Hahenamo Momo Do Oi Abia!
1 Emu mauri lalonai oi ura oi moale, a? Ma haida durua karana dekenai oi moale, a? Oi ura Iehova totona emu hesiai gaukara oi habadaia, a? Bema inai henanadai ta dekenai emu haere be oibe, vadaeni regula painia gaukara oi lalohadailaia diba. To, ruma bese ena maduna bona maduna ma haida, oi gorere momo eiava lasi, unai gaudia oi laloa be namo.
2 Solomona ia gwau, Iehova ena hanamoa sibona ese ita dekenai kohu momo do ia henia. (Aon. 10:22) Hari inai negai, unai kohu momo be Dirava ena hesiai gaukara lalonai ita abia hahenamo idauidau. Regula painia taudia be unai hahenamo momo idia abia. Hegeregere, idia moale bada bema edia nega bada idia gaukaralaia ma haida idia hadibaia totona. (Kol. 4:5; Kara 20:35) Mai lalokau ida ita karaia gaukara be Iehova ese ia itaia bona ia laloa bada. Unai amo, iseda ‘kohu be guba dekenai do ita haboua’ bona do ia dika lasi. (Mat. 6:20; Heb. 6:10) Bona danu, painia taudia be edia mauri lalonai gau momo idia tahua lasi bona Iehova dekenai idia tabekau Ia ese idia ia durua totona, bona edia hetura karana Iehova ida idia hagoadaia.—Mat. 6:22, 25, 32; Heb. 13:5, 6.
3 Tanobada ena kohu momo tahua karana ese “ura dikadia bona ura kavakava” ia havaraia diba. (1 Tim. 6:9, 10; Iam. 5:1-3) To, Iehova ese ia henia hahenamo be unai bamona lasi. Regula painia taudia be haroro gaukara lalonai nega bada idia henia dainai, unai ese idia ia durua mai anina bada gaudia idia laloa bada totona. (Fili. 1:10) Tadikaka ta be painia gaukara ia karaia totona ena nega bada ia haorea ensinia gaukara ia rakatania. Ia gwau: “Moni gaukara dekenai lau moale lasi. To painia gaukara lau moalelaia. Taunimanima ma haida lau durua hereva momokani idia dibaia dainai, lau moale bada.”
4 Hahenamo Ma Haida Dekenai: Hari ita be “nega ena dokona” dekenai ita noho dainai, taunimanima momo be metau dikadia momo idia davaria. (2 Tim. 3:1) Taunimanima momo idia ura mauri namona idia noholaia. Basileia sivaraina idia harorolaia taudia be idia moale, badina idia itaia lalohisihisi taudia be mai moale ida sivarai namona idia abia dae. Unai ese regula painia taudia ia hamoalea, badina idia be lagani ta ta ai hahemauri gaukarana lalonai hora 800 mai kahana idia gaukaralaia!—1 Tim. 4:16.
5 Regula painia gaukara oi lalohadailaia vadaeni, a? Bema emu haere be oibe, anina bada lasi gaudia dekenai nega do oi haorea kava lasi. (Efe. 5:15, 16) Momo be unai bamona idia karaia bona edia mauri lalonai gau momo idia tahua lasi, unai amo pat-taim moni gaukara idia karaia bona edia hesiai gaukara idia habadaia diba. Oi be dala oi karaia unai bamona oi karaia totona, a?
6 Iehova oi noia oi ia durua, unai amo sediual namona oi karaia diba. (Iam. 1:5) Dahaka hahenamo do oi abia? Iehova ena hesiai gaukara lalonai hahenamo momo do oi davaria! Iehova be tauanina dalanai oi do ia naria danu. (Mat. 6:33) Unai bamona idia karaia taudia dekenai Iehova ia gwauhamata, ‘gau namodia momo herea idia dekenai do ia bubua diho.’—Mal. 3:10.
[Study Questions]
1. Dahaka dainai regula painia gaukara oi lalohadailaia?
2. Regula painia taudia ese idia moalelaia hahenamo haida oi gwauraia.
3. Iehova ese ia henia hahenamo bona tanobada ena kohu momo tahua karana edia idau be dahaka?
4. Edena dala ai regula painia taudia be hahenamo ta ma haida dekenai?
5, 6. Regula painia gaukara oi karaia totona, dahaka oi karaia be namo?