Memorial ai Haroro Namona Henia
1. Dahaka ese vadivadi taudia edia lalona ia hamarerea diba? Herevalaia.
1 Ita be gaukara badana ita karaia taunimanima ita boiria Memorial dekenai idia mai totona. Vadivadi taudia be idia kamonai herevana ese edia lalona ia hamarerea. To unai sibona lasi, hahine ta be Memorial dekenai ia lao murinai, unuseniai ia itaia gaudia ia herevalaia—ibounai be kara namodia idia hahedinaraia, bona edia hebou ruma hairaina be volantia taudia ese idia karaia bona ia goeva. Unai dainai, ita bona hereva henia tauna, be unai mai anina bada hebouna ai, haroro namona do ita henia.—Efe. 4:16.
2. Edena dala ai vadivadi taudia dekenai haroro namona ita henia?
2 Vadivadi Taudia Hedavari Henia: Vadivadi taudia dekenai moale toana ita hahedinaraia bona inai hanamoa hereva “namo” ita gwauraia amo idia dekenai haroro namona ita henia. (Ioa. 13:35) Ena be idia mai taudia ibounai oi hereva henia diba lasi, to oi badinai idia helai taudia oi hedavari henia diba. (Heb. 13:1, 2) Namona be nega ginigunana idia mai taudia oi tahua. Reana idia be Memorial ena invateisen pepana idia abia taudia. Reana oi henanadai diba: “Inai be emu nega ginigunana hebou oi mai, a?” Idia oi boiria oi ida do idia helai bona idia henia henanadai oi haerelaia. Bema emu kongrigeisen be Kingdom Hall do ia rakatania haraga badina kongrigeisen ma ta do ia hebou, reana oi gwau: “Inai hebou dekenai emu lalohadai lau ura diba. Edena bamona oi do lau davaria?”
3. Edena dala ai idia haroro lasi pablisa ita welkam henia?
3 Haroro Lasi Pablisa Welkam Henia: Haroro lasi pablisa bona lagani ta ta ena Memorial sibona idia mai taudia do idia mai danu. Namona be idia ita welkam henia bona ita hamaoroa idia ita itaia dainai ita moale. (Roma 15:7) Memorial murinai, namona be elda taudia ese unai taudia idia vadivadi henia edia ruma dekenai, bona idia hagoadaia kongrigeisen ena hebou idia mai noho totona. Ita gurigurilaia gauna be hebou idia mai taudia ese idia kamonai herevadia bona ‘iseda kara namodia idia itaia dainai’ Dirava do idia hanamoa.—1 Pet. 2:12.