Haroro Gaukara ese Iseda Hetura Karana Iehova ida Ia Hagoadaia

1. Haroro gaukara amo dahaka namo ita abia?

¹ Haroro gaukara ita goadalaia neganai, unai ese iseda hetura karana Iehova ida ia hagoadaia bona iseda moale ia habadaia. Oibe, haroro gaukara ita goadalaia ena badina badana be Iehova ita hamoalea totona. To, ‘Sivarai Namona do ita harorolaia goadagoada’ ena hahegani ita badinaia neganai, Iehova ese ita do ia hanamoa bona namo ita davaria diba. (2 Tim. 4:2; Isa. 48:​17, 18) Edena dala ai haroro gaukara amo goada bona moale ita abia?

2. Edena dala ai haroro gaukara ese ita ia hagoadaia?

² Goada Bona Hahenamo Ita Abia: Haroro gaukara ese ita ia hagoadaia Basileia ena hahenamo idauidau ita laloa bada, bona hari idia vara hekwakwanai ita laloa lasi totona. (2 Kor. 4:​18) Baibel ena hahediba herevadia ita herevalaia karana ese iseda abidadama Iehova ena gwauhamata dekenai ia hagoadaia, bona hereva momokani ita laloa bada totona. (Isa. 65:​13, 14) Ma haida ita durua Iehova idia tura henia totona, “tanobada” amo idia gini siri be namo, bona unai ese ita ia hagoadaia danu tanobada amo ita gini siri totona.​​—Ioa. 17:​14, 16; Roma 12:2.

3. Edena dala ai haroro gaukara ese ita ia durua kara namodia ita hahedinaraia totona?

³ Haroro gaukara ita karaia neganai, unai ese ita ia durua kara namodia ita hahedinaraia totona. Hegeregere, ‘taunimanima idauidau ibounai edia mauri dalana ita abia dae’ karana ese ita ia durua ita manau totona. (1 Kor. 9:​19-​23) “Edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona” taudia ita haroro henia neganai, hebogahisi karana ita dibaia. (Mat. 9:​36) Herevana taunimanima idia ura lasi iseda haroro hereva idia kamonai o ita idia dagedage henia, to unai amo haheauka karana ita dibaia. Iseda nega bona goada ita gaukaralaia ma haida ita durua neganai, do ita moale bada.​​—Kara 20:35.

4. Emu haroro gaukara be edena bamona oi laloa?

⁴ Ita tomadiho henia Diravana hanamoa totona, haroro gaukara ita karaia be hahenamo badana ta! Haroro gaukara ese ita ia hagoadaia. Unai gaukara dekenai “Sivarai Namona” ita harorolaia goadagoada neganai, hahenamo momo ita abia diba.​​—Kara 20:24.