Hari Dirava Ena Basileia Oi Durua be Namo!
Mani inai oi laloa, lai-gubana ta be kahirakahira emu gabu ai do ia vara. Gavamani orea haida be taunimanima dekenai hadibaia herevana idia halasia, idia gwau: “UMUI HEAU! ROHO MAURI GABUNA TA UMUI TAHUA!” Dahaka do oi karaia? Roho mauri gabuna ta dekenai oi heau lao.
Unai haheitalai hegeregerena, kahirakahira ita ibounai be “dika badana” do ita davaria, Iesu ese unai ia gwauraia “hisihisi badana.” (Mataio 24:21) Unai hisihisi badana be do ita reaia diba lasi. To gau ta ita karaia diba ita heau mauri totona. Unai be dahaka?
Iesu Keriso ena Ororo Harorona ai, inai hahegani ia henia, ia gwau: “Nega ibounai Dirava ena Basileia bona ena kara maoromaoro do umui tahua guna.” (Mataio 6:33) Edena dala ai unai do ita karaia?
Dirava ena Basileia do umui tahua guna. Inai ena anina be gau ibounai amo Dirava ena Basileia ita laloa bada be namo. (Mataio 6:25, 32, 33) Dahaka dainai? Badina taunimanima be hegeregere lasi sibodia edia hekwakwanai idia hamaoromaoroa totona. Dirava ena Basileia sibona ese unai do ia karaia diba.
Ena kara maoromaoro do umui tahua. Namona be ita gaukara goada Dirava ena kara maoromaoro taravatudia bona hakaua herevadia hegeregerena ita noho. Dahaka dainai? Badina bema maoro bona kerere dekenai sibona abia hidi ita karaia, dika do ita davaria. (Aonega Herevadia 16:25) To bema Dirava ena taravatu hegeregerena ita noho, Dirava do ita hamoalea sibona lasi to danu mauri namona do ita abia.—Isaia 48:17, 18.
Nega ibounai Dirava ena Basileia bona ena kara maoromaoro do umui tahua guna. Iesu ia gwau, moni momo abia karana ese haida do ia hakaua kerere bona do idia laloa moni ese idia do ia gimaia. Ma haida be mauri ai gau momo idia lalohekwarahilaia dainai, idia dekenai nega be lasi Dirava ena Basileia idia tahua totona.—Mataio 6:19-21, 25-32.
To, Iesu ia gwauhamata Dirava ena Basileia idia durua taudia be hari edia mauri durua gaudia idia abia diba bona vaira negai hahenamo momo do idia moalelaia.—Mataio 6:33.
Ena be aposetolo edia negai Iesu ena hahediba taudia ese Dirava ena Basileia bona ena kara maoromaoro idia tahua guna, to edia mauri ai hisihisi idia do mamia noho. To Dirava ese idia ia gimaia. Edena dala ai?
Dirava ena kara maoromaoro taravatudia idia badinaia dainai, unai ese idia ia gimaia bona Dirava ena hereva idia dadaraia taudia ese idia davaria hisihisi idia abia lasi. Basileia do ia mai idia abidadama henia dainai, unai ese idia ia durua idia vara hekwakwanai badadia idia haheaukalaia totona. Bona Dirava ese idia dekenai “taunimanima edia siahu ia hereaia gauna” ia henia idia haheauka totona.—2 Korinto 4:7-9.
BASILEIA DO OI TAHUA GUNA, A?
Keristani taudia ginigunadia be Iesu ena hahegani, Basileia tahua guna idia badinaia. Idia ese tanobada ena kahana ibounai dekenai sivarai namona idia harorolaia. (Kolose 1:23) Hari inai negai, ta be unai gaukara ia karaia noho, a?
Oibe! Iehova ena Witnes taudia idia laloparara kahirakahira Dirava ena Basileia ese inai nega oromana do ia haorea. So idia gaukara goada Iesu ese ia gwauraia hahegani idia badinaia totona, ia gwau: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.” (Mataio 24:14)
Edena dala ai sivarai namona do oi abia dae? Umui ai hagoadaia Makedonia ena siti, Berea ai idia noho Keristani taudia ginigunadia edia kara umui tohotohoa totona. Aposetolo Paulo amo Basileia ena sivarai namona idia kamonai neganai, ia gwauraia herevana be “mai edia ura bada ida” idia abia dae. Bena “Toretore Helagadia idia tahua namonamo” unai amo idia hamomokania idia kamonai herevadia be momokani eiava lasi bona idia dibaia gaudia idia badinaia.—Kara 17:11, 12.
Unai oi badinaia diba. Dirava ena Basileia bona ena kara maoromaoro oi tahua guna neganai, hari bona vaira negai maino bona noho namo do oi moalelaia ela bona hanaihanai.