“Hebogahisi” Ita Hahedinaraia
1. Hari inai negai taunimanima be dahaka idia ura?
1 Hari inai negai taunimanima momo idia ura haida ese idia hebogahisi henidia. Tanobada ai hekwakwanai momo idia vara dainai, taunimanima idia moale lasi, idia lalometau, bona idia mamia idia be helaro lasi. Milioni momo be heduru idia ura, bona ita be Keristani taudia dainai eda dekena taudia dekenai hebogahisi ita hahedinaraia be namo. (Mat. 22:39; Gal. 6:10) Edena dala ai hebogahisi ita hahedinaraia?
2. Edena dala namona ai hebogahisi ita hahedinaraia?
2 Hebogahisi Hahedinaraia Dalana: Dirava sibona ese lalogoada korikorina, ia noho hanaihanai gauna, ia henia diba. (2 Kor. 1:3, 4) Iehova be ita ia hagoadaia “hebogahisi” karana ita hahedinaraia amo ia ita tohotohoa, bona ita ia hagania iseda dekena taudia dekenai Basileia ena sivarai namona ita harorolaia totona. (1 Pet. 3:8) Unai mai anina bada gaukarana ita karaia be dala namona edia “kudouna idia makohia taudia” ita hagoadaia totona, badina Dirava ena Basileia sibona ese hisihisi idia mamia taudia ia durua diba. (Isa. 61:1) Iehova be ena taunimanima ia hebogahisi henia dainai, kahirakahira kara dika do ia haorea bona tanobada matamatana do ia havaraia.—2 Pet. 3:13.
3. Iesu bamona, edena dala ai taunimanima ita laloa bada?
3 Iesu Bamona, Taunimanima Laloa Bada: Ena be Iesu ese hutuma ia haroro henidia, to idia ta ta ia laloa bada, bona ia itaia heduru idia abia be namo, Dirava idia tura henia namonamo totona. Idia be mamoe naria tauna ese ia naria lasi mamoe bamona. Iesu be ia itaia gauna ese ena kudouna ia hamarerea dainai, mai haheauka ida idia ia hadibaia. (Mar. 6:34) Iesu bamona, taunimanima ita laloa bada karana ese ita do ia hagoadaia, idia ta ta dekenai hebogahisi ita hahedinaraia totona. Iseda hereva dalana bona vairana ena toana amo unai do ita hahedinaraia. Haroro gaukara do ita atoa guna, bona taunimanima idia laloa bada gaudia hegeregerena iseda hereva ita haidaua.—1 Kor. 9:19-23.
4. Dahaka dainai hebogahisi be dabua bamona ita hahedokilaia be namo?
4 Bese ibounai amo hutuma bada ese Basileia sivaraina idia abia dae bona idia ita laloa bada karana idia moalelaia. Bema hanaihanai hebogahisi be dabua bamona ita hahedokilaia, ita ese hebogahisi Diravana, Iehova, do ita hanamoa bona hamoalea.—Kol. 3:12.