Idia Rekodia Pablikeisen Gaukaralaia Dalana
1. Iseda pablikeisen momo be idia printaia sibona lasi, to ita ia durua diba gauna ma ta be dahaka?
1 Taunimanima momo be jw.org Web sait dekenai idia noho hagoadaia herevadia bona hereva momokanidia duahia karana idia moalelaia. (Had. 12:10) To, idia rekodia pablikeisen oi gaukaralaia vadaeni, a? Iseda Web sait dekenai idia noho pablikeisen momo be idia rekodia dainai ita kamonai diba. Edena dala ai idia rekodia pablikeisen ese ita ia durua diba?
2. Idia rekodia gaudia be sibona eda stadi ai edena bamona ita gaukaralaia diba? Bona ruma bese tomadiho ai edena bamona idia gaukaralaia diba?
2 Ita Sibona Eiava Eda Famili Totona: Ita loaloa neganai eiava dina ta ta ena gaukara idauidau ita karaia lalonai, idia rekodia Baibel duahiduahi, magasin, o pablikeisen ita kamonai ese ita ia durua eda nega ita gaukaralaia namonamo totona. (Efe. 5:15, 16) Ruma bese tomadiho ai idia rekodia pablikeisen haida ita kamonai diba, hegeregere idia rekodia duahiduahi be eda Baibel, buka eiava magasin amo ita badinaia diba. Bema ita ura eda duahiduahi karana ita hanamoa eiava gado ta ita ura dibaia sibona eda stadi negadiai idia rekodia gaudia ita gaukaralaia diba.
3. Idia rekodia gaudia be edena bamona taudia totona?
3 Haroro Totona: Iseda teritori ai idia bisi taudia be nega lasi iseda pablikeisen idia duahia, to reana ita rekodia pablikeisen do idia ura kamonai. Eiava ita hereva henia taudia haida be idau gado taudia, to bema Basileia sivaraina be ‘edia gado ai’ idia kamonai do idia abia dae. (Kara 2:6-8) Tano haida dekenai, kamonai karana be diba abia dalana ta. Hegeregere, China ena saut kahanai idia noho Hmong taudia, ese edia histori be uru matamatadia dekenai idia herevalaia bona idia kamonai namonamo dainai edia histori idia laloatao diba. Africa taudia momo be idia ura sivarai amo diba idia abia.
4. Kamonai taudia be edena dala ma haida ai ita durua diba?
4 Emu teritori ai ruma tauna ena gado ai idia rekodia gauna ta oi gaukaralaia diba. Ta oi hagoadaia totona idia rekodia pablikeisen ta be e-mail amo ia dekenai oi siaia diba. Idia rekodia pablikeisen ta, hegeregere Gima Kohorona ta, be CD dekenai oi atoa bona kamonai tauna dekenai oi hariharilaia diba, bona idia printaia magasin oi henia danu. Bema eda Web sait amo buka, buklet, pepapepa eiava magasin ta oi daonloud bona kamonai tauna dekenai ita henia, namona be ripoti pepana dekenai ita torea. Idia rekodia pablikeisen be sibona eda stadi ai ita gaukaralaia diba, bona ita gaukaralaia hereva momokani ena uhe ita hadoa totona.—1 Kor. 3:6.