Baibel Stadi Momo Hamatamaia
1. Mataio 28:19, 20 ena hahegani ita hagugurua totona, dahaka ita karaia be namo?
1 Iesu ese ita ia hagania, ‘diba tahua taudia do ita halaoa bona idia dekenai do ita hadibaia.’ (Mat. 28:19, 20) Unai dainai, ita ura Baibel stadi hamatamaia ena wikeni sibona lasi, to nega ibounai Baibel stadi ta ita hamatamaia totona. Henunai idia noho herevadia ese ita do idia durua.
2. Daidia dekenai Baibel stadi oi hamatamaia?
2 Hamatamaia: Baibel stadi momo ita hamatamaia toho neganai, reana idia huanai tamona do ita stadi henia. (Had. 11:6) Nega ta oi be taunimanima dekenai maoromaoro Baibel stadi oi hamatamaia, a? United States ai, kongrigeisen ta be palani idia karaia hua ta lalonai unai bamona idia karaia totona. Idia moale badina Baibel stadi 42 idia hamatamaia! Nega momo kamonai taudia idia diba lasi oi be Baibel stadi oi karaia. Lou henia oi karaia neganai, Baibel stadi oi hamatamaia, a? Bema idia ura lasi, vadaeni edia ura ita matauraia. To namona be idia ita vadivadi henia bona durua noho. Oi be emu dekena taudia, varavara, gaukara bona sikuli turadia oi nanadaia Baibel stadi idia ura, a? Danu emu stadi taudia oi nanadaia edia turadia o varavara haida be Baibel stadi idia ura eiava lasi.
3. Dahaka tulu namona ta amo Baibel stadi ita hamatamaia diba, bona edena negai ita gaukaralaia diba?
3 Tulu Namona Ta: Pepapepa ladana Oi Ura Hereva Momokani Oi Diba, A? be tulu namona ta Baibel stadi hamatamaia totona. Unai pepapepa be ruma taudia dekenai oi henia diba, herevana idia ese iseda buka ma haida idia abia dae o lasi. Bisinesi haroro, dala haroro, revareva haroro o lou henia oi karaia neganai, reana unai pepapepa oi gaukaralaia be namo. Danu, taunimanima idia noho lasi rumadia dekenai unai pepapepa oi rakatania. PMV ai oi guia, sitoa oi lao, o gaukara gabunai, unai pepapepa oi abia lao danu be namo. Pepapepa ena rau 4 be Baibel Hadibaia bukana bona Baibel stadi ia herevalaia.
4. Edena dala ai Hereva Momokani Oi Diba pepapepa amo stadi ta ita hamatamaia diba?
4 Ta dekenai pepapepa oi henia neganai, pepapepa ena rau 1 ai idia noho henanadai oi hahedinaraia bona oi nanadaia, “Edena henanadai ena haere oi ura diba?” Bena pepapepa ai haere umui itaia hebou, bona rau 4 ai Baibel stadi ia herevalaia kahana oi duahia. Bena Baibel Hadibaia bukana oi kehoa bona hereva ma haida oi hahedinaraia, buka oi hariharilaia, bona dala oi karaia oi lou henia totona.
5. Dahaka dainai Baibel stadi momo ita hamatamaia be namo?
5 Iseda teritori ai momo idia ura dikadika idia diba Baibel be dahaka ia hadibaia. Baibel stadi momo ita hamatamaia neganai, unai ese dala do ia kehoa ma haida ita durua mauri dalana dekenai idia raka totona.—Mat. 7:13, 14.