“Lauegu Huaia Auna be Ia Metau Lasi, Bona Huaia Neganai Danu Hekwarahi Lasi”
“Egu huaia auna be emui pagana dekenai do umui atoa, lau dekenai diba do umui tahua.”—MATAIO 11:29.
DINA siahuna ta ena dokonai ranu keruma lalonai ita digudigu neganai, eiava laolao daudauna murinai ita mahuta namonamo neganai, goada matamatana ita abia unai! Bona ta ese iseda maduna metauna ia kokia neganai eiava eda dika ia gwauatao neganai be unai hegeregerena. (Aonega Herevadia 25:25; Kara 3:19) Unai ese ita ia hagoadaia lou, bena ita hegeregere gaukara ma haida do ita karaia.
2 Maduna metau taudia bona tauanina manokamanoka taudia be Iesu dekenai idia mai be namo, badina be ia gwauhamata laga-ani o goada matamatana do ia henidia. To, taunimanima ese idia ura henia laga-anina abia totona, namona be ta ena lalona be hegeregere kara ta do ia karaia. Iesu ia gwau: “Egu huaia auna be emui pagana dekenai do umui atoa, lau dekenai diba do umui tahua . . . Vadaeni emui laumana be do idia laga-ani.” (Mataio 11:29) Unai huaia auna be dahaka? Ia ese laga-ani edena bamona ia henia?
Huaia Auna mai Ena Metau Lasi
3 Biru taudia bogaragidiai idia noho dainai, Iesu bona ena hereva idia kamonai taudia be huaia auna idia diba momo. Huaia auna be au latana ta, ena henuna kahana ai, gabu rua dekenai matu idia karaia, bena boromakau rua, eiava ma animal rua, edia aiona latanai idia atoa; unai amo idia kwatudia hebou, tano geia aurina, eiava treila, eiava gau idauna ta do idia veria totona. (1 Samuela 6:7) Taunimanima danu ese huaia audia idia gaukaralaia. Au ta ena duduna duduna dekenai maduna idia kwatua bena au be edia pagana dekenai idia huaia. Unai au amo gaukara taudia ese maduna metaudia idia huaia diba. (Ieremia 27:2; 28:10, 13) Ia amo maduna idia huaia bona gaukara idia karaia, unai dainai Baibel lalonai nega momo huaia auna idia gwauraia, taunimanima biagua siahuna laulaulaia gauna bamona.—Deuteronomi 28:48; 1 King Taudia 12:4; Kara 15:10.
4 Vadaeni, huaia auna, Iesu be ia gwau laga-ani abia totona ia dekenai do idia mai taudia ese do idia abia gauna, be dahaka? Iena hereva mani oi laloa lou; ia gwau: “Egu huaia auna be emui pagana dekenai do umui atoa, lau dekenai diba do umui tahua.” (Mataio 11:29) Diba tahua tauna be hahediba tauna. Unai dainai, ta ese Iesu ena huaia auna ia huaia, anina be iena hahediba tauna ai ia lao. (Filipi 4:3) To, unai ena anina be, ta ese ena hahediba herevadia do ia diba sibona lasi, to idia hegeregeredia do ia kara danu—ia karaia gaukarana do ia karaia bona iena mauri dalana do ia badinaia. (1 Korinto 11:1; 1 Petero 2:21) Anina be iena siahu bona siahu ia henidia taudia do ia kamonai henidia mai ena ura ida. (Efeso 5:21; Heberu 13:17) Anina be gwauhamata bona bapatiso Keristani tauna ta ai do ia lao, bona ena gwauhamata dainai ia abia hahenamodia bona gaukaradia do ia abia dae. Goada bona laga-ani abia totona Iesu dekenai idia mai taudia, be ia ese unai huaia auna ia henidia gwauraia. Oi ura do oi abia dae, a?—Ioane 8:31, 32.
5 Huaia auna ia huaia tauna be ia laga-ani be auka, a? Lasi, badina be Iesu ia gwau ena huaia auna be “metau lasi.” Anina be ia manada bona ia be namo. (Mataio 11:30; Luka 5:39; Roma 2:4; 1 Petero 2:3) Iesu be kamuta tauna dainai, toana be ia ese tano geia gaudia bona huaia audia ia karaia vadaeni, bona ia diba huaia auna ta be edena bamona ia karaia be namo, bena au matuna be animal ena aiona ena bada hegeregerena dainai, maduna metauna ia huaia diba mai ena hekwarahi bada lasi. Reana dabua o boromakau kopina be huaia audia edia henuna kahana dekenai ia hakapua. Unai gau momo be unai bamona idia karaia, bena aiona dekenai toto idia havaraia lasi. Unai hegeregerena, Iesu ese ita ia henia gwauraia maduna auna be “metau lasi” gauna bamona ita moalelaia diba. Ena be ta be ena hahediba tauna ai ia lao dainai gaukara bona maduna haida ia abia, to idia be auka lasi bona idia hahisia lasi, to idia amo goada ia abia. Iena Tamana guba ai, Iehova, ena taravatu danu be metau lasi.—Deuteronomi 30:11; 1 Ioane 5:3.
6 Gau ma ta dainai Iesu ena huaia auna ia “metau lasi” bona ta ese ia huaia be haraga. Inai hereva: “Egu huaia auna be emui pagana dekenai do umui atoa,” be ia gwauraia neganai, reana ia ese mai matuna rua huaia auna, animal rua be maduna ta do idia veria hebou totona edia aiona dekenai idia atoa bena idia kwatulaidia hebou gauna ia herevalaia. Bema unai bamona, anina be ita ia boiria, ia huaia auna be ia ida do ita huaia hebou. Iesu be ita badibadinai iseda maduna be ita ida ia huaia be hahenamo badana! To, bema Iesu ese gaukara tauna ia gaukaralaia maduna auna ia herevalaia, anina be heduru be ita ia henia gwauraia, iseda maduna do ita huaia mai eda hekwarahi lasi totona. Herevana edena ia herevalaia, iena huaia auna amo goada o laga-ani korikori ita davaria diba, badina be ita ia hamaoroa, ia gwau: “Badina lau be dagedage lasi bona manau tauna.”
7 Vadaeni, bema ita laloa ita huaia madunana, mauri ena lalo-hekwarahi idauidau unai, ena metau ia bada dainai ita haheaukalaia diba lasi, dahaka ita karaia be namo? Reana haida idia laloa kerere, idia laloa idia be Iesu Keriso ena hahediba taudia dainai idia huaia auna be metau herea eiava ia dainai idia hekwarahi bada, to gauna be dina ta ta edia hekwarahi ese ia hametaudia. Unai bamona taudia haida ese Keristani heboudia lao henidia karana idia hadokoa, eiava haroro gaukarana idia rakatania, badina be idia laloa reana unai amo laga-ani do idia davaria diba. To, unai be kerere badana.
8 Ita diba Iesu ese ita ia henia maduna auna be “metau lasi.” Bema iseda pagana dekenai ita atoa namonamo lasi, toto ia havaraia diba. Unai dainai namona be iseda pagana dekenai ia noho auna ita sekea namonamo. Bema gau ta ese ia hadikaia sisina eiava ita atoa kerere, ia dainai do ita hekwarahi bona ita do ia hahisia danu. Unai ena anina be, bema mamina ita abia tiokratik gaukaradia ese ita idia hametaua matamaia, namona be ita sekea namonamo, dala maorona ai ita karadia eiava lasi. Dahaka dainai ita karadia? Hebou ita lao henidia neganai, ita hegaegae namonamo vadaeni, a? Haroro gaukarana ita karaia neganai, eda tauanina bona eda lalona idia hegaegae, a? Kongregesen taudia ita tura henidia bona edia hebamo ita moalelaia, a? Bona, gau badana be inai: Ita be Iehova Dirava bona ena Natuna, Iesu Keriso, ida ita hetura karana be edena bamona?
9 Iesu ese ita ia henia huaia auna ita abia dae mai eda lalona ibounai ida bona huaia dalana maorona ita manadalaia neganai, badina ta ia noho lasi do ita laloa ia be ita huaia diba lasi madunana ta. Momokani, bema inai ita laloa—ita huaia auna be Iesu ida nega tamona ita huaia—ita diba daika ese metau ena kahana badana ia huaia. Unai be hegeregere meromero ta ese ena gui gauna (stroller) ena imana ia dogoatao, ia laloa ia ese ia toia, to gauna be ena sinana ese ia toia. Iehova Dirava be eda Tamana mai ena lalokau, unai dainai iseda goada ena hetoana bona iseda manoka ia diba momokani, bona iseda dabu hegeregerena Keriso ena amo ita ia durua. Paulo ia gwau: “Egu Dirava be mai ena kohu namodia momo herea, Keriso Iesu ena hairai diarina dainai. Unai Keriso lalonai ia abia gau namodia momo dekena amo, Dirava ese umui dekenai hegeregere lasi gaudia ibounai, be umui dekenai do ia henia, hegeregere momokani.”—Filipi 4:19; ma danu Isaia 65:24 itaia.
10 Gwauhamata Keristani taudia momo be edia mauri lalonai idia vara gaudia amo unai idia lalo-pararalaia. Idia ta be Jenny; ena lalona ia hekwarahi bada, badina be heduru painia gaukarana be hua iboudiai ia karaia bona moni gaukarana aukana be ful-taim ia karaia danu. To, mamina ia abia painia gaukarana ese ia durua ia laloa namonamo totona. Baibel ena hereva momokani be taunimanima ia hadibalaidia, bona ia itadia, edia mauri dalana idia haidaua Dirava ena lalo-namo do idia abia totona—unai ese ia hamoalea bada, herevana ia bisi momokani. Ia ese inai aonega herevana ia abia dae mai ena lalona ibounai ida: “Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.”—Aonega Herevadia 10:22.
Maduna Haragana
11 Iesu ese ita ia gwauhamata henia, ia gwau ena huaia auna be “metau lasi,” ma ia gwau: “Huaia neganai danu hekwarahi lasi.” “Metau lasi” huaia auna dainai ta ena gaukara ia auka lasi; bema ena maduna danu idia haharagaia, ena gaukara ia moalelaia momokani diba. To, Iesu ese unai hereva ia gwauraia neganai, dahaka ia laloa?
12 Biru tauna ese ena animal edia gaukara ia haidaua gwauraia neganai ia karaia karana, be mani oi laloa. Bema treila do idia veria totona, tano geia aurina veria gaukarana amo ia hadokodia gwauraia, tano geia aurina do ia kokia guna, bena treila be idia dekenai do ia kwatua. Bema tano geia aurina bona treila danu be ena animal dekenai nega tamona ia kwatua, unai be kavakava karana. Unai hegeregerena, Iesu ese taunimanima ia hamaorodia lasi iena maduna be idia huaia noho madunana latanai do idia atoa. Lasi. Ena hahediba taudia ia hamaorodia, ia gwau: “Hesiai tauna ta ese iena biaguna rua edia hesiai gaukara ia karaia diba lasi.” (Luka 16:13) Unai hegeregerena, Iesu ia ura taunimanima ese maduna rua amo ta do idia abia hidi. Idia ura idia huaia noho madunana metauna be do idia huaia noho, a? Eiava idia ura unai do idia atoa diho bena ia henidia gwauraia gauna do idia abia dae, a? Mai ena lalokau ida Iesu ese ia ha-uradia; ia hamaorodia ena maduna be haraga, “hekwarahi lasi.”
13 Iesu ena nega lalonai, taunimanima idia hekwarahi bada, Roma lohia taudia dagedagedia bona tomadiho gunalaia taudia koikoidia ese idia latanai idia atoa madunana metauna dainai. (Mataio 23:23) Roma lohia siahuna metauna kokia totona, haida ese kara haida idia karaia toho. Politikol tuaridia ai idia vareai, bena mase idia davaria. (Kara 5:36, 37) Ma haida idia ura bada edia noho do idia hanamoa, unai dainai kohu abia karana idia goadalaia. (Mataio 19:21, 22; Luka 14:18-20) Unai amo do idia laga-ani totona Iesu ese ia boiridia iena hahediba taudia ai do idia lao, to haida edia lalona be hegeregere lasi unai bamona do idia karaia. Ena be idia huaia madunana ia metau, to idia ura lasi do idia atoa diho iena do idia abia totona. (Luka 9:59-62) Kerere bada unai!
14 Bema ita naria namonamo lasi, hari inai negai unai bamona ita kara kerere diba. Iesu ena hahediba taudia ai ita lao neganai, unai ese tanobada taudia idia tahua goadagoada gaudia tahudia karana ena hekwarahi amo ita ia ruhaia. Ena be do ita gaukara goada tauanina durua gaudia abia totona, to ita lalodia bada lasi. To, mauri ena lalo-hekwarahi bona kohu namodia ura henia urana ese ita idia guia auka masemase diba. Ena be hereva momokani be guna ita abia dae mai eda ura bada ida, to bema ita naria namonamo lasi, unai ura dikadia ese do idia koua diba. (Mataio 13:22) Bema unai bamona uradia hagugurua karana ita goadalaia, iseda Keristani madunadia be maduna metaudia ai do idia lao diba, bena unai gaukara do ita karaia mai eda hesiku ida. Bema iseda lalohadai be unai bamona, Dirava ena hesiai lao henia karana amo goada matamatana o laga-ani do ita davaria diba lasi.
15 Iesu ese ia hahedinaraia, iseda lalona do idia hegeregere totona, namona be iseda ura iboudiai do ita hagugurua toho lasi, to mauri ena anina bada gaudia do ita dibaia be namo. Ia gwau: “Mai gari danu umui laloa momo lasi emui noho mauri dekenai, dahaka do umui ania, o dahaka do umui inua, o tauanina ena dabua dekenai. Mauri be gau badana, to aniani be gau maragi, ani? Tauanina ese be dabua ia hanaia, ani?” Bena atai manudia ia herevalaia, ia gwau: “Idia be hadoa lasi, idia geia lasi, naria gabuna dekenai aniani idia haboua lasi. To emui Tamana guba dekenai noho ese unai manu ia naria namonamo.” Ma danu tano ena herahera ia herevalaia, ia gwau: “Idia gaukara lasi, dabua idia turia lasi. To umui lau hamaoroa, Solomona be mai ena kohu momo, to iena dabua be herahera ta ena hairai hegeregerena lasi.”—Mataio 6:25-29.
16 Unai haheitalai haragadia amo gau ta ita dibaia diba, a? Taunimanima momo ese idia davaria, moni bona kohu amo edia noho do idia hanamoa totona bema idia gaukara goada, tanobada gaukaradia momo ese idia guidia bona edia maduna idia hametaua. Bisinesi taudia momo herea ese edia gaukara amo moni bona kohu momo idia abia, to unai dainai edia ruma bese idia parara, edia headava idia dika, gorere idia davaria, bona ma hisihisi haida danu. (Luka 9:25; 1 Timoteo 6:9, 10) Nobel praisi ia abia tauna, Albert Einstein, ia gwau: “Lauegu lalohadai be, bema ta ese kohu momo ia abia, eiava taunimanima vairanai ia kwalimu, eiava ena ladana be bada, eiava kohu namo herea ia abia, unai ibounai be anina lasi. Lau laloa taunimanima ese namo bada idia davaria dalana be, mai edia kohu momo lasi idia noho mai edia lalo-manau ida.” Unai be aposetolo Paulo ena hereva hegeregerena; ia gwau: “Dirava ia badinaia tauna ese kohu momokani do ia davaria. Oibe, ia davaria, badina unai tau be mai ena kohu namona, gauna be, iena lalona be namo.”—1 Timoteo 6:6.
17 Namona be inai anina bada gauna ita laloaboio lasi: Ena be “mai edia kohu momo lasi idia noho mai edia lalo-manau ida” be mai ena namo idauidau, to unai bamona mauri dalana sibona dainai ta ena lalona do ia hegeregere lasi. Taunimanima momo be mai edia kohu momo lasi ena badina tamona be idia abia dalana be lasi; edia lalona idia hegeregere lasi bona idia moale lasi. Baibel ese ita ia hagania lasi kohu moalelaia karana do ita dadaraia vaitani. To ia hahedinaraia siboda eda ura hagugurudia karana lasi, to Dirava badinaia karana be gau badana. Unai kara amo “kohu momokani” do ita davaria diba. Dahaka kohu? Ena revareva lalonai Paulo be ma ia gwau: “Inai tanobada ena kohu do idia abidadama henia lasi, to Dirava sibona do idia abidadama henia” taudia ese “edia kohu korikori do idia haboua hegaegae, edia mauri gabeai do ia durua totona.”—1 Timoteo 6:17-19.
18 Bema ita siboda eda maduna metauna ita atoa diho bena Iesu ese ita ia henia gwauraia madunana haragana ita abia dae, goada matamatana bona laga-ani do ita abia. Taunimanima momo ese edia mauri dalana idia haidaua Basileia gaukarana bada do idia karaia totona, bena do idia moale bona edia lalona do idia hegeregere dalana idia davaria. Momokani, ta be unai bamona do ia karaia totona, namona be ia be mai ena abidadama bona mai ena boga auka, bona reana hekwakwanai haida do ia davaria. To Baibel ia gwau: “Bema oi noho kava, noho kava, ela bona lai bona medu idia namo neganai, oi be gau ta do oi hadoa lasi, bona tano ena anina ta do oi davaria lasi.” (Hadibaia Tauna 11:4) Bema iseda lalona ita hadaia auka kara haida do ita karaia, do ita davaria unai kara momo be idia auka momokani lasi. Toana be iseda lalona hadaia karana be auka herea. Reana unai ita lalo-hekwarahilaia ela bona iseda lalona idia hesiku. To bema iseda lalona ita hagoadaia bona unai hekwarahi ita abia dae, unai kara amo do ita davaria hahenamona be reana do ita hoalaia. Salamo torea tauna ia gwau: “Lohiabada ena kara do umui tahua namonamo, iena dala do umui tohoa namonamo, vadaeni do umui diba momokani, Lohiabada be namo momokani.”—Salamo 34:8; 1 Petero 1:13.
“Emui Laumana be Do Idia Laga-Ani”
19 Aposetolo Paulo ese hahediba taudia iena negai idia noho ia hamaorodia, ia gwau: “Hisihisi momo lalonai Dirava ena Basileia do ita raka vareai.” (Kara 14:22) Unai be mai anina hari inai negai danu. Tanobada ia dika ia lao noho lalonai, idia ura do idia kara maoromaoro bona Dirava do idia badinaia taudia iboudiai ese hekwarahi momo do idia davaria. (2 Timoteo 3:12; Apokalupo 13:16, 17) To, ita laloa Paulo ia laloa hegeregerena; ia gwau: “Kahana ibounai dekena amo, hisihisi bona metau ai dekenai idia henia noho, to ai idia hadikaia momokani lasi. Nega haida ai laloa daradara, to gaukara dekena amo ai doko lasi. Taunimanima momo ese ai idia dagedage henia, to Dirava ese ai ia rakatania lasi. Ai idia botaia, ai moru, to ai mase lasi.” Badina be Iesu Keriso ita abidadama henia bona ita diba siahu bada do ia henia ita dekenai. (2 Korinto 4:7-9) Bema hahediba tauna ena huaia auna ita abia dae mai eda lalona ibounai ida, Iesu ena gwauhamata ena anina do ita abia: “Emui laumana be do idia laga-ani.”—Mataio 11:29.
Oi Gwauraia Diba A?
◻ Huaia auna namona, Iesu ese ia henia gauna, be dahaka?
◻ Bema mamina ita abia ita huaia auna ese ita ia hametaua matamaia, dahaka ita karaia be namo?
◻ Iesu ena hereva, “Huaia neganai danu hekwarahi lasi,” ena anina be dahaka?
◻ Dahaka ita karaia be namo, bena iseda maduna do ia haraga noho bona ita do ia hahekwarahia lasi?
[Study Questions]
1, 2. (a) Emu mauri lalonai, dahaka kara dainai goada matamatana oi abia? (b) Namona be ta ese dahaka ia karaia, Iesu ese ia gwauhamatalaia laga-anina do ia abia totona?
3. (a) Baibel negadiai edena bamona huaia audia idia gaukaralaia? (b) Huaia auna ese dahaka ia laulaulaia?
4. Iesu dekenai idia mai taudia ia henidia gwauraia huaia auna ese dahaka ia laulaulaia?
5. Dahaka dainai Iesu ena huaia auna ia huaia tauna ese do ia hisihisilaia lasi?
6. Reana Iesu ena hereva, “Egu huaia auna be emui pagana dekenai do umui atoa,” ena anina be dahaka?
7, 8. Edia lalona idia metau herea neganai, haida ese dahaka kerere idia karaia?
9. Dahaka dainai namona be ita laloa lasi Keristani huaia auna be ita huaia diba lasi madunana?
10. Hahediba tauna ena maduna ia laloa namonamo hahinena ta ena sivarai be dahaka?
11, 12. Iesu ena hereva, “Huaia neganai danu hekwarahi lasi,” ena anina be dahaka?
13. Iesu ena negai taunimanima ese dahaka maduna idia huaia, bona unai dainai dahaka ia vara?
14. Mauri ena lalo-hekwarahi bona kohu ura henia urana ese edena dala ai ita idia hametaua diba?
15. Iesu ese kohu ura henia karana be edena bamona ia sisibalaia?
16. Kohu tahua karana ese dahaka anina ia havaraia?
17. Edena bamona mauri dalana be Baibel ese ia gwauraia namo?
18. (a) Edena dala amo ta ese goada matamatana korikorina do ia davaria diba? (b) Bema iseda kara haida ita haidaua be namo, unai be edena bamona ita laloa be namo?
19. (a) Ita diba tanobada ia dika ia lao noho lalonai, dahaka do ita davaria diba? (b) Iesu ia gwauhamata ena huaia auna henunai ita noho lalonai, dahaka do ita abia?