Edena Negai Kamonai Taudia Ita Lou Henia be Namo?
1. Hahediba taudia halaoa gaukarana ita karaia totona, dahaka be mai anina bada?
1 Hahediba taudia halaoa gaukarana ita karaia totona, namona be ia ura Iehova ena Basileia do ia diba tauna ita lou henia. (Mat. 28:19, 20) Kamonai tauna ena sediual bona ita eda sediual hegeregerena ai lou henia dinana ita abia hidi diba. Dahaka dainai kamonai tauna ita lou henia haraga be namo?
2, 3. Dahaka dainai kamonai taudia ita lou henia haraga be namo?
2 Dahaka Dainai Do Ita Lou Henia Haraga? “Basileia ena Sivarai Namona” harorolaia gaukarana be kahirakahira do ia ore, bona inai tanobada dikana ena dokona danu be ia kahirakahira vadaeni. (Mat. 24:14; 1 Pet. 4:7) Danu, hari be “hahemauri dinana” dainai kamonai taudia dekenai ‘Dirava ena hereva do ita harorolaia goadagoada’ be namo, anina be idia ita lou henia haraga edia ura ita habadaia totona.—2 Kor. 6:1, 2, NW; 2 Tim. 4:2, NW.
3 Satani ia ura dikadika kamonai taudia edia kudouna ai ita hadoa uhe do ia hamasea. (Mar. 4:14, 15) Nega momo ruma bese taudia, gaukara turadia, bona ma haida be Basileia sivarai namona idia kamonai taudia idia kirikirilaia. Unai dainai, haida ese kamonai taudia edia ura idia do koua lasi neganai, ita lou henia haraga bona vadivadi ginigunana ai ita herevalaia gaudia ita habadaia be namo.
4. Vadivadi ginigunana ai edena dala ai lou henia totona ita hegaegae diba?
4 Lou Henia Dinana Abia Hidi: Vadivadi ginigunana ai lou henia dinana bona ena nega umui abia hidi be namo. Kamonai tauna dekenai henanadai ta oi rakatania, lou henia dinanai do oi haerelaia totona. Namona be vadivadi ginigunana ai oi herevalaia gauna bona do oi lou henia dinana be emu noutbuk ai oi torea. Bema oi bisi lasi, reana ruma tauna oi noia diba kerukeru o dina haida murinai do oi giroa lou totona. Bema vadivadi ginigunana be wikeni ai oi karaia, bona kamonai tauna be wiki lalonai moni gaukara ia karaia, reana do ia gwau vaira wikeni ai ia do oi vadivadi henia. Lou henia dinana umui abia hidi neganai, namona be unai dina ai ia oi lou henia.—Mat. 5:37.
5. Edena dala ai kamonai taudia ita lou henia haraga karana ese ita do ia durua, Iesu ese ia henia hahediba taudia halaoa gaukarana ita hagugurua totona?
5 Badina namodia dainai kamonai taudia ita lou henia haraga be namo. “Nega be kwadogi” dainai, lou henia ena dina ita abia hidi bona ita lou henia haraga be namo. (1 Kor. 7:29) Basileia ena sivarai idia kamonai henia taudia ita lou henia haraga neganai, anina namona ita havaraia diba.