Henanadai Mauana

◼ Tiokratik Haroro Sikuli bona Hesiai Hebou lalonai, tok ta ta murinai tadikaka taihu edia imana idia patapataia be maoro, a?

Iehova, Havaraia Tauna be tanobada ia karaia neganai, “dina ena daba neganai, daba ena hisiu be idia ane abia hebou, bona guba ena aneru ibounai, be mai moale danu idia boiboi.” (Iobu 38:7) Guba aneru ibounai be mai moale danu Iehova idia hanamoa, badina ia havaraia gaudia amo Iena aonega, hariharibada, bona siahu ia hahedinaraia.

Iseda tadikaka edia hekwarahi bona idia henia tok namodia dainai, idia ita hanamoa be namo. Hegeregere, hebouhebou badadia dekenai tadikaka ese tok bona haheitalai idia karaia murinai, imana ita patapataia. Unai tok bona haheitalai be nega bada lalonai idia hegaegaelaia. Unai dainai, imana ita patapataia karana ese ia hahedinaraia ita be tadikaka ese idia henia tok ita laloa bada bona Iehova, ena orea bona Baibel amo ia henia hakaua herevadia dainai ita tanikiu.​​—Isa. 48:17; Mat. 24:​45-​47.

Tiokratik Haroro Sikuli bona Hesiai Hebou lalonai, tok ta ta murinai unai bamona ita karaia danu, a? Bema imana patapataia karana be ma haida hanamoa karana ta, unai be taravatu lasi. Hegeregere imana ita patapataia diba bema stiuden ta be ena nega ginigunana Tiokratik Haroro Sikuli dekenai kahana ta ia henia. To, bema tok ta ta murinai imana ita patapataia, ia be ita karaia kava gauna ai ia lao diba. Unai dainai, tok ta ta murinai imana ita patapataia lasi.

Ena be Tiokratik Haroro Sikuli bona Hesiai Hebou lalonai, tok ta ta murinai imana ita patapataia lasi, to dala ma haida idia noho ita abia hakaua herevadia bona tok idia henia tadikaka ita hanamoa totona. Unai ita karaia dalana ta be, tok idia henia tadikaka edia hereva ita kamonai namonamo. Bona hebou ia ore murinai, reana tadikaka be ia hekwarahi tok ia hegaegaelaia namonamo dainai, ia ita tanikiu henia diba.​​—Efe. 1:​15, 16.