Dirava Ena Harihari Gauna Hereadaena Dainai Ita Tanikiu Henia
1. Dahaka dainai Iehova ita tanikiu henia be namo?
1 Iehova ena ‘harihari gauna namona’ ta be inai: Iena Natuna ena mauri davalaia boubouna ia henia. (Iam. 1:17) Unai ese dala ia kehoa hahenamo momo ita abia totona, hegeregere Dirava ese iseda kara dika ia gwauatao. (Efe. 1:7) Unai dainai, nega ibounai Dirava ita tanikiu henia. Memorial negana ai, nega ita atoa unai harihari gauna hereadaena ita laloa dobu totona.
2. Edena dala ai emu ruma bese oi durua mauri davalaia boubouna idia laloa bada totona?
2 Laloa Bada Karana Habadaia: Emu ruma bese edia laloa bada karana oi habadaia totona, March 30 ia do ginidae lasi neganai, wiki ginigunadia lalonai emui nega umui gaukaralaia Ruma Bese Ena Tomadiho ai Iesu ena mauri davalaia boubouna umui herevalaia totona. Danu, dina ta ta ai ruma bese ida Memorial ena Baibel duahiduahi umui karaia hebou. Namona be mauri davalaia boubouna ese oi ia hanamoa dalana oi laloa, bona oi itaia edena dala ai oi ia durua Iehova, oi sibona, ma haida, bona vaira negana dekenai oi laloa bada totona.—Sal. 77:12.
3. Edena dala ai iseda tanikiu karana ita hahedinaraia?
3 Tanikiu Hahedinaraia Daladia: Mauri davalaia boubouna ita laloa bada karana ese ita do ia doria ma haida dekenai Iehova bona ena lalokau hereadaena dainai iena Natuna ia siaia karana ita herevalaia totona. (Sal. 145:2-7) March, April, bona May lalonai, ruma bese haida be edia tanikiu karana idia hahedinaraia totona, palani idia karaia edia ruma bese lalonai ta ese heduru painia gaukara ia karaia totona. Bema oi be hegeregere lasi painia gaukara oi karaia totona, vadaeni emu “nega namona” oi gaukaralaia emu haroro gaukara oi habadaia totona, a? (Efe. 5:16) Danu, ita ura Iehova ita tanikiu henia dainai, unai ese ita do ia doria ma haida ita durua Memorial dekenai idia mai totona. (Apok. 22:17) Lou henia taudia, stadi taudia, varavara, gaukara turadia, bona dekena taudia edia ladana o lista ta oi torea, bona Memorial ena boiboi pepana hariharilaia gaukarana oi karaia momo danu.
4. Edena dala ai Memorial negana ita gaukaralaia namonamo?
4 Memorial negana lalonai ita hahedinaraia, ita be Iehova ese taunimanima dekenai ia henia harihari gauna ita laloa bada. Iesu ena mauri davalaia boubouna bona “Keriso ena gau namodia” dainai, unai nega ita gaukaralaia eda tanikiu karana ita habadaia bona hahedinaraia totona.—Efe. 3:8.