Auka Lasi Dalanai Hadibaia

1. Taunimanima ita hadibaia namonamo totona, dahaka be mai anina bada?

¹ Auka lasi dalanai taunimanima ita hadibaia namonamo be mai anina bada. Hadibaia Tauna Badana, Iesu, ena hadibaia dalana ita laloa neganai, unai ese ita ia durua taunimanima ita “hadibaia” namonamo totona.​​—2 Tim. 4:2; Ioa. 13:13.

2. Auka lasi dalanai ita hadibaia neganai dahaka ita karaia be namo, bona ena namo be dahaka?

² Auka Lasi Dalanai Hereva: Ororo Harorona ai Iesu be auka lasi dalanai hereva momokani dobudia ia gwauraia. (Mat., karoa 5-7) Iesu ena hereva idia kamonai taudia hutuma be “iena hadibaia hereva dekenai idia hoa bada.” Tuari taudia be Iesu dogoatao totona idia lao neganai, iena hereva dekenai idia hoa bona idia gwau: “Hamatamaia nega dekena amo ia mai bona hari, tau ta ia hereva lasi inai tau ia hereva bamona.” (Mat. 7:​28, 29; Ioa. 7:​46) Ita ura lasi hereva aukadia momo ita gwauraia, o haheitalai momo ita gaukaralaia ma haida edia lalona ita veria hereva momokani idia dibaia totona. To taunimanima idia diba herevadia ita gaukaralaia, unai amo hereva momokani ita hahedinaraia diba.

3. Dahaka dainai haida be taunimanima dekenai hereva momo idia gwauraia, bona edena dala ai unai ita hanaia diba?

³ Hereva Momo Gwauraia Lasi: Iesu be ena kamonai taudia ia laloa bada dainai, ia ura lasi idia dekenai hereva momo be nega tamona ia gwauraia. (Ioa. 16:12) Namona be iseda varavara, kamonai matamata taudia bona natudia edia diba bona noho dalana hegeregerena ai ita haroro henidia. Ena be idia kamonai namonamo, to idia dekenai nega tamona hereva momo ita gwauraia lasi. Kudou-maoro taudia be Dirava momokanina, Iehova, do idia dibaia noho.​​—Ioa. 17:3; 1 Kor. 3:6.

4. Dahaka dainai hereva badadia sibona ita gwauraia hedinarai be mai ena namo?

⁴ Hereva Badadia Gwauraia Hedinarai: Iesu be taunimanima ia hadibaia neganai hereva momo ia gwauraia lasi. Iesu ese inai hereva, “Mase guria gabu dekenai idia noho taudia ibounai . . . do idia toreisi” ia gwauraia neganai, ia be toreisi lou taudia dekenai do idia vara gaudia rua edia anina be nega tamona ai ia herevalaia lasi. (Ioa. 5:​28, 29) Ta ita stadi henia neganai, namona be hereva badadia sibona ita gwauraia hedinarai bona stadi bukana ai idia noho lasi gaudia ita herevalaia lasi.

5. Auka lasi dalanai ita hadibaia neganai, dahaka hahenamo do ita abia?

⁵ Ita moale badina Iehova be auka lasi dalanai ita ia hadibaia! (Mat. 11:25) Namona be auka lasi dalanai taunimanima ita hadibaia bona haroro gaukara ai anina namona ita havaraia dainai ita moale.