Edena Bamona Do Idia Kamonai?

1. Dahaka dainai nega haida haroro gaukara ita karaia be auka, bona dahaka dainai unai gaukara ita hadokoa lasi be namo?

¹ Iehova ena dina be ia mai kahirakahira dainai, namona be taunimanima momo ita durua haraga Dirava bona ena ura idia diba totona. (Ioa. 17:3; 2 Pet. 3:​9, 10) Reana nega haida unai bamona ita karaia be auka, badina iseda haroro gaukara ai momo idia ura lasi Baibel ena hereva idia kamonai bona ita idia kirikirilaia. (2 Pet. 3:​3, 4) To, ita diba iseda teritori ai idia noho taudia haida ese sivarai namona do idia abia dae. Edena bamona taunimanima idia kamonai diba bema ta ia haroro lasi?​​—Roma 10:​14, 15.

2. Edena dala ai aposetolo Paulo ena haheitalai ese ita ia hagoadaia bada?

² Dagedage Ita Davaria Neganai: Namona be haroro gaukara ita karaia noho, badina haida be idia ura Basileia sivaraina idia kamonai. Europe ai, Filipi taudia be aposetolo Paulo ese ia harorolaia sivarai namona idia kamonai taudia ginigunadia. Unuseniai, taunimanima ese Paulo bona Sila idia samania koikoi, au amo idia botaia bona dibura ruma ai idia negea. (Kara 16:​16-​24) To, Paulo be mai gari lasi ida, sivarai namona ia harorolaia noho. Baibel ia gwau, Paulo be Tesalonika ia vadivadi henia neganai, ia be ‘Sivarai Namona, Dirava dekena amo ia mai gauna, ia gwauraia, mai gari lasi danu.’ (1 Tes. 2:2) Momokani, Paulo ese “ita hesiku lasi” ena badina ia hahedinaraia goevagoeva.​​—Gal. 6:9.

3. Dahaka dainai guna idia ura lasi sivarai namona idia kamonai taudia be hari idia ura bada idia kamonai?

³ Guna idia ura lasi kamonai taudia be edia lalohadai idia haidaua bona hari sivarai namona idia kamonai henia. Reana moni ena hekwakwanai, idia gorere, ruma bese lalonai ta ia mase, o tanobada dekenai idia vara kara dikadia dekenai idia gari dainai idia ura sivarai namona idia kamonai. (1 Kor. 7:​31) Natudia haida​​—guna edia tama sina idia ura lasi sivarai namona idia kamonai​​—be hari idia bada bona idia ura sivarai namona idia kamonai. Eda haroro noho karana ese dala ia kehoa, Iehova ena dina ia do ginidae lasi lalonai unai bamona taudia ese “Dirava ena ladana idia noinoi henia” totona.​​—Roma 10:13.

4. Dahaka ese ita ia durua haroro gaukara ita “hadokoa lasi” totona?

⁴ “Hadokoa Lasi”: Dirava bona eda dekena taudia lalokau henia karana ese ita do ia durua, haroro bona hahediba taudia halaoa gaukarana ita “hadokoa lasi” totona, aposetolo taudia bamona. (Kara 5:​42) Hari inai negai, taunimanima momo be idia itaia “kara dika rohoroho ibounai . . . dainai idia taitai noho, bona idia lalohisihisi noho.” (Ese. 9:4) Momokani, unai bamona taudia ese sivarai namona idia kamonai neganai, unai ese idia ia hagoadaia bona helaro namona idia abia! Ena be taunimanima momo idia ura lasi sivarai namona idia kamonai, to Baibel ese ita ia hagoadaia Iehova be iseda hekwarahi dainai ia moale bada.​​—Heb. 13:​15, 16.