Hadibaia Karana Hanamoa Daladia Toi
1. Dahaka dainai ita ura iseda hadibaia karana ita hanamoa?
1 Ita ibounai be hadibaia taudia. Bema ita be ta ita haroro henia, o lou henia, o stadi henia, ia dekenai mai anina bada herevadia o “Toretore Helagadia” edia anina ita hadibaia unai—unai hereva dainai ia ese “aonega” bona “hahemauri” ia abia diba. (2 Tim. 3:15) Unai hadibaia karana be hahenamo badana, ani? Hadibaia karana ita hanamoa daladia toi mani ita herevalaia.
2. Edena dala ai auka lasi dalanai ta ita hadibaia?
2 Auka lasi dalanai: Nega ibounai ita laloatao: Ena be hereva (o subject) ta ita diba namonamo, to bema ita stadi henia tauna be ita herevalaia gauna ia diba lasi, ia be unai do ia lalopararalaia lasi. Unai dainai, stadi lalonai anina lasi gaudia oi herevalaia lasi, to point badadia sibona oi herevalaia. Hereva momo karana be hadibaia dala namona lasi. (Aon. 10:19) Point badana idia hahedinaraia siridia sibona oi duahia. Siri ta oi duahia murinai, unai siri ese stadi ia durua point oi hahedinaraia. Ena be Ororo Harorona—Mataio karoa 5 ia lao 7—ai hereva dobudia momo idia noho, to Iesu ese unai hereva be auka lasi bona hereva kwadogidia bona maorodia amo taunimanima ia hadibaia.
3. Haheitalai ena namo be dahaka? Edena haheitalai oi gaukaralaia be namo?
3 Haheitalai: Haheitalai ese ta ena lalohadai, hemami bona laloatao karana ia durua. Taunimanima idia diba sivarai kwadogidia amo haheitalai namodia oi gwauraia be namo. Nega momo Iesu be unai bamona ia karaia. (Mat. 7:3-5; 18:2-4) Pepa ta ai laulau o piksa ta oi torea be dala namona ta danu. Oi hegaegae namonamo neganai, haheitalai namodia momo oi gaukaralaia diba.
4. Edena dala ai henanadai ita gaukaralaia namonamo diba?
4 Henanadai: Henanadai ese stiuden ia durua ia lalohadai totona. Unai dainai, henanadai oi henia murinai, oi naria be namo. Bema haere oi henia haraga, do oi diba lasi emu stiuden be dahaka ia lalopararalaia. Bema ia ese haere kererena ia henia, namo lasi oi hamaoromaoroa, to henanadai ma haida oi henia haere maorona ia henia totona. (Mat. 17:24-27) Momokani, ita ibounai be goevadae lasi. Unai dainai, Baibel ese ita ia hagoadaia ta ita hadibaia dalana ita naria namonamo. Unai bamona ita karaia neganai, ita sibona bona ita idia kamonai henia taudia do ita hamauria.—1 Tim. 4:16.