edena bamona ta ia lalo-goada diba, bona haida be unai lalohisihisi negana ai edena bamona idia heduru diba, idia hahedinaraia. Rau 25 dekenai maua ta ladana “Natudia Oi Durudia Mase Dekenai Idia Lalo-Parara Totona” ia noho. Unai ese tama sina ia durudia diba unai hekwakwanai idia davaria neganai.
6 Kopi ta oi abia loaloa, nega idauidau bona gabu idauidau dekenai haroro totona. Reana emu teritori lalonai funeral home oi nanadaidia, bema idia ura haida idia abia mase tauna ena varavara taudia henidia totona. Eiava edia varavara ena gara gabuna idia vadivadi henia taudia dekenai oi hariharilaia diba mai hemataurai ida.
7 Ita moale badina Iehova Dirava be “hisihisi idia abia noho taudia ia durua Diravana.” (2 Kor. 7:6) Ita moale badina ita danu ‘taitai taudia ibounai ita durudia’ diba.—Isa. 61:2.