“Egu Huaia Auna be Emui Pagana Dekenai Do Umui Atoa”
1 Lalometau gaudia amo ia honu tanobadana lalonai ita be Iesu ena boiboi herevana—ena huaia auna ita huaia totona—ita abia dae dainai ita moale. (Mat. 11:29, 30) Hahediba taudia halaoa gaukarana ita karaia be mai ena hekwarahi, to moale ia havaraia danu. Basileia ena sivarai namona ita harorolaia bona ma haida ita durua Iesu ena huaia auna idia abia dae totona be moale gauna.—Mat. 24:14; 28:19, 20.
2 Haroro Gaukara amo Moale Ita Davaria: Iesu ia gwau lasi iena hahediba taudia be idia huaia maduna idauidau latanai maduna ma ta do ia henia. To, Iesu ena hahediba taudia be gaukara metauna idia karaia dainai, idia ia boiria edia maduna be ia dekenai idia henia, bona iena metau lasi maduna idia huaia totona. Unai dainai, ita be inai tanobada ena lalometau gaudia ese ita idia hametaua lasi bona kohu momo ita tahua lasi. (Luka 21:34; 1 Tim. 6:17) Momokani, ena be ita bisi bada bona dina ta ta ai tauanina durua gaudia ita abia totona ita gaukara be namo, to iseda mauri lalonai Dirava tomadiho henia karana be mai anina bada. (Mat. 6:33) Bema mai anina bada gaudia dekenai lalohadai maorona ita abia, eda haroro gaukara do ita moalelaia bona ia be metau lasi.—Fili. 1:10.
3 Bema ita be gau ta ita laloa bada, ita ura unai gau be ma haida dekenai ita herevalaia. (Luka 6:45) Keristani taudia ese idia laloa bada gauna be inai: Iehova bona iena Basileia ese do ia havaraia hahenamo idauidau. Unai dainai, “Sivarai Namona” ita harorolaia neganai, ita ia hagoadaia bona dina ta ta ena lalohekwarahi gaudia idauidau ita laloa momo lasi! (Roma 10:15) Momokani, gaukara ta ita karaia hanaihanai neganai, unai gaukara do ita manadalaia bona do ita moalelaia. Unai dainai, bema iseda goada hegeregerena haroro gaukara ita goadalaia, unai ese iseda moale ia habadaia diba. Bona taunimanima ese ita harorolaia sivarai namona idia abia dae neganai, do ita moale bada! (Kara 15:3) Ena be haida be ita idia dagedage henia eiava idia ura lasi sivarai namona idia kamonai, to namona be ita laloatao haroro gaukara ita karaia badina ita ura Iehova ita hamoalea. Bona Iehova ese ita ia hanamoa dainai, anina namona ita havaraia.—Kara 5:41; 1 Kor. 3:9.
4 Iesu ena boiboi herevana ita abia dae bona ita be Iehova ena Witnes taudia dainai ita moale. (Isa. 43:10; Apok. 1:5) Unai gaukara ese moale korikori ia havaraia!