Iseda Tanikiu Karana Ita Hahedinaraia Memorial be April 17 ai Do Ita Karaia
1. Memorial negana ai, edena hereva Salamo bukana lalonai do ita laloa be namo?
1 Salamo torea tauna be Iehova ena hebogahisi bona hahemauri karadia momo ia laloa bada dainai, ia gwau: “Lohiabada dekenai dahaka do lau henia, iena hariharibada ibounai lau dekenai ena davana?” (Sal. 116:12) Hari inai negai, Dirava ena hesiai taudia be badina momo dainai edia tanikiu karana idia hahedinaraia. Salamo torea tauna ese unai hereva ia torea bena lagani handred momo murinai, Iehova ese taunimanima dekenai harihari gauna hereadaena ia henia—mauri davalaia boubouna. April 17 ai Keriso ena mase laloatao totona ita hegaegae neganai, ita be badina namona dainai eda tanikiu karana ita hahedinaraia.—Kol. 3:15.
2. Dahaka badina haida dainai mauri davalaia boubouna ita laloa bada?
2 Mauri Davalaia Boubouna Ena Hahenamo Idauidau: Mauri davalaia boubouna amo, Dirava ese “iseda kara dika ia gwauatao.” (Kol. 1:13, 14) Unai dainai lalomamina goevana ida Iehova ita tomadiho henia. (Heb. 9:13, 14) Bona mai gari lasi ida guriguri amo Iehova ita hereva henia diba. (Heb. 4:14-16) Mauri davalaia boubouna idia abidadama henia taudia be mauri hanaihanai do idia abia!—Ioa. 3:16.
3. Mauri davalaia boubouna dainai, edena dala ai Iehova ita tanikiu henia diba?
3 Tanikiu Karana Hahedinaraia Dalana: Iseda tanikiu karana ita hahedinaraia dalana ta be, dina ta ta ai Memorial Baibel duahiduahi ita karaia bona ita laloa dobu. Danu, mai iseda kudouna ibounai ida guriguri amo Iehova ita hamaoroa diba, mauri davalaia boubouna ita laloa bada. (1 Tes. 5:17, 18) Iesu ena oda ita badinaia dainai Memorial dekenai ita lao, unai amo eda tanikiu karana ita hahedinaraia. (1 Kor. 11:24, 25) Danu, Iehova ena lalokau bada karana ita tohotohoa bona taunimanima momo ita boiria Memorial hebouna dekenai idia mai totona.—Isa. 55:1-3.
4. Namona be eda lalona ita hadaia dahaka ita karaia totona?
4 Iehova ena hesiai taudia ese Memorial hebouna idia laloa bada. Badina ia be inai lagani ena mai anina bada hebouna! Memorial negana ia kahirakahira lalonai, namona be Salamo torea tauna bamona ita gwau diba: “Lauegu lauma e, Lohiabada do oi hanamoa. Iena hariharibada ibounai do oi laloaboio lasi.”—Sal. 103:2.